hósdagur 22. august 2013síða 34

nr. 96 · 23. august 2013 2 VIKUSKIFTI Simona Weihe Alt er ikki hvítt ella svart. Jú, kanska tá tú ert ung er alt so deiliga einfalt. Men lívið lærir teg, at í lívsins viðurskiftum eru nógv litbrigdi. Tó eru øki, sum standa seg best við at vera svørt ella hvít. M.a. lógirnar. Tí er tað øgiliga ørkymlandi, tá tú t.d. hoyrir royndan løgfrøðing úttala seg um tunnilssáttmálan, sum landsstýrismaðurin fesjast við, og setir spurnartekin við m.a. framferðarháttin og at landsstýrismaðurin er so hulin. Men tað er sum at sletta vatn á gás. Onki líkinda svar. Tað kennist eitt sindur tilafturskomið ikki fyrst og fremst at virða borgararnar og spæla við opnum kortum. Og oman á tað heila verður Landsverk fullkomiliga ignorerað sum serkunnleiki. Sum kærkomin flýggjan frá tunlakjakinum, so koma grindirnar í hópatali. Fólk kóka, steikja, salta og skera lykkjur til frystiboksina at bíða eftir kuldanum. Sum við serfrøðini hjá Landsverki, so verður illgruni um møguligt samband millum tvøst og spik og álvarsamar sjúkur meira og minni ignorerað. Ongar kunngerðir við tilráðingum eru heldur at hoyra í hesum døgum. Og so ásetingin av fiskidøgunum. Her hava vit eisini serfrøðingarnar. Men tað kundi ikki fallið tingfólki inn at lurta eftir teimum. Tað tykist sum vit hava hesar stovnar til pynt ella sum eitt slag av íverksetan ella arbeiðsterapi. Man hesin løgni atburður fáa útisetar at leingjast heimaftur og tey, sum eru her, at støðast? Hvat bilar okkum? Man kyksilvurið hava gjørt okkum eitt sindur tollut ella seintfatandi? _ _ _ Sjálvt um tað eru nógvir vakrir, gráir litir millum svart og hvítt, ja enntá ljósareyðir, so mugu vit ansa eftir at kreativiteturin ikki fer á rull, tá tað kemur til samfelagsligar avgerðir. Duga at skilja ímillum at tað eru viðurskifti, har vit kunnu vera ymisk á máli um eitthvørt er vakurt, flott, eggjandi, tølandi, okey, rætt, ljótt, niðrandi, frástoytandi, niðurbrótandi, ikki okey ella skeivt. Altso eingin facittur. Men tá tað kemur til ítøkiligheitir sum lógir, serkunnleika og gransking, tá tørvar okkum at fáa tingini svart upp á hvítt. Og at hetta verður tikið fyri fult. Váðafús fólk 2000 kvinnur renna leygardagin Aftur í ár skipar blaðið Kvinna saman við rennifelagnum Bragdinum fyri tí árligu Kvinnurenningini. Hetta er 5. árið á rað, at kvinnur úr øllum Føroyum hittast til størsta rennitiltakið í Føroyum. Mikudagin á midnátt var seinasta freist at boða frá luttøku, men áhugin var so mikið stórur, at fyrireikararnir valdu at leingja freistina nakað. Tískil er væntandi, at einar 2000 kvinnur luttaka í renningini leygardagin. Eins og undanfarin ár ber eisini til at luttaka, hóast tú ikki rennir. Fyrireikararnir hava nevniliga lagt til rættis tvær rutur: Rennirutan, sum er fimm kilometrar, og Gangirutan, sum er ein teinur á 2,3 kilometrar. Kvinnurenningin 2013 byrjar klokkan 15.00 á Tórsbreyt. Sakaris í Sirkus Leygarkvøldið klokkan 23.00 fer tónleikabólkurin Sakaris at undirhalda í Sirkus. Oddamaðurin í bólkinum, Sakaris Emil Joensen, fer saman við Andreas Dalsgaard at spæla elektrotónleik – bæði okkurt nýtt og okkurt gamalt. Umframt teir vanligu slagararnar hjá bólkinum fara teir eisini at framføra løg, sum annars ikki hava verið so nógv at hoyrt, tá bólkurin hevur framført live. Eisini verður spildurnýtt tilfar at hoyra. Ert tú til keytars, trummupads, synths og 80ara boogie, er bara at fara í Sirkus leygarkvøldið til Sakaris! Finalan um Løgmanssteypið Um vikuskiftið verður stóra steypafinalutiltakið hjá Fótbóltssambandinum, tá steypavinnarin skal finnast hjá bæði teimum yngru og eldru. Longu fríggjakvøldið verða tvær tær fyrstu finalurnar spældar, og allan leygardagin verða eisini dystir. Steypafinaluvikuskiftið endar við mannsfinaluni millum EB/Streym og Víking, sum er ein endurtøka av finaluni í fjør, tá Víkingur vann eftir brotssparkskapping. Rás2 og in.fo gera nógv burturúr stóra steypadegnum. Sýna hundar fram í Hoyvík Leygardagin verður Hoyvíkshøllin karmur um stóra hundaframsýning, sum Hundaeigarafelag Føroya, HUFF, skipar fyri. Talan er um ta árligu Tjóðarframsýningina. Øll tey, sum hava rasuhund og eru áhugað í at sýna hundin fram, kunnu luttaka í hundaframsýningini, sum byrjar klokkan 09.00 leygardagin fyrrapart og endar umleið klokkan 16.00. Á framsýningini verða allir hundarnir sæddir av eini dómsnevnd. Har verður millum annað mett um útsjónd og sinnalag hjá hundunum. Eisini plagar eigarin at ganga við hundinum, meðan dómsnevndin metir um hundin. Út frá eini heildarmeting verður hvør einstaki hundur síðani premieraður í sínum bólki. Hesaferð verður tað Arne Foss úr Noregi, ið verður dómari. Høllin letur upp fyri framsýnarunum klokkan 09.00, og sjálv dømingin byrjar klokkan 10.00. klumma