týsdagur 11. februar 2014síða 56

24 lestrarblaðið 2014 Eydna Skaale Føroyska tilfeingið tvinnað saman við handverki og list. Tað er í stuttum kjarnin í nýggju serføroysku útbúgvingini. - Hetta verður fulltíðarlesnaður við 36 tímum um vikuna, og útbúgvingin gevur rætt til fullan lestrarstuðul frá Studna. Hetta er tað, sum eitur ein »atstøðisútbúgving«. Tað er ein miðnámsskúlaútbúgving við denti á handverk. Vit hava avtalu við fleiri skúlar í Íslandi, har møguleiki er at lesa víðari og til dømis taka eina Bachelorútbúgving, greiðir Jógvan Sørin Hansen, undirvísingarleiðari á Tekniska Skúla í Havn, frá. Nýggja útbúgvingin tekur tvey ár, og á Tekniska Skúla hava tey serliga hugsað um kvinnur, eldri enn 25 ár, sum málbólk til hesa útbúgvingina. Men tó eru bæði menn og kvinnur í øllum aldri vælkomin at søkja. 14 lesandi verða í fyrstu atløgu upptikin til útbúgvingina, sum byrjar í august. - Vónin er, at vit við hesum kunnu birta upp undir skapandi hugin hjá fólki, so tey fáa eina grundvitan um sjálvt handverkið og øll liðini í framleiðsluni. Skúlagongdin verður eftir ætlan skipað í modul, soleiðis, at eitt modul snýr seg um skinn, eitt um ull og tilvirking av ull – til dømis at kara, spinna, tøva osv., eitt modul fer at snúgva seg um fiskaskræðu og so framvegis, greiðir Jógvan Sørin Hansen frá. Stórur áhugi fyri at undirvísa Tað vísir seg vera stórur áhugi fyri nýggju útbúgvingini, sum skal royna at tvinna søgu og nýhugsan saman. - Vit hava havt samband við Ásu Hátún og Nikolinu Beder, sum báðar eru yvir 80 ára gamlar og sum vita eina rúgvu um føroyskt handverk og at tilvirka úr okkara egna tilfeingi. Tær hava givið góð ráð í samband við útbúgvingina. Harumframt eru tað komnar hópin av fyrispurningum frá fólki, ið fegin vilja undirvísa, soleiðis, at vit fara at hava serfrøðingar at undirvísa í øllum modulunum, vísir Jógvan Sørin á. Endamálið er at menna eina nýggja »nisjuframleiðsluvinnu« innan okkara tilfeingi. Nýggj serføroysk útbúgving Á Tekniska skúla í Havn hava tey kastað uppá til eina spildurnýggja útbúgving. Talan er um eina útbúgving, sum tekur støði í skapandi hugi og handverki - við denti á sniðgeving innan ull, skinn og fiskaskræðu – nevnd Tilvirkisatstøði Fakta um útbúgvingina Lærugreinar verða til dømis: Arvalæra/ frøði, Búfrøði (plantur og djór), Plantulæra/frøði (litplantur), Føðslulæra og Røkt/aling/hald. Av praktiskum lærugreinum verða til dømis: at veva, binda, bregda, tøva, sniðgeva, mynsturmenna og gera prýðisframleiðslu. Harumframt verður ullvask, at royta, reinsa, nappa, karða og spinna. Eisini verður garvað, rotað og barkað skinn, og arbeitt verður eisini við at framleiða vørur úr fiskaskræðu. Umframt handaligu lærugreinarnar verða eisini bókligar lærugreinar sum føroyskt-C, Enskt-C, Støddfrøði-C, Kunningartøkni-C, Myndlist-C (billedkunst) og Stílmenning-C (stylist). Fyri at byrja á Tilvirkisútbúgvingini er kravið, at tú hevur lokið fráfaringarroynd fólkaskúlans. Umsóknarfreistin er um miðjan august, og umsóknarskjalið kann longu nú heintast á heimasíðu skúlans - www.tst.fo Útbúgvingin gevur atgongd til víðari lestur á »Myndlistaskólann í Reykjavík«, »Tækniskólann í Reykjavík« og »Verkmenntaskólann í Akureyri«.