týsdagur 15. juli 2014síða 14

Mikudagur 16. juli 2014 · Nr. 80 14 Sosialurin Hugskot og viðmerkingar – send sms til 225000 Góði Birgir, bróður og starvsfelagi! Hetta vóru skelkandi tíðindi, eg fekk frá Conny systir, tá hon ringdi til mín fyri at siga okkum frá, at tað var Birgir, sum doyði í syndarligu vanlukkuni í tunnlinum. Vit høvdu frætt áðr­enn, at ein súkklistur var yv­ir­koyrdur og var deyður, men tað kom mær ikki í huga, at tað var Birgir. Vit báðir hava koyrt havn­ar­ gøt­urnar upp og niður í skjótt 35 ár. Tú byrjaði í ´79 ella ´80 at koyra frá Mini Taxi, sum helt til í J. Broncksgøtu hjá Arnhold Øster. Eg byrjaði tann dagin, eg fylti 22 í nov. í ´81. Tað var tú, sum vildi, at eg eisini kom at koyra. Eg mátti bera skjótt at, tí 1. desember í ´81 legði Mini Taxi saman við Bil í Gundadali. Tú hevði tosað við nevnd­ina í Mini Taxi, og tað var góð­kent. Dagin eftir hevði tú tos­að við bilasøluna hjá Vilhelm Niel­sen, har tú hevði keypt nýggjan bil, um eg kundi keypa tín gamla bil. So vart tú uttan fyri 14. Sept­emb­er, har eg starvaðist, fyri at vísa mær bilin og avtaluna um prís. Soleiðis byrjaði eg saman við tær í Mini Taxi, og síðani fluttu vit til Bil at koyra. Í 1988 søkti tú um at koyra í Auto, og árið eftir byrj­aði eg eisini í Auto. Har hava vit koyrt síðani. Ta fyrstu tíðina í Auto koyrdu fleiri av teimum gomlu, sum høvdu stovnað Auto í 1952, og aðrir. Teir vóru góðir við okkum, tað merktu vit. Tað komst av, at pápi okkara eisini koyrdi í Auto, men doyði einans 46 ára gamal lítla jólaaftan í 1974. Teir flestu eru farnir, og hava vit fylgt teim­um øllum til teirra síðsta hvíld­arstað. Góði Birgir, tað er umleið eitt ár síðani, at tað bleiv staðfest, at tú hevði alzheimer. Nakað væl áðr­ enn tað, byrjaði tú at ringja til mín at spyrja um adressur, sum støðin hevði sent teg. At byrja við hugs­aði eg ikki um tað, tí tað kann standa fast hjá øllum við hvørt. Tú dugdi øðiliga væl at goyma, at tú hevði trupulleikar, tá eg segði, hvar tað var, tú skuldi, so svaraði tú: "oyðs ja, tað var har, eg helt tað vera" ella segði tú "at tú ikki fann ella mintist til adressuna, tí tú akkurát var vaknaður". Eisini hoyrdi eg í sendaranum, at tú í heilum spurdi støðina, hvar tað var, tú var sendur. Tað virkaði sum ein lætti hjá tær, tá tú gavst og slapp undan at hugsa um adr­ess­ur. Góði Birgir, tú tók sjúkuna til tín og vildi liva tað, sum tú hevði eftir við gleði. Tú væntaði sjálvur ikki at liva í nógv ár, men tað, sum tú hevði eftir, skuldi verða við gleði. Tú kom fleiri ferðir inn til Heimið í Vallalíð. Har sita fleiri hugtung, men tað var 1-2-3, so hevði tú tosað við fleiri av teimum um at vera glað og njóta hvønn dag. Tað hjálpti. Tey vóru so glað hvørja ferð, tú kom har. Starvsfólkini skulu hava stóra tøkk fyri tað, tey gjørdu fyri Birgir. Ein túrur til Barcelona er fyrireikaður í september fyri bú­ fólk á Heiminum. Tey høvdu lov­að Birgir við, tað gleddi hann seg til. 8. desember hevði Birgir fylt 60 ár. Tá ætlaði hann at halda stóran føð­ingardag. Hann hevði longu bjóð­að nógvum. Kvøldið fyri sum tú doyði, kom tú súkklandi fram við hjá okkum. Tórfríða, Jasp­ ur og Bjarni stóðu uttanfyri. Tit stóðu leingi og prátaðu, og tú gjørdi Bjarna og Jaspur greitt, at teir skuldu koma í føðingardag, ella komst tú eftir teimum. Teir lesa uttanlands og høvdu ikki sæð teg síðani á jólum. Eg kom stutt aftaná. Vit prátaðu eina góða løtu. At tað skuldi verða fyri seinastu ferð, vardi okkum ikki. Hvíl í friði kæri bróðir og starvsfelagi Kári Góði elskaði Súni. 14. juli 1961 var ein gleðisdagur fyri pápa tín og meg. Tá fingu vit okkara næsta son, stórur og væl skaptur. Alt var so lukkuligt, tit vóru so góðir beiggjar, Hanus og tú. Í ´65 kom systurin Ingrid. Hana vóru tit so góðir við, vildu verja hana, tá tit vóru úti og spældu. Ja lítið vistu vit, at í august 2012 fekst tú staðfest krabbamein í heilanum. Tú bleiv skurðvigjørdur tríggjar ferðir, og 11. februar í ár vart tú ikki millum okkum longur. Aftan á aðru viðgerð ringdi tú og segði við meg: Mamma, Jesus vil hava meg heim nú. Hví sigur tú so góði? Jú, læknanir kunnu ikki hjálpa mær meira. Tú komst aftur til Føroyar, men skjótt komu boðini, at tú skuldi koma niður aftur. Teir vildu geva tær enn eina skurðviðgerð. Hóast hesa álvarsligu sjúku, vart tú so glaður og altíð við gott mót, sum tú hevði alla sjúkraleðuna. Tú vildi uppliva so nógv, at blíva abbi aftur og halda jól saman við øllum tínum kæru. Hetta eyðnaðist tær, men seinasta skurðviðgerðin eyðnaðist ikki væl. Tú bleivst lammaður í høgru síðu og fekk ikki tosað meira. Tað sást týðuliga, hvussu skuffaður, tú bleiv. Tú hevði allatíðina sagt, at tú ikki vildi skurðviðgerast, um tú bleivst lammaður. Eftir seinastu skurðviðgerðina orkaði tú ikki meira, og lívið svann spakuliga burtur. Í dag, 14. juli, sita vit bæði í Danmark uttan teg, góði sonur. Nógvir tankar og minnir koma fram á hesum degi. Altíð vart tú so heimkærur. Sjálvt um tú vart nógv burtur, gleddi tú teg altíð at koma heim aftur til okkum og tíni kæru børn, Katrin, Mariannu, Beinir og Brandur og tíni elskaðu fýra abbabørn. Tú vart eisini so glaður og stoltur, tá ið Katrin fortaldi tær, at hon ætlaði at kalla dóttrina upp eftir tær, Olivia Súsanna. Vit eru sera takksom fyri, at tú hevði Hanus her í Slagelse, og at hann kundi vera so nógv hjá tær, eisini á sjúklingahotellinum. Tað vart tú sera glaður fyri, eisini at Ingrid kom niður við tær seinastu ferðina, tú bleivst skurðviðgjørdur, og at tú hevði dóttrina Katrin, sum býr í Keypmannahavn, og var hjá, tá hon kundi. Tað var so gott, at tit syskini kundu vera saman. Lættur vart tú av lyndi, og lætt hevði tú til láturs, og tað var altíð okkurt skemt, ið kom frá tær. Nú er láturin tagnaður, og eftir stendur saknurin so ómetaliga stórur, men minnini goyma vit í hjørtum okkara. Hvil í friði kæri sonur. Randers 14.07.2014 Mamma og Pápi Nøvn Minningarorð um Birgir Enghamar! Minningarorð um okkara elskaða son Súna Poulsen