fríggjadagur 10. juli 2015síða 32

Fríggjadagur 10. juli 2015 sosialurin 78 Hugskot og viðmerkingar – send sms til 225000 32 Hetta hevur verið heilt ótrúligt Uni Arge Yrki: Tónleikari Bústaður: Tórshavn Hvat ætlaði tú at blíva, tá ið tú bleivst vaksin? Snikkari! Men tann dreymurin fánaði skjótt burtur, og síðan havi eg smíðað nógv við orðum á ymsum pallum og snikkað saman løg. Fótbólturin gav eisini høvi til at negla nakrar bóltar í málið, og tað besta var at skora fyri Føroyar, tí øll vóru so glað. Hvat burdi hitt kynið vitað um títt kyn? Vit skulu klappast av og á, men tora illa at viðganga tað. Innari smádrongurin verður øgiliga fegin tá. Hvat burdu børn vitað um tað at vera vaksin? At lívið fyri ein stóran part er ein endurtøka av skyldum, men at tú ongantíð mást gloyma barnið í tær sjálvum og flenna og spæla, so leingi tú kanst. Hvat var seinasti dreymurin, tú gjørdi til veruleika? Eg geri tað, eg tími, so eg livi í mínum dreymi. Abbasonurin er síðsta stóra undrið, eg fekk fyri púra onki. Einastandandi. Um tú tordi, so hevði tú? Eg tordi ikki upp í Lítlu Dímun, men fór, so logikkurin er kanska meira: Um eg ikki tori, kann eg finna upp á tað allíkavæl. Hvat hevði gjørt heimin til eitt betri stað? Ótryggleiki og ótti í okkum sjálvum elva ofta til fordómar og øvund mótvegis øðrum. Minni av tí hevði skapt ein friðarligari heim og eina betri samveru. Nær vart tú seinast veruliga ovfarin? Valkvøldið 18. juni. Tey, sum arbeiða hart og treiskast allar forsagnir, kunnu sigra upp á fáar dagar. Tað var hugtakandi. Tað seinasta, tú hevur lært, er? Halt teg burtur viðhvørt. Tað kann vera ein fyrimunur. Tann støðugt ringa samvitskan snýr seg um? Ikki at fáa loyst uppgávur nóg skjótt. Men eg veit, at tann kenslan lutvíst stendst av mínum egna ótolni, og so sleppi eg bara øllum og fari út at floyta. Tá fellur 5-oyrað ofta heilt skjótt. Enda setningin: Føroyingar burdu: …hugsað seg um, tá teir banna Føroyar og føroyingar niður og norður. Virkar ein hurð í einum bygningi ikki, siga vit ofta: ”Alt er nakað lort í Føroyum!” Dummar onkur seg illa, siga vit: ”Typiskt føroyingar!” Hetta er eitt merkiligt slag av sjálvpínaríi, sum fólkalívsfrøðin átti at granskað í. Virkar ein hurð í Týsklandi ikki, siga týskarar jú ikki: ”Typiskt okkara lorta land!” Teir orðna hurðina. Vit áttu at verið ernari av okkum sjálvum. Áki Bertholdsen – Lagið er ótrúliga gott, og hetta hevur verið ein heilt ótrúliga góður túrur. Tað sigur Kaj Leo Holm Jo­han­ ne­sen, løgmaður. Hann er ein av teimum 47 súkklarunum, ið manna føroyska Team Rynkeby-liðið, sum hava súkklað úr Føroyum til París hesa seinastu vikuna, og sum koma til París í dag, seinnapartin fríggjadagin. Endamálið við súkklutúrunum er at savna pening inn til børn við krabbameini, og familjur teirra. Og løgmaður er sera væl nøgdur við túrin higartil, segði hann á miðdegi í gjár. Tað vóru tey hundrað kilometrar frá Paris, men skuldu gista og rinda møðina, áðrenn tann seinasta teinin. Í góðari venjing Løgmaður heldur, at øll eru í rættiliga góðari venjing, men tað er eisini neyðugt, tí teinurin er langur, 2500 kilometrar, og allur vegirnir eru ikki líka slættir og líka góður. Samstundis skulu teir halda eina miðalferð upp á einar 23-25 kilometrar um tíman, og tað er ikki so lítið, tá ið hugsað verður um, at mótbrekkur og óslættur veður er á leiðini. Hvønn dag súkkla tey einar 200 kilometrar, ella eina átta tímar um dagin. Tað eru eisini mótbrekkur á ferðini, so tað hann heldur, at súkklararnir hava tikið eitt megnartak fyri eini góðari sak. Í fjør viðraði rættiliga illa, men í ár hevur veðrið avgjørt verið til vildar. Løgmaður var eisini við í fjør Men hann sigur, at tað var bara eina løtu mikudagin, at tey fingu ein ferðil av tí sama veðrinum, tey høvdu tað mesta av túrinum í fjør. Men hesa ferð er løgmaður betri fyrireikaður, tí nú hevur hann føroyska, ullinta undirtroyggju við, so tað verður ikki betri. Men hann hevur ikki havt so nógv brúk fyri henni, tí hitin hevur ligið um 15 - 20 stig. Í dag, fríggjadagin koma tey til París, og har fara út ímóti 15.000 fólk at taka ímóti øllum rynkebyliðunum, sum koma úr fleiri londum. Hann sigur, at tað er ein øgiligur spenningur í luftini tann seinasta dagin. Men hann leggur afturat, at tann seinasta teinin, mugu tey ikki punktera, tí tá er eingin at lappa, ella at skifta hjól, so í ringasta føri, kann ein súkklari, sum punkterar, verða noyddur at renna seinasta teinin við súkkluni inn um málstrikuna. Hetta er eitt megnartak, fyri eini góðari sak, sigur løgmaður, sum brynjaði seg væl við ullintari undirtroyggju Løgmaður: