hósdagur 31. mars 2016síða 48

FRÍGGJADAGUR 1. APRÍL 2016 SOSIALURIN 37 48 48 Gunvá við Keldu MYND: HEINESEN MYNDIR Yrki: Vinnurekandi og býráðspolitikari – Bústaður: Ánirnar Hvat ætlaði tú at blíva, tá ið tú bleivst vaksin? Eg havi altíð ynskt at verið sjálvstøðug vinnurekandi. Sum barn/ung vildi eg vera seljari, hava ymisk umboð. At eg gjørdist sjálvstøðug vinnurekandi innan grafisku vinnuna, kom eitt sindur seinni og meiri av tilvild, at tað gjørdist júst tað økið Hvat ynskir tú at hava avrikað um eitt ár? At hava megnað enn eitt ár við góðari heilsu og kenna meg takksama. Enda setningin: Føroyingar kunnu allir verða samdir um, at… … vit eiga at vera takksom fyri at liva í einum av bestu londum í heiminum, men vit eiga at gerast meiri sjálvbjargin bæði sum tjóð og einstaklingar. At vit seta eina æru í at klára okkum sjálvi og skorða undir, so at tey, sum veruliga tørva, fáa hjálp. Hvør er tín fyrimynd og hví? Havi ikki bert eina. Haldi tað kann deilast upp í privat, andaligt og politiskt. Ígjøgnum lívið havi eg møtt nógvum fólki, bæði í familjuni og fólki, eg havi umgingist, sum oftast eldri enn eg, ið við sínum lívi, tosingarlag og verumáta hava verið fyrimyndir á ymiskum økjum. Estersbók í Bíbliuni er “ævisøgan” um drotningina Ester, sum var bæði djørv og vís, tveir eginleikar eg meti høgt, ein fyrimynd. Ævisøgur hava altíð havt mín áhuga, havi lisið um nógv áhugaverd folk, ið hava nátt høgum málum í lívinum, eitt nú politikararnir Golda Meir og Condoleezza Rice. Hvat er eitt eydnuríkt lív? Abraham Lincoln segði, at fólk eru so eydnurík, sum tey seta sær fyri at vera. Haldi tað er nakað um tað. Gransking vísir, at 50% av okkara eydnu er avgjørt í ílegunum, 10% er tilvildarligt, og 40% er hvussu tú velur at liva títt lív. Eydnan verður skapt innaní, hvussu tú setur sjóneykuna á lívið. Vit kunnu ikki krevja av øðrum, at tey skulu gera okkum eydnurík. Minni filosofiskt, er eydnuríkt lív eisini, at tey, tú elskar, hava tað gott, at tú hevur eitt gott starv og annars hevur til dagin og vegin. Nøgdsemi hevur ein stóran leiklut í einum eydnuríkum lívi Um tú tordi, hevði tú… … skrætt eitt ár úr kalendaranum og farið út í heim at reika. Tað er bæði ein fíggjarligur og í dag ein trygdarspurningur um at tora Tað seinasta, tú hevur lært, er at… … tað nyttar simpulten onki at irriterast Um tú skuldi sungið ein sang í X Factor, hvønn sang hevði tú valt? L-O-V-E í versjónini hjá Nathalie Cole Hvør er seinasta góða upplivingin hjá tær? Eg havi havt nógvar góðar upplivingar, men haldi at sleppa at vitja Grønland í september í fjør, var ein so sera stór og serstøk uppliving Tann støðuga ringa samvitskan snýr seg um, at eg… … makti ov illa at stýra míni matgleði BAKSÍÐAN E in dagin herfyri fór eg út at leita eftir Himmiríki. Eg fann tað ikki. Tað var, skal eg skunda mær at leggja afturat, í Keypmannahavn. Men er Keypmannahavn, nei, Danmark, ikki eitt stórt Himmiríki? Hví so leita har? Sama ger. Ein starvsfelagi var í móður­landinum. Aftur­komin í anneksið visti hann at siga, at ein nýggj ølbarr er komin í Keypmanna­ havn. Hon eitur, rætt gitt, Himmeriget. Hana mátti eg royna. So eg avstað til gongu í góðum hýri, njórandi Gakk tú fram við goðum treysti. Var vísur í, at Himmeriget var á Åboulevard 12. Helt meg hava sæð tað á netinum. Var so vísur, at eg kannaði tað ikki aftur, áðrenn eg legði frá landi í Istedgade. Gekk og gekk. Tað var í lagi, veðrið var gott, og gott at ganga nógv og langt, sigst. Gekk og gekk. Jú, nú var eg so við Åboulevard 12. Men har er einki Himmiríkið ella ríki yvirhøvur. Har er ein vínbarr, sum kallast okkurt við 9, men tað var ikki henni, eg leitaði eftir. Eg g e k k víðari nakrar hundrað metrar. So vendi eg við. Var sjálv­ sagt ikki so snildur, at eg fór yvir um breiða strætið at ganga hinumegin inn aftur á Ráð­hús­torgið. Men eg sá skeltini hinu­megin. Tey eru nógv, men á ongum stóð Himmeriget. Nú gangi eg ikki við alfrøðini og allari hugsandi samskiftistøkni uppi á mær, havi bara eina vanliga sibba­ telefon frá BR. So eg fekk ikki kekkað har á staðnum, hví Himmeriget ikki var í nummar 12, sum mín vitan segði mær. Eg gekk og gekk aftur á gistingar­ húsið, har ein telda er til gestirnar at brúka. Åboulevard 27. 27 ikki 12. Og hinu megin strætið, sjálvandi. Av stað aftur. Fínasta slag, nógv rørsla. Nú bar til. Himmeriget var í nummar 27, beint hinumegin, sum eg vendi við fyrru ferðina. Sigast skal, at skeltið er lítið, ger ikki nógv um seg, sæst illa, Himmiríkið er framvegis fyri tey eyðmjúku. Nú var ein øl forbannað góð. Hugnaligt stað, níggju kranar og so dýrar øl, sera dýrar, so dýrar sum fínasta vín. Tann dýrasta kostar 2.500 krónur. Men so er hon eisini 75 sentilitrar. Hon eitur Millenium Gueuze, sum belgiska bryggjaríið 3 Fonteinen bryggjaði í 1998. Stórt úrval, fekk tað til okkurt um 240 sløg í øllistanum. Eg fann so Himmmiríkið í seinna umfari. Kanska fann eg tað í fyrra umfari, um eg hevði ein GPSara við mær. Men heldur ikki GPS ber til at líta á. Tí fekst prógv fyri nakrar dagar seinni, tá vit eftir ein fund í Århus koyrdu til ferjuna til Sælands. Koyrdu vit eftir GPSaranum, ja, so endaðu vit uttan fyri býin. Men bilstjórin varnaðist so líðandi, at her ruggaði ikki rætt. Hann koyrdi so eftir skeltunum, sum søgdu Havn, til vit sóu ferjuna og vóru har tríggjar minuttir, áðrenn hon loysti. GPS, eg meini tað. Kranaølið í Himmiríkið var annars gott og kostaði ikki meira enn aðra­ staðni, kanska eitt sindur minni, so har fór ein góð løta, áðrenn eg aftur longdi mær lívið við einari gongu­ferð í Keypmanna­havn. Himmiríkið er ikki einki verandi stað. Tað var Plan B. Og nú eru eisini ølsnobbar, ikki bara vínsnobbar. Men, sum skilst, ber væl til hjá fólki at meta um og døma eina øl, sum kostar 1500 krónur eftir at hava drukkið eina, sum kostar 500 krónur, eina, sum kostar 400 krónur og ivaleyst eisini eina, sum kostar 700 krónur. Óført at vera so væl fyri. Har eri eg ikki. Men Plan B var, er og verður í allar ølævir besta ølstaðið. Hølini eru oyðin og tóm enn. Eg var við dyrnar, tók húgvuna av, tagdi og mintist í ein minutt. Tað geri eg hvørja ferð, eg eri í Keypmannahavn. Her var Himmiríkið. Her er stongt Høgni Djurhuus Høgni Djurhuus fekk Móðurmáls­ virðislønina 2012 Til himmals uttan GPS