hósdagur 25. februar 2016síða 42

2 FÓTBÓLTUR 2016 FÓTBÓLTSBLAÐIÐ HJÁ MIÐLAHÚSINUM FÓTBÓLTUR 2016 Fótbóltsblaðið hja Miðlahúsinum Útgevari: Sosialurin 23. februar 2016 Redaktørur: Tróndur Arge Blaðfólk: Tróndur Arge, Neli Heldarskarð, Jóannes Hansen, Pætur Albinus og Hilmar Jan Hansen Grafisk sniðgeving og umbróting: Pætur Eyðunsson Jensen Myndir: Álvur Haraldsen Prent: Prentmiðstøðin Fyri seytjandu ferð gevur Sosialurin út Fótbóltsblaðið, sum er ein upptakt til komandi kappingarárið í fótbólti. Blaðið er ætla teimum, sum fylgja við bestu deildini í føroyskum fótbólti Fyrst av øllum, so fari eg at bjóða tykkum vælkomin í føroyska fótbóltsheimin saman við ÍtróttarSosialinum og Miðlahúsinum annao 2016. Hetta er vónandi árið, tá vit sleppa at síggja Cristiano Ronaldo á Tórsvølli. Vit fara eins og tey nógv undanfarnu árini at fylgja væl við í føroyskum fótbólti, so tú eisini kanst fylgja væl við Hetta blaðið setur sjóneyku á Effo-deildina. Í hesum blaðnum hava vit hóparnar hjá øllum feløgunum í Effo-deildini, men tað er við tí fyrivarni, at flytingarvindeygað ikki er latið aftur. Sostatt kunnu flytingar koma fyri, men tað kanst tú altíð lesa um í Sosialinum og á in.fo. FLEIRI UM UEFA MILLIÓNIRNAR Tað er spenningur um yvir alla kappingina. Summi feløg kenna vit áleið styrkina á, meðan hjá øðrum vita vit ikki um tað verður fiskur ella fuglur. Í oddinum verður B36. Teir eru tvífaldir FM vinnarar, og støðan í felag tykist bara blíva betri og betri. Millum teir nýggju í hópinum er Høgni Madsen, sum ikki hevur roynt at vunnið gull enn. Størstu kappingina fáa teir helst frá Víkingi og NSÍ, sum hvør í sínum lag royna at spæla við um gullið. Víkingur manglar framvegis FM steypið, so felagið fór eftir einum tvífaldum FM vinnara til venjara, nevniliga Sámal Erik Hentze. Í Runavík tók tað sína tíð at fáa sett nýggjan venjara. Talan bleiv um danska Anders Gerber, sum tó ikki er komin til felagið við svarinum upp á alt. HB byrjar av nýggjum, og tað merkist á hópinum. Rókur av Fløtum Jespersen er brádliga millum elstu spælararnar á liðnum, og skal bera HB-arvin víðari. Spurningurin er nú, um tað verður nokk til at vera millum tey bestu, tá so stórt útskifting er. KÍ hevur aftur í ár fingið tilgongd av fleiri útlendskum spælarunum, men tað felagið hevur eisini talent í hópinum. Tað sóu vit við Heðini Klakstein, sum var eykaspælari tá árið byrjaði, men toppskjútti tá árið endaði. Hesi fimm eru bestu boðini upp á fimm tey fremstu. YVIRLIVARNIR Tey flestu spáddu ÍF eitt gott kappingarár, men tilgongdin av eitt nú ársins spælara, Adeshina Lawal, flutti ikki nógv. Nú ætlar nýggi venjarin, Jógvan Martin Olsen, at fáa nógv mál burturúr teimum fremstu spælarunum á Fløtugerði. Í Trongisvági er nýggjur maður við róðrið. Hollendski Robert Roelofsen er komin til, og hann hevur sett felagnum stór mál. Liðið skal út í Evropa at spæla. Á Argjum var yvirlivingin ikki tryggjað, fyrr enn í seinasta umfarinum. Síðani er meir enn eitt heilt lið farið, og eitt nýtt komið til. Eisini Trygvi Mortensen er nýggjur í venjarastólinum. UPPFLYTARARNAR Á Toftum skriva tey føroyska fótbóltssøgu, tí Pedro Tarancon Anton og Carlos Quintana Herrero eru fyrstu spaniólarnir í føroyskum fótbólti. Teir setur kulør á, men er tað nokk? Skála hevur gravað Paula G. Hansen fram aftur, men miðvallarin er bersøgin um málið, og er óalmindiliga væl fyri, fyri ein fótbóltsspælara í hansara aldri. Royndirnar hjá honum kunnu blíva munurin á yvirliving og ikki. FYLG VIÐ ÍTRÓTTINUM Í ÍTRÓTTARSOSIALINUM Eins og altíð, so gera vit í Miðlahúsinum nógv burturúr føroyskum fótbólti. Vit vóru einasti miðilin í Grikkalandi, tá Føroyar vunnu. Vit royna at verða til flestu dystirnar, so vit í størri mun kunnu greiða frá hvat veruliga hendir. Á in.fo, sum er tíðindaportalurin hjá okkum, leggja vit stóran dent á at fáa bráð­fengistíðindini út. Vit fylgja væl við í fótbóltsheiminum, og hava eisini eitt hav av myndum frá nógvum dystum. Vit leggja stóran dent á, at hava beinleiðis frásøgn frá flest øllum dystum. Í ár koma vit at leggja enn størri dent á, at fáa sjónbandamyndir frá dystum í bæði bestu og næstbestu deildini í føroyskum fótbólti. Í ÍtróttarSosialinum, og Sosialinum sum heild, leggja vit dent á bakgrundssøguna. Hví vunnu ella taptu Føroyar, og vit hava »Dysturin hesa vikuna«, har vit eisini gera spælarametingar. Hetta er ein stór ábyrgd, sum vit taka í stórum álvara. RONALDO ÁVEGIS Hetta verður vónandi árið, tá enn ein heimsstjørna traðkar á Tórsvøll. Portugal kemur til landið í komandi HM undankapping. Zinedine Zidane var ongantíð við Fraklandi í Føroyum, meðan Zlatan Ibrahimovic fylti Tórsvøll. Vónandi verða tað nakrir spennandi og stórir dagar fyri føroyskan fótbólt. Umframt tað, so mugu vit ikki gloyma okkara egnu útisetar, sum blíva fleiri og fleiri í tali. Og so endaði Kaj Leo í Bartalsstovu í ongum minni enn Dinamo Bukarest í Rumenia. Vit bíða í spenningi eftir tí næsta stóra skiftinum. Gott kappingarár! VÆLKOMIN, RONALDO! Tróndur Arge