týsdagur 22. mars 2016síða 16

Mikudagur 23. mars 2016 · Nr. 35 16 Sosialurin Ferðast Háárstíðin er nógv longd Hjá Smyril Line síggja tey fram til eitt sera gott summar við nógvum ferðafólki. Í mun til fyrr so er sjálv háárstíðin hjá Norrønu longd munandi seinnu árini N orrøna og Smyril Line hava havt eina ógvuliga jaliga gongd seinnu árini. Fleiri og fleiri ferðast sjóvegis til og úr Føroyum, og ikki minst hevur tað seinnu árini víst seg, at fleiri og fleiri velja at ferðast uttan fyri tað, sum vanliga verður rópt háárstíð. Á Smyril Line greiða tey frá, at meðan tað fyrr vanliga var útselt at kalla allan juli mánað og lutvíst í juni og august, so er skipið rættiliga fult longu frá apríl til seint í september mánað í ár. Fólk skulu gera skjótt av Í summar eru heilt nógvar ferðir um at verða útseldar, men enn eru pláss á øllum fráferðum. Plássið er tó avmarkað, og á Smyril Line mæla tey tí til, at man ger skjótt av, um man ætlar sær ein túr við Norrønu í summar. – Tað sigur seg sjálvt, at jú fyrr tú ert úti um teg og bíleggur tær ferðaseðilin, jú fleiri valmøguleikar fært tú, og samstundis er møguleikin størri fyri at fáa ein bíligan ferðaseðil, siga tey hjá Smyril Line. Pakkaferðir væl umtóktar Eitt tilboð, sum rættiliga nógv viðskiftafólk hjá Smyril Line velja at gera sær dælt av, er møguleikin fyri at keypa sær eina pakkaferð við ferðaseðli og annaðhvørt summarhúsi ella frítíðardepli. – Í mong ár hevur tað verið ógvuliga væl umtókt hjá serliga føroyskum barnafamiljum at fara til ein av mongu frítíðardeplunum í Danmark. Teir best umtóktu frítíðardeplarnir millum føroyingar eru ivaleyst Danland depilin í Blokhus, og so tann hjá Dayz í Rønbjerg beint við Limfjørðin. Men somuleiðis er stórur áhugi fyri eitt nú Lalandi, Skallerup Klit og hinum deplunum hjá bæði Dayz og Danland, verður sagt hjá Smyril Line. Serligir tematúrar selja væl Eitt annað tilboð, sum Smyril Line serliga seinnu árini hevur gjørt nógv burturúr, er tematúrar. Hetta eru túrar við eini serligari yvirskrift ella til eitt serligt stað. Í nógv ár hevur Smyril Line skipað fyri eitt nú Jólatúri, Harmonikutúri, Sjavstúri og øðrum, og hetta eru alt túrar, ið hava selt væl. Seinnu árini hevur eisini verið skipað fyri Sjómannatúri til Íslands, og hetta er ein túrur, sum hevur havt sera stóra undirtøku, og soleiðis er eisini í ár. Harumframt skipar Smyril Line í ár eitt nú fyri busstúrum til bæði Prag og Berlin, og hesir túrar verða somuleiðis væl móttiknir, um enn teir enn ikki eru útseldir. Betra umstøðurnar umborð Hjá Smyril Line er hugsanin tann, at tað er umráðandi, at ferðafólk beinan vegin tey koma umborð á Norrønu merkja, at nú er frítíðin byrjað. – Frítíðin byrjar umborð er slagorðið hjá okkum, og av somu orsøk royna vit allatíðina at betra um umstøðurnar umborð, so at ferðafólkini fáa eina so góða uppliving sum gjørligt, siga tey á Smyril Line.