týsdagur 24. februar 2015síða 38

6 fótbóltur 2015 Fótbóltsblaðið hjá miðlahúsinum Eina stjørnu fyri hvørt meistaraheiti. Tað er treytin fyri at hvørja stjørnu, sum er tatoverað á arminum á Jákupi á Borg. Tá hann av fyrsta tíð fekk sær tatoveringina vóru fimm stjørnur. Ein í miðjuni, og so tvær á hvørjari síðu Eftir meistaraheitið í fjør kom sætta stjørnan á armin. Men nú er slagsíða á tatoveringini, tí tríggjar stjørnur eru øðrumegin, meðan tvær eru hinumegin. – Tatoveringin er ikki liðug enn. Eg má hava eina stjørnu afturat, sigur Jákup á Borg, sum í fjør átti stóran lut í meistaraheitinum hjá B36. B36 hevur aldrin megnað at endurvunnið eitt meistarheiti í søgu felagsins. Størsta avbjóðingin hjá B36 er nú, at halda hópin svangan tvey ár upp í slag. Tað ásannar Jákup á Borg, liðskipari og hjálparvenjari hjá B36. Í fjør vann B36 heldur óvæntað meistaraheitið. Í ár er støðan ein onnur og trýst er á FM vinn­ar­unum. – Tað er nógv torførari at endurvinna meisatarheitið, enn at vinna tað fyrstu ferð. Tað er tað ongin ivi um, sigur Jákup á Borg. Nýggjur maður við róðrið Sámal Erik Hentze valdi eftir kappingarenda at leggja frá sær, hóast hann hevði sáttmála fyri 2015. Í hansara stað er komin Eyðun Klakstein. – Kanska er tað gott, at vit nú fáa ein venj­ara, sum ikki hevur vunnið FM. Skil meg rætt, Sámal Erik er ein framúr venjari, men nú hava vit ein venjara, sum ikki var við í fjør. Hann sær tingini øðrvísi enn vit, sum vóru við, sigur Jákup á Borg. Hópurin er líkur tí, sum vann FM. Adeshina Lawal er farin til ÍF, meðan Klæmint Matras er givin. Í teirra stað eru komnir Hans Pauli Samuelsen, Ibrahima Camara og Jónas Tór Næs. Kanska seinastu ferð Jákup er nú blivin 35 ár. Fyri nøkrum árum síðani takkaði hann fyri seg á landsliðnum. Skaðar gjørdu um seg, men árini eftir spældi hann næstan sum ein unglingi fyri B36. Jákup klárar ikki longur at spæla allar minuttirnar í einum kappingarári, men hann hevur ilt við at ímynda sær, at spæla minni og halda á í fleiri ár. – Í løtuni havi eg ilt við at síggja meg spæla aðru violin á einum liði. Kanska tað broytist í summar. Tað hevði verið stutligt, um ein sum Benjamin Heinesen vann plássið frá mær. So hevði eg kanska havt lættari við at fingið ein annan leiklut sum hjálparvenjari, ella okkurt annað starv kring hópin, sigur Jákup, ið er trý mál frá at yvirhála John Petersen, sum mest skor­andi spælarin í bestu føroysku deildin. – Eg meini tað tá eg sigi, at eg ikki hugsi um hatta metið. Eg spæli fegin bóltin til onkran annan, um tað er betri fyri liðið. Tað hevði sikkut verið stuttligt at reypa um eina ferð, men um eitt hálvt ár hevur Arnbjørn Hansen tikið metið, sigur Jákup, sum at enda sigur orðini, ið B36 viðhaldsfólkini ikki vilja hoyra. – Hetta kann gott verða mítt seinasta kappingarár, men kanska tann støðan broytist við tíðini, sigur Jákup á Borg. Tatoveringin er ikki liðug enn  Lyklaspælarin Lukasz Cieslewicz Hann er saman við Róaldi Jakobsen bindiliðið á B36 liðnum. Teknikkurin og evnini at venda spælinum gera, at hann er týdningarmiklasti spælarin á seinasta triðinginum. Hann avrikar í avgerandi dystunum og eigur mangan ein fót í málunum hjá B36.  Gjøgnumbrotið Andrias H. Eriksen Andrias hevur staðið eitt sindur í skugganum av Hørði Askham og Robert Heðini Brockie farnu árini, men 21 ára gamli verjuspælarin vísti í fjør, at hann kann blíva tann komandi stóri spælarin í B36. Hann er væl fyri kropsliga og seriøsur í sínum tilgangi til fótbólt.  Venjarin Eyðun Klakstein Eyðun hevur átikið sær eina torføra uppgávu. Hann hevur nakað hann skal prógva, eftir at projektið hjá honum í Klaksvík partvís miseydnaðist. Eyðun kemur nú til eitt nýtt umhvørvi, og fær møguleikan at seta sítt egna fingramerki á liðið.  Málið Evropa B36 hevur hópin at vinna FM, men havandi í huga søguligu hagtølini, so tykist luttøka í Evropa verða eitt nøktandi úrslit. Hinvegin hevur B36 útspælt sín leiklut í steypakappingini ov tíðliga farnu árini. Tað skal rættast uppá í ár. Jákup á Borg Tatoveringin er ikki liðug enn. Eg má hava eina stjørnu afturat!