týsdagur 11. mars 2014síða 54

18 fótbóltur 2014 Fótbóltsblaðið hjá miðlahúsinum NSÍ heldur fram við arbeiðinum at byggja sær eitt lið upp, sum gjørt hevur verið síðstu tvey árini. – Góðir árgangir eru á veg, so vit brúka heldur tíð og pengar upp á okkara egna fólk, enn at keypa okkum styrk, sigur NSÍ-venjarin, Trygvi Mortensen – Okkara fyrstu ellivu standa seg ímóti einum og hvørjum av hinum liðunum, og eg haldi, at tað sær heilt hampuligt út hjá okkum. Men vit hava kanska ikki tann størsta og breiðasta hópin, so fyri okkum hevur tað nógv at siga, at vit koma væl frá byrjan. Tað sigur venjarin hjá NSÍ, Trygvi Mortensen, sum aftur er komin at sita í venjara­sessinum í Runavík, eftir at hann hevur havt mestsum fullan steðg frá fótbólts­ venjing, síðani hann gavst sum hjálparvenjari hjá Víkingi í 2010. – Tað er gott at vera í gongd aftur, og hetta er nakað heilt nakað annað, tí umstøðurnar kring fótbótin eru á hægri stigi enn í 2005, tá eg var har síðst, sigur Trygvi, sum tó eisini hjálpti eitt lítið sindur til í fjør við málmansvenjing, men heldur ikki meira enn tað. – At eg bleiv spurdur, um eg vildi vera venjari hjá NSÍ í ár, kom nokk so knappliga á, og eg hevði ikki hugsað um tað áðrenn. Men mær dámar væl at venja og at vera við til at menna spælarar og síggja teir gera framstig, so tá avtornaði, fall valið nokk so lætt. Við sína lið hevur Trygvi Mortensen ein annan garvaðan NSÍ-ara, Helga L. Petersen, sum hjálparvenjara, og hóast teir kanska ikki sum spælarar hava mint so nógv um hvønnannan, er tað sama fótbóltsfilosofi, ið gongur aftur hjá báðum. – Vit líkjast ikki, men hava allíkavæl nógv til felags. Tá vit til dømis skulu seta eitt lið, so hevur tað longu víst seg, at tað ofta verða mestsum teir somu fyrstu ellivu, sum vit raka. Men tað kann kanska eisini siga nakað um, at hópurin ikki er so øgiliga breiður, sigur Trygvi. – Tað verður soleiðis, at eg havi allar avgerðirnar, men vit tosa øgiliga nógv saman um, hvat vit skulu gera og hvussu vit gera tað. Helgi er ein øgiliga góður sparrings­ partnari, og eisini er hann eitt gott bindilið millum meg og spælararnar. Hann er aktivur og ikki bara ein, sum skal flyta keylur. Ungir og royndir Liðið, sum NSÍ hevur nú, er ikki serliga gamalt, tí tað eru bara Sjúrður Jacobsen og Jónhard Frederiksberg, sum eru yvir 30 ár. Men hóast hinir eru yngri, eru eisini fleiri royndir spælarar, so sum Einar Tróndargjógv, Jann Martin Mortensen, Andy Olsen, Magnus H. Olsen og aðrir, og nú er eisini Jústinus R. Hansen kom aftrat. – Vit hava nógvar við royndum, men teir eru bara ikki so gamlir, men hetta er gott fólk, og eg haldi, at talan er um eina góða blanding. Júst nú hava vit eisini ein sera homogenan hóp, har eingin skarar burturúr, uttan kanska Klæmint, so klára vit okkum uttan skaðar og karantenur, so kann alt henda, sigur venjarin við Løkin. Hóast NSÍ til tað síðsta var við í kappingini um heiðursmerki og europeiskan fótbólt í fjør, so verður ikki dult í felagnum, at talan framvegis er um at byggja eitt nýtt lið upp, og tann hugburðin hevur Trygvi eisini. – Vit hyggja eitt sindur longur fram, tí nógvir góðir árgangir eru á veg hjá okkum, bæði U16 og U14, so tí menna vit og byggja upp, sum felagið hevur gjørt tað síðstu tvey kappingarárini, sigur Trygvi. – Vit meta ikki í løtuni, at vit vilja brúka pengar uppá at keypa spælarar uttanífrá, men vilja heldur brúka tíð og pengar uppá at menna okkara egna fólk. Spurdur, hvat hann væntar sær av komandi landskappingini, heldur Trygvi Mortensen, at illa ber til at koma uttan um HB, sum verður drúgt, men at hann annars væntar, at tað helst verður øgiliga tætt millum hini. – Tað er ikki komið fyri tey nógvu síðstu árini, at báðir uppflytararnir eru fluttir niður, so nógv av liðunum kunnu skjótt kenna eitt trýst á sær. Men tað verður bæði tætt og hart, og fyri øll ræður um at byrja væl, sigur NSÍ-venjarin. Framvegis uppbygging