týsdagur 30. juni 2015síða 16

Mikudagur 1. juli 2015 · Nr. 74 16 Sosialurin Hugskot og viðmerkingar – send sms til 225000 nøvn Gamli vatnmeistarin í Tórshavnar Kommunu Janus Sørensen fylti 80 ár 17. juni. Janus sum í veruleikanum er doypt­ur Jens Sigmund, flutti til Havn­ar sum ungur. Hann er føddur í Trongis­vági, har hann av summum bleiv kallaður Lítli Janus, tí pápin var Janus hjá postmanninum, ella Janus á post­bátinum. Mamman æt Sigrid Sørensen, doypt Lindberg. Ikki langt eftir konfirmatiónina flutti hann til Havnar at læra til rør- og blikksmið á Rør- og sanitet. Janus arbeiddi nøkur ár hjá Mariu Poul­sen P/F. Tá ið stórarbeiði við at leggja vatnleiðing í millum Havnardal og Havnina var hann útleigaður til Tórshavnar Kommu­ nu, og har bleiv hann verandi. Í 1972 varð hann settur sum vatnmeistari í Tórs­havnar Kommunu. Hetta hava ver­ið mennandi ár innan vatn í Føroyum. Tórshavn er nógv vaksin, og krøv til betri vatn hava alsamt voks­ið sum matvøruframleiðsla og annað hevur mentst her á landi. Í 2004 fór Janus frá sum vatn­ meistari vegna aldur, men var knýtt­ur at vatnverkinum ½ tíð fram til 2007. Vit kenna Janus sum tað ey­ kenni­ligu myndina av Harmoni­ orkestri­num GHM, har hann spældi helikon, hendan bassin sum snúði seg um kroppin og var so ey­ kenni­lig­ur í Havnar gøtum. Í heilig 49 ár var hann virkin í orkestrinum, og er óiva tann sum hevur spælt longst í GHM nakrantíð. Summi kenna hann frá Old­ boysliðinum hjá Havnar fimleikara­ felag, svimjihylinum ella gangandi ein tú í náttúruni. Janus hevði seks systkin, og búðu tveir aðrir beiggar í Havnini, Hans og Amandus, teir eru ikki í mill­um okkara longur. Teir áttu bát í felag og vóru í sannan forstand mikl­ir innløgumenn, skutu harur, veiddu fugl, vóru í grind og á floti. Ofta síggja vit Janus ganga oman til bátin í Vágsbotni við snellunum. Janus helt dagin saman við konu­ni Michaelu og børnum í Mallorca. Tey eiga fýra børn, Jan Sørensen (lívfrøðingur og stjóri á Biofar), Majken Sørensen (sjúkra­ systur og búsitandi í Fraklandi), Leif Sørensen (kokkur), og Anni Joen­sen (kontórkvinna hjá Løg­ tingi­num). Abbabørnini hjá Janus eru 12 og langabba børnini eru 2. Tú møtur altíð Janus heilsandi og smílandi, hann virðist bæði birg­ ur, stinnur og glaður. Ynskt verður honum alt gott í framtíðini, og tillukku við teimum 80. Janus Sørensen 80 ár Hósdagin, 2. juli, fyllir Óli bróðir, Óli hjá Hilmu úr Fuglafirði, 70 ár. Foreldur okkara vóru Hilma, sum var ættað úr Leirvík, og Mein­hard Jacobsen, skipari úr Fuglafirði. Vit vóru 5 systkin, og Óli er nr. 4 í røðini. Hann er føddur 2. juli 1945, beint eftir krígslok, og vaks upp saman við okkum systkjunum í ein­um góðum og tryggum heimi. Óli hevur altíð verið nakað ser­ ligt, og heilt frá smádreingi av var hann ein bygdarmynd, sum allir fugl­firð­ingar kendu. Vit minnast, hvussu væl hann kendi skip, ja, hvørt einasta skip í Føroyum, og á sama hátt nummarpláturnar á øll­um bilum. Og tá tað kemur til skip, so var Gull­drangur, FD 12, nakað heilt ser­ligt fyri Óla. Tá ið Gulldrangur kom undan Enni, kom ordiligt lív í Óla, og so fór hann rennandi norð á kajina, rópandi: “Gulldrangur, høy!” Og tað var einki undarligt í, at hann var spentur, tí pápi var um­borð á Gulldrangi – hann førdi jú Gulldrang í heili 15 ár, frá 1947- 1962, øll barnaárini hjá Óla. Fyrstu ferð, vit vóru saman um­ borð á skipi, var í 1961, tá ið eg var við Ólavi Halga. Óli kom tá ein túr niður til