mánadagur 7. mars 2016síða 40

VIKA 10 • 7. MARS 2016 8 MIÐLAHÚSIÐ ÓKEYPIS LÝSINGARBLAÐ Keyp føroyskt: Taka støðu til dagsins samfelag Hevur tú varnast tær eyðkendu strípurnar á óvæntaðum myndum seinastu mánaðirnar? So ert tú ikki tann einasti. Fólkini handan átakið Keyp føroyskt hava seinastu mánaðirnar tikið støðu til tað, sum rørist í samfelagnum hvørja viku. – Keyp føroyskt er ein partur av gerandisdegnum, og tí er tað, sum rørir seg í gerandisdegnum, eisini ein partur av Keyp føroyskt, sigur Niels Arge Galán, stjóri á Sendistovuni, sum samskipar átakið V it minnast øll herligu kvinnuna í sjónvarpslýsingunum, sum bað okkum keypa føroyskt. Vit minnast eisini kokkin Gutta Winther, sum greiddi frá, at tær føroysku rávørurnar er í heimsflokki. Nú biðja fólkini handan Keyp føroyskt okkum vísa atlit til tey viðurskiftini, sum røra seg í okkara samfelag júst nú. Á in.fo, umvegis teldupost, á Facebook og í Vikuskiftis Sosialinum hvørja viku, tekur Keyp føroyskt støðu til, hvat er mest áhugavert í Føroyum júst nú. Hesa vikuna er tað Kvinnurørslan, tí 8. mars er Kvinnudagur og í ár eru 100 ár síðani, at føroyskar kvinnur valdu fyri fyrstu ferð. Áður hava myndirnar verið av okkara dugnaligu svimjarum, av leikinum Fólk og dólgar í Kardamummubýnum, av bjargingartyrlunum hjá Atlantