týsdagur 30. juni 2015síða 4

Mikudagur 1. juli 2015 · Nr. 74 4 Sosialurin Hugskot og viðmerkingar – send sms til 225000 Tað er ein heilt serlig samanrenning av gamlari og nýggjari mentan, vit kunnu uppliva um vikuskiftið. At Kirkjubøur, sum eitt av mest søguríku plássum í Tórshavnar kommunu, kann vera karmur um nakað av tí besta av føroyskum tónleiki í nýggjari tíð, er í sjálvum sær einastandandi. Her ber til at fara eftir gomlum gøtum og uppliva ein tíðarlumma í føroyskari mentan. Og nú boðið verður til tónleika- og mentanarfestival í náttúruvakra og søguliga umhvørvinum í Kirkjubø, so verður Kirkjubøur – sum fyrireikararnir siga – enn einaferð Føroya mentanarmiðdepil! Kirkjubøur er ein aldargamal mentanarligur depil, vit øll vilja hjúkla um. Persónliga hevur mær altíð dámt at koma heim til Kirkjubøar við mong høvi, veri tað seg til fremmandar vitjanar ella til høgtíðir. Hátíðarligi hugnin er altíð tann sami, men serliga hevur mær dámt at vitja um jóltíðir. Men nú er so eitt nýtt høvi. Tíðirnar eru nógv broyttar, men enn standa Múrurin, Ólavskirkjan og Roykstovan. Og Kirkjubøur er framvegis tann mentanarligi depilin í okkara kommunu, sum flestu ferðafólk vitja. Skjótt verða fornminnini her kanska skrásett sum mentanarligur heimsarvur, ið skal hava serliga vernd, og tá kemur bygdin til heiður og æru um allan heim! Hesar tríggjar dagarnar fara vit at hoyra og síggja nakað av tí besta, sum føroysk mentan og føroyskt tónleikalív hevur at bjóða. Hetta er tað heilt serstaka við hesum festivalinum, at alt er føroyskt, og at vit ikki bara tosa um tónleik, men at høvið eisini verður hjá øllum at royna tað besta av føroyskum vørum, mati og mentan. Meira føroyskt verður tað ikki. Og tí kanska tað hóskar serliga væl til umhvørvið. Og eisini er tað sera stuttligt, at vit kunnu fáa heilt serlig upplivilsi – sum t.d. at hoyra sumbingar kvøða inni í Kirkjubømúrinum. Skráin er umfatandi og spennandi. Og hvørt einasta navn slær fast, at hetta verður føroyski festivalurin burturav! Eg fari sum borgarstjóri at ynskja tykkum allarbestu eydnu við øllum tiltakinum. Vit síggjast í Kirkjubø! Heðin Mortensen, borgarstjóri Vælkomin á festival í Kirkjubø! torshavn.fo Vit eru við Múrin!