mikudagur 24. juni 2015síða 40

SOSIALURIN oyggjaleikir 16 1939 27. juni - 3. juli 2015 Borðtennis við nýggjum venjara Tað er ilt at nevna føroyskt borðtennis uttan at nevna Peter H. Niclasen. Nú hevur 16-faldaði føroyameistarin tikið við sum landsliðsvenjari, og málið hjá honum er púra greitt: – Málið er altíð at vinna heiðursmerki, og er tað eisini í ár, sigur hann Borðtennis var ikki við á seinastu oyggjaleikunum á Bermuda, og er hetta tískil fyrstu ferð í fýra ár, at føroyska landsliðið í borðtennis luttekur á oyggjaleikunum. Seinast gekk rímiliga væl. Hóast tað var eitt vónbrot, at spælararnir við battunum mistu heiðursmerki í liðkappingini á stokkinum, so kundu tey í hópinum fegnast um, at tað á kvinnu­síðuni eydnaðist at fáa fyrsta heiðursmerki nakrantíð. Tað vóru tær báðar Henrietta Nielsen og Rakul Mikkjalsdóttir, sum vunnu bronsu í tví­ mans­leiki. Broytingar Nakrar broytingar eru farnar fram í hópinum hesaferð í mun til seinastu oyggjaleikir. Tríggir av teimum fýra spælarunum á manssíðuni eru teir somu, nevniliga Fróði F. Jensen, Pætur Albinus og Hallur Thorsteinsson. Ragnar Egilsson spælir ikki borðtennis longur, og er 14 ára gamla stórtalentið, Hanus Sørensen, komin í hansara stað. Tríggjar kvinnur eru við hesaferð. Tær eru Henrietta Nielsen, Durita F. Jensen og Anna Mikkjalsdóttir. Henrietta spælir í Týsklandi, Durita er føroyameistari og Anna er lítlasystir Rakul Mikkjalsdóttir, sum ikki spælir longur. Nýggjur venjari Eisini á venjarabonkinum er ein broyting farin fram. Svenski Jan Berner, sum hevur verið lands­ liðsvenjari seinastu fimm árini, er ikki longur venjari. Í hansara stað er legendan Peter H. Niclasen komin. Peter hevur verið við á øllum oyggja­leikum síðani 1989, men leikluturin sum lands­venjari er nýggjur. – Eg havi leingi virkað sum venjari í felagnum Tór í Havn, men eg má ásanna, at leikluturin sum landsliðsvenjari er væl meiri umfatandi. Umframt at hava ábyrgd av tí ítróttarliga, hevur tú ein meir savnandi og fyriskipanarligan leiklut. Tú skalt eisini hava í huga, at leikararnir kenna seg væl, sam­stundis sum tú skalt hava eina professionella frá­støðu, soleiðis at tú varðveitir ein autoritet, sigur Peter um nýggja leiklutin og leggur afturat: – Ein væl tugd kliché er, at tað er nógv verri at sita uttanfyri, og so er. Tú fært einki gjørt, men hevur allar loysnirnar. Støðið hækkar Peter hevur, sum nevnt, verið við á oyggjaleikum so at siga øll árini. Hann heldur, at støðið er hækkandi. – Eg havi verið við í oyggaleikahøpi síðan 1989 – sum leikari, sum hjálparvenjari og nú sum venjari. Eg má siga, at støðið ár undan ári hevur verið hækkandi. Talið av oyggjum, ið taka lut, hevur ligið støðugt um 12-14 oyggjar. Harímillum hava kanaloyggjarnar Guernsey, Jersey og Isle of Wight tikið lut á øllum leikunum, og hava hesar oyggjar kappingarmøguleika bæði á bretska og franska meginlandinum. Áland og Gotland hava sjálvandi somu møguleikar í Svøríki. Altso kappingarmøguleikar í stórum borð­tennis­umhvørvum. Hesar oyggjar hava altíð fingið góð úrslit, greiðir Peter frá. Vilja heiðursmerki Nýggi landsliðsvenjarin er avgjørdur, tá ið hann verður spurdur um, hvat málið verður á Jersey. – Málið er altíð at vinna heiðursmerki, og er tað eisini í ár, sigur hann. Tó viðgongur hann, at tað als ikki verður lætt. – Kappingin er hørð, og vit mugu sjálvandi hava veruleikakend mál. Tey havi eg sjálvandi í høvdinum, men samanumtikið er tað at vinna heiðurs­merki, sigur hann og heldur fram: – Eg meti avgjørt, at møguleikarnir eru har. Borðtennishópurin er samansettur av royndum leikarum, ið hava verið í mongum kappingum uttanlands, eins og vit hava ungar leikarar við, ið eru við fyri fyrstu ferð. Teirra mál er sjálvandi at royna oyggjaleikir og vinna sær royndir, ið kunnu bera teir til sigur í framtíðini, sigur Peter H. Niclasen at enda. Borðtennis Menn: Pætur Albinus Fróði F. Jensen Hallur Thorsteinsson Hanus Sørensen Kvinnur: Henrietta Nielsen Durita F. Jensen Anna Mikkjalsdóttir