hósdagur 12. september 2013síða 32

nr. 105 · 13. september 2013 2 VIKUSKIFTI Tað var ein dagin fyri kanska 25 árum síðan. Flestir føroyingar høvdu sett seg við døgurða­borðið um útvarpstíð, sum teir plagdu at gera. Døgurðatónleikurin ljóðaði so hugnaliga úr radiotólinum. Við eitt – í staðin fyri vanligu kunngerð­ir­nar um broytingar í siglingini hjá strand­fara­skip­ unum – var eitt øgiligt buldur úr útvarpinum: buggili bugg (okkurt sovorðið) og so rópti ein rødd á okkum úr lurtinum um at spara streym. Føroyingarnir, sum sótu í tøgn við døgurðaborðið, stukku upp úr stólunum og vóru um at seta í hálsin. Vinningurin skuldi vera lægri streymkostnaður. Vanligi føroyingur hevði helst áðrenn hesa kampanju funnið út av at sløkkja eftir sær og spara, har sparast kundi. Men veit ikki hvat hendi, fólk funnu nýggjar mátar at spara og tað so nógv, at úrslitið var, at SEV mundi farið á húsagang, og streymkostnaður reyk upp! Hetta haldi eg var byrjanin til ymsar áheitanir á fólk: Apríl apríl var tað okkurt sum æt. Og rokni við, at tað man rigga sum tað skal, tá eg hugsi um, hvussu »væl« kampanjan hjá SEV eydnaðist. Tíðin gekk, og so við og við komu lýsingar á skíggjan. Tað byrjaði í smáum. Eitt sindur í senn. Tú vandist við lýsingarnar. Nú eru veður­tíðindini stuðlað av einari fyritøku og sersendingar av øðrum. Einaferð hevði enntá sáldið í matgerðarsending sín egna stuðul. Seinasta nýggja er at útvarpssendingar verða fíggjaðar av øllum møguligum fyritøkum. Enn ljóðar tað keðiligt í mínum oyrum at hoyra hetta kunngjørt fyri og eftir sendingarnar. Men eg man fara at venja meg við tað eisini. Men eigi ella skal eg venja meg við hetta? Meðan karmarnir broytast, arbeiða miðlafólk, sum onki er hent. Og broytingarnar eru stórar. Men tíðin gongur, og skjótt eru broytingarnar ikki nýggjar meira. Hjá Posta kann eg frábiðja mær lýsingabløð. Men kringvarpslýsingum sleppi eg ikki undan, tí eg lurti altíð eftir tíðindunum og ofta eftir øðrum sendingum. Og tá eg eftir jarðarferð kaldan várdag hoyri fólk tosa um, at á Smyril Line taka tey telefonina til kl. 9 í kvøld, so hevur lýsingin í Kvf kl. 12.20 um summar og sól riggað, sum hon skuldi. Akkurát sum hjá SEV á sinni. Kann ikki onkur serfrøðingur greiða frá, um hetta er OK? Og fortelja, um hetta sampakkar við public service? Ella um hugtakið yvirhøvur er sambæriligt við kravt gjald fyri at tryggja óheftni? Er hetta kanska at pynta seg við læntum fjaðrum og mis­brúka hugtakið, tí politikararnir hava uppfunnið nýggja kringvarpskonstruktión? Onkur hissini mótmæli koma frá blaðstjórum, men tá er spurningurin hvørjum teir tosa fyri og hvussu óheftir teir eru. Tað kanst tú ikki rættiliga brúka til nakað sum helst. Møguliga eru hetta óneyðugir spurningar í oyrunum á tíðindafólkum, men tað ger teir ikki minni viðkomandi fyri meg sum lurtara og hyggjara. Minnist enn, hvussu troyttandi lýsingarnar frá SEV fyri einum 25 árum síðan vóru. Í dag hevði ræsti fiskurin neyvan farið rangt hjá nøkrum av slíkari kunngerð. Tað skal so nógv meira til. Soleiðis verður alt gerandis til síðst. 25 ár síðan »Buggili bugg« Renna niðan á Sornfelli Leygardagin verður tann avbjóðandi renningin TopRun aftur á skránni. Teinurin, sum luttakararnir skulu renna, er á 9,7 kilometrar. Renningin byrjar við Effo-støðina í Kollfjarðadali og endar á Sornfelli, har inngongdin til fjallið er og har, sum radararnir hjá Færøernes Kommando vóru. Runnið verður eftir Oyggjarvegnum og snarað verður til høgru eftir fjallavegnum niðan á toppin. Starvsfólk hjá Færøernes Kommando syrgja fyri, at opið verður inn í fjallið. Tað er Ítróttarfelagið Bragdið, sum skipar fyri renningini, ið byrjar leygardagin klokkan15. Hetta er 11. árið á rað, at TopRun er á skránni. Nær hvar: Effo-støðin í Kollfjarðadali leygardagin 14. september kl. 15.00 Norðurlendskir trubadurar í Mentanarhúsinum Fríggjakvøldið koma 3 norðurlendskir trubadurar at spæla og undirhalda í Mentanarhúsinum í Fuglafirði. Talan er um ein svenskara, Lucas Stark, ein dana, Nicolai Engstrøm og ein norðmann, Leo Leonhardsen. Hetta eru vælkendir trubadurar í norðurlondum, og teir eru júst komnir úr Íslandi, har teir hava spælt ymsastaðni. Lagt er upp til eitt hugnaligt kvøld, har uppsetingin inni í Mentanarhúsinum verður rættiliga øðrvísi. Fólk kunnu sita við borð, meðan trubadourarnir skiftast at undirhalda við práti og tónleiki. Nær og hvar: Mentanarhúsið í Fuglafirði fríggjakvøldið 13. september kl. 21.30 Bellamy Brothers vitja í Føroyum Leygarkvøldið er stórt countrykvøld í Høllini á Hálsi í Havn, nøkur av teimum størstu tónleikanøvnunum innan føroyska countryheimin fara at framføra: Hallur Joensen við orkestri, Spaðar 5, Joen Magnus Danielsen og Magni Christiansen. Harafturat fara kendu Bellamy Brothers at spæla til dans fyri føroysku countryfjepparunum. Dyrnar lata upp klokkan 21.00 og fyrsta konsertin er klokkan 22.00 Nær og hvar: Ítróttarhøllin á Hálsi tann 14. september kl. 22.00 Finna sterkastu menninir í ríkinum Leygardagin tann 14. september verður enn ein Strong Man landsdystur er á skránni. Hetta er annað árið á rað, at skipað verður fyri eini slíkari kapping, har tvey umboð úr Danmark skulu dystast ímóti tveimum føroyingum í styrki. Kappingin hesaferð minnir nógv um kappingina í fjør, tó verður landsdysturin í ár í Vági. Føroysku umboðini eru Bogi Hammer og Bjarni Nielsen, sum blivu nummar eitt og tvey í kappingini um at gerast Føroya Sterkasti 2013. Kappast verður í fimm greinum: Farmers walk, tire flip, greb, power stairs og lyfta steinar á platt.  Nær og hvar: Ítróttarhøllin í Vági leygardagin 14. september kl. 16.00 100 ára hátíðarhald í Kvívík Um vikuskiftið hátíðarheldur Kvívíkar kommuna, at kommunan hevur verið sjálvstøðug kommuna í 100 ár. Kommunan er samansett av bygdunum Válur, Kvívík, Stykkið, Leynar og Skælingur. Kommuna hevur valt at hátíðarhalda dagin á ymiskan hátt. Eitt nú verður boðið til felags morgunmat leygarmorgunin klokkan 09 -10:30. Síðani ganga bygdarráðslimir, skótar og onnur skrúðgongu frá skótahúsinum til sjálva setanina av hátíðarhaldinum, sum verður við minnisvarðan hjá IPG. Haðani frá verður fari fram á Grækarisartrøð , har fyrstu 100 trøini verða gróðursett í nýggjari viðarlund. Ymisk mentanarlig  tiltøk eru á skránni, har litið verður aftur í tíðina, umframt at nútíðin eisini fær rúmd. Nær og hvar: Kvívík tann 14. og 15. September klumma Simona Weihe