Grimsby við okkum at selja. Tað var eitt stórt upplivilsi fyri hann. Í 1962 fór Óli til Danmarkar og var niðri í fimm ár. Óli var orð­ blind­ur og gekk í skúla í Nakskov, og har fekk hann sera góða hjálp. Eg var fleiri ferðir og vitjaði hann hesa tíð­ina, og tað var stuttligt at síggja, hvussu hann mentist har. Í 1970 var Óli við Gulldrangi, og tá vóru Jákup Egholm og Jákup Pet­ur Jacobsen skiparar, ávikavist við snellu og við línu eftir svart­ kalva. Í 1972 kom Óli við Peter Most úr Svend­borg, sum eg var skipari á. Har umborð var hann í 7 mánaðir sum ungmaður. Óli var ikki so sterk­ur likamliga, men hann var altíð framúr ágrýtin og trúfastur – ja, sanniliga ein álitismaður í øllum lut­um. Eftir tað arbeiddi Óli á flakavirki. Hann mundi vera á Handils- og Frysti­virkinum í Fuglafirði eini 10-12 ár, har hann arbeiddi saman við so mongum fuglfirðingum. Ein dagin kom Jákup Oluf á Lakju­ni, sum var góði vinur pápa og granni okkara, og spurdi Óla, um hann ikki kundi koma við einum av Cuba-trolarunum. Óli bleiv sera spent­ur og játtaði beinanvegin. Og tað bleiv so ikki bara hesin eini túr­ur­in! Nei, í heili 15 ár var Óli við Cuba­trolarunum – einamest við Skúg­vi. So har treivst hann so sera væl umborð, og hevur hann javnan eitt gott prát við fleiri teirra, hann sigldi saman við. Í 1998 flutti Óli til Havnar at búgva, og hevur hann nú í 17 ár búð hjá systurdóttur okkara, Hildigunn, og manni hennara, Agnari Poulsen, har hann hevur havt tað sera gott, ja, sum um tað var heima hjá hon­um sjálvum. Og tað vil eg so hjarta­liga takka tykkum báðum fyri, Hildi­gunn og Agnar, at tit hava ver­ið so góð við Óla. Góði Óli. Eg fari at takka tær fyri all­ar túrarnar, vit hava verið saman. Frá 1999 til 2010 vóru vit báðir eina ella tvær ferðir um árið niðri á Kreta ella á Kanarisku oyggjunum – ja, einar 16 túrar munnu vit hava ver­ið tilsamans. Og serliga takki eg tær fyri, at tú hesi seinastu 25 árini hevur vitjað okkum í Danmark einar tvær ferðir um árið – seinast í mai í ár. Tað eru vit serstakliga glað fyri. Nú sunnudagin, 5. juli, há­tíð­ ar­heldur tú føðingardagin í Báta­ felags­húsinum í Vágsbotni frá kl 11 til 17, har øll eru hjartaliga væl­kom­in at heilsa upp á teg. Tað gleða vit okk­um til! Hjartaliga tillukku, góði Óli. Bróðir tín Óli hjá Hilmu sjeyti 75 ára føðingardagur Týsdagin 7. juli verður Arnhold Fjallstein 75 ár. Dagurin verður hildin í Oasuni 11. juli frá kl. 13. Øll eru hjartaliga vælkomin. Heðin Ó. Jacobsen, Skopun, 60 ár Hetta deiliga lívsstykki fyllir 60 ár 6. juli, og tað fara vit sjálvandi at hátíðarhalda. Tað hevði glett okkum at sæð familju, vinir og kenningar til ein góðan bita í Samljóð í Skopun leygarkvøldið 4 juli kl 19.00. Vinarliga sigið frá um tit koma áðrenn týsdagin 30. juni á tlf 274643 ella 277466. 90 ára føðingardagur 30. juni fyllur Kristina Simon­sen, búsitandi í Tórshavn, 90 ár. Í tí sambandi verður opið hús í kjallaranum í Adventista kirkjuni frá kl. 16:00 - 20:00. Øll eru hjartaliga vælkomin at hátíðarhalda henda dag saman við Kristinu og familju hennara. 80 ára føðingardagur 30. juni verður Olfert Debes, Oyri, 80 ár. Dagurin verður hildin í Eydnuni frá kl. 16-21. Øll eru hjartaliga væl­komin. 90 ára føðingardagur. Mánadagin tann 06 juli,verður Mina Jacobsen Tórshavn,búsitandi á Tjarnagarði 90 ár. Tey í vilja heilsa uppá Minu,eru vælkomin til ein kaffimunn,Sunnudagin 05 juli millum kl 15.00 og 18.00 á Tjarnagarði,inngongd frá Stoffalág.