fríggjadagur 19. august 2011síða 30

Sosialurin nr. 95 · 19. august 2011 14 TJÓÐFUGLUR OG KELIDJÓR Randi Jacobsen randi@sosialurin.fo Tey eru fleiri, sum hava eitt tjaldur í stovuni. Útstappað á eini hyll ella reol, væl at merkja. Men soleiðis er ikki Millum Gilja 35. Har hevur eitt tjaldur hvønn dag í summar gingið upp trappurnar, inn gjøgnum dyrnar, inn í gongina og víðari inn í stovuna. So spakt er tjaldrið, at tað etur úr hondunum á húsfólkunum. Summargesturin, sum nú er farin avstað aftur, dámar best ost, men hevur eisini etið annan mat. - Tað er øgiliga stuttligt at hava eitt tjaldur sum kelidjór, sigur 22 ára gamla Elsa Jespersen flennandi. Hon er dóttir Petru og Kára Jespersen, sum umframt sonin Ara og dóttrina Elsu, nú eisini hava eitt tjaldur gangandi í stovuni. Alt byrjaði fyri trimum árum síðani, tá spaka tjaldrið spakuliga nærkaðist húsfólkunum meðan tey vóru uttanfyri. Í fjørsummar var tjaldrið so mikið spakt, at tey kundu geva tí at eta út gjøgnum vindeyga. - Tað var ógvuliga stuttligt, men nú er uppaftur stuttligari, tá tjaldrið gongur inni í stovuni og etur ost, sigur Elsa. - Tað verður kanska ikki so stuttligt, tá tað skvettir á gólvið, men tað er so ikki hent enn, sigur Elsa. Kemur tá rópt verður á tað Í roynd og veru er tjaldrið Millum Gilja 35 líkt so mongum øðrum húsdjórum. - Mamma kann bara rópa á tað, tá vit eru uttanfyri, so kemur tað flúgvandi onkrastaðni frá, fortelur Elsa. Hon greiðir eisini frá, at tjaldrið hevur gingið aftaná henni og mammuni, ein dagin tær báðar fóru at ganga ein túr. Ein annan dagin vildi tjaldrið ikki fara av biltakinum, tá tey skuldu eitt ørindi. - Vit hugsaðu bara, at tað mátti fara á flog, tá vit koyrdu, men tjaldrið varð standandi á takinum langt oman eftir vegnum, sigur Elsa, sum nú hevur biðið summargestinum farvæl. Tjaldrið fór avstað fyri nøkrum vikum síðani, men Millum Gilja 35 vóna tey, at tjaldrið kemur aftur næsta ár. Og soleiðis sum tjaldrið er komið nærri og nærri húsfólkunum gjøgnum árini, er ikki óhugsandi, at tað næsta summar situr til borðs saman við Petru, Kára, Ara og Elsu Millum Gilja 35. Tjaldrið gongur í stovuni Uppi Millum Gilja nummar 35 í Hoyvík hava tey eitt heldur óvanligt húsdjór, tí har gongur tjóðfuglur okkara, tjaldrið, dagliga í stovuni og etur ost Elsa Jespersen og kelidjórið, tjaldrið, sum hevur verið dagligur summargestur – uttanfyri so væl sum innanfyri hjá teimum