hósdagur 11. desember 2014síða 20

Fríggjadagur 12. desember 2014 · Nr. 142 20 Sosialurin Hugskot og viðmerkingar – send sms til 225000 Tað er tú, sum tekur endaliga avgerð um tína útbúgving, men nú kanst tú fáa svar upp á spurningar um lestur her í Sosialinum. Holger Arnbjerg, sum starvast á Altjóða Skrivstovuni við Fróðskaparsetur Føroya, og Bjørg Róin, lærari á Føroya Studentaskúla í Hoydølum, vegleiða teg um tínar møguleikar innan útbúgving og um tey fíggjarligu viðurskiftini. Holger og Bjørg arbeiða dagliga við at vegleiða fólki, sum ætla sær undir útbúgving í Føroyum ella uttanlands, antin tað er styttri ella longri útbúgving, verklig ella ástøðilig. Tú kanst senda spurningar um útbúgvingar til post@sosialurin. fo, og so svara Holger og Bjørg tær her í Sosialinum. SPURNARSÍÐAN Spyr og fá svar um útbúgvingar. Allar. Allastaðni. SPURNINGAR OG SVAR Spurningur 1 Hvussu tíðliga skal mann byrja at fyrireika seg til hægri lestur uttanfyri kongaríkið? Vinaliga Hanna Góða Hanna, Tað er týdningarmikið at kanna umstøðurnar í góðari tíð, tá mann skal søkja inn á útbúgvingar uttanfyri kongaríkið. Á http://setur.fo/ask/ vegleiding/umsoknarfreistir/ ber til at síggja umsóknarfreistir til hægri útbúgvingar í fleiri londum. Fyri at binda um heilan fingur, plaga vit vanliga at siga, at mann skal byrja at kanna viðurskiftini eitt ár fyri lestrarbyrjan. Í summum londum og á summum hægri lærustovnum, skal mann søkja um upptøku 10-12 mánaðir fyri lestrarbyrjan. Tað er týdningarmikið, at finna út av, nær ymsu útbúgvingarnar havi umsóknarfreist. Síðani skal mann tryggja sær, at mann lýkur upptøkukrøvini. Um mann ikki ger tað, má mann syrgja fyri at supplera ella taka eina málroynd; alt eftir hvat krevst. T.d. kanst tú fara til enska málroynd tvær ferð um árið í Føroyum. Sum danskir ríkisborgarar hava vit rætt til at fáa SU við til lond uttanfyri kongaríkið í 4 ár og síðani ÚS frá Studna í upp til 2 ár – við tí treyt, at útbúgvingin er góðkend av SU-styrelsen. Nakrar útbúgvingar eru longu góðkendar og eru tískil á Fast Track listanum hjá SU. Annars skal mann sjálv/ ur søkja um at fáa útbúgvingina SU-góðkenda og tað kann taka fleiri mánaðir, eftir at SU hevur móttikið neyðugu pappírini. Tað er ikki neyðugt at vera upptikin á eini útbúgving, fyri at kunna søkja um SU-góðkenning. Søk um at fáa útlendsku útbúgvingina góðkenda so tíðliga sum gjørligt – í minsta lagi eitt hálvt ár fyri lestrarbyrjan, fyri at tryggja tær, at alt er í lagi, áðrenn tú byrjar. SU-góðkenningin er neyðug, fyri at kunna fáa SU til livikostnaðin og ÚSUN frá Studna til skúlagjøld/tuition fees, um lærustovnurin krevur slík. Tú sært eitt meiri nágreint yvirlit yvir mannagongdina á hesum leinkinum hjá Altjóða Skrivstovuni: http://setur.fo/ask/ vegleiding/rad-og-mannagongdir Um tú hevur fleiri spurningar, kanst tú altíð seta teg í samband við Altjóða Skrivstovuna á ask@ setur.fo Vinarliga Bjørg og Holger Spurningur 2 Ber tað til at taka HF uppá meira enn 2 ár? Eg ynski at fara í holt við at taka eitt HF-prógv, sum eg má hava fyri at sleppa at læra til tað, sum eg havi havt hug til í fleiri ár. Eg eri einsamøll mamma við trimum børnum og eri bangin fyri, at tað verður ov strævið há mær at vera fulltíðarlesandi og taka HF uppá 2 ár. Mín spurningur er: Ber tað til at søkja inn á HF og ynskja at taka prógvið uppá 3 – 4 ár? Og kann eg fáa studning, um eg gangi á HF í meira enn 2 ár? Vinaliga xxx Góða xxx Tað ber væl til at taka eitt HF- prógv uppá meira enn 2 ár. Um tú ikki ynskir at vera fulltíðarlesandi (2 ár), so skalt tú, tá tú søkir, gera vart við, at tú ynskir at taka eitt heilt HF-prógv, men sum stakgreinalesandi. Ynskir tú hetta, skalt tú seta teg í samband við ein lestrarvegleiðara á tí skúlanum, har tú ynskir at ganga, so tit saman kunnu leggja eitt “skema”, soleiðis at tú aftaná 3-4 ár fært eitt heilt HF-prógv. Freistin at søkja verður ásett av Mentamálaráðnum og er vanliga 15. mars. Søkir tú tá og gert vart við, at tú ynskir at vera stakgreinalesandi, og tú verður upptikin, ert tú tryggjað pláss á holdum í 3-4 ár. Annars kunnu stakgreinalesandi søkja heilt til skúlarnir byrja aftur aftaná summarfrítíðina, men umsøkjarar kunnu tá bert sleppa inn, um pláss eru eftir. Viðvíkjandi studningi: Treytin fyri at fáa ÚS (útbúgvingarstuðul) er, at tú sum uppihaldari hevur minst 16 undirvísingartímar um vikuna (ikki-uppihaldarar skulu hava minst 20 tímar um vikuna). Vinarliga Holger og Bjørg JOBMATCH 2014 TÝSDAGIN 30. DESEMBER Í NORÐURLANDAHÚSINUM Aftur í ár verður starvsstevnan, Jobmatch, hildin millum jóla og nýggjárs. Soleiðis at bæði útisetar, sum eru heima í jólafrí, eins og lesandi í Føroyum fáa møguleika at luttaka. Fyri at fáa pláss fyri enn fleiri fyritøkum, stovnum og kommunum verður Jobmatch í ár flutt niðan í hølini í Norðurlandahúsinum. Luttakandi fyritøkur, stovnar og kommunur hitta studentar frá kl. 13.00 til kl. 20.00 henda dag. Føroyska samfelagið og vinnan hava altíð tørv á dugnaligari arbeiðsmegi. Staðfestast kann, at hørð kapping er um henda málbólk. Útlendskar fyritøkur seta seg javnan í samband við tey lesandi. Tí er umráðandi, at føroyski arbeiðsmarknaðurin við jøvnum millumbilum eisini býður seg fram í hesi kapping. Jobmatch er eitt afturvendandi tiltak, sum hevur verið í 2008, 2010, 2011, 2012, 2013 og verður nú aftur í 2014. Í 2008 varð tiltakið hildið á Norðurbryggjuni í Keypmannahavn og í 2010 í Føroyahúsinum á Vesturbrúgv, sum eisini er í Keypmannahavn. Fyri at røkka enn fleiri lesandi, tók Tórshavnar kommuna saman við Vinnuhúsinum, Altjóða Skrivstovuni og Meginfelag Føroyskra Studenta stig til at fyriskipa Jobmatch í Føroyum á jólum 2011. Hetta fyri ikki bert at røkka okkara vitanartilfeingi úr Danmark, men eisini Føroyum, hinum Norðurlondunum, Onglandi og øðrum londum við. Hesin leistur varð somuleiðis fylgdur í 2012 og 2013 Endamál Endamálið við Jobmatch er at skapa og viðlíkahalda sambandi millum føroyskar fyritøkur og stovnar, útisetar og lesandi føroyingar. Hetta verður gjørt, fyri at tryggja framhaldandi vøkstur og menning av tí føroyska samfelagnum. Ætlanin er, at hetta millum annað skal gerast við at 'matcha' tann tørv, ið fyritøkurnar og stovnarnir hava við tann førleika okkara vitanartilfeingi hevur. Hugskotið er tískil at skipa fyri eini starvsstevnu, har føroyskar fyritøkur og stovnar hava møguleika at marknaðarføra seg. Somuleiðis er endamálið at skapa áhuga millum útisetar fyri at søkja størv, starvsvenjingarpláss ella velja uppgávuevni til verkætlan- arskriving hjá hesum fyritøkum og stovnum. Bílegg eitt JobPrát Frammanundan Jobmatch, hevur tú møguleikan at bíleggja eitt JobPrát við eina ella fleiri av fyritøkunum og stovnunum, sum luttaka á Jobmatch. Eitt JobPrát er ein óbindandi styttri samrøða (10-15 min), har tú fært høvi at kunna teg um møguleikar og at greiða frá tær sjálvari ella sjálvum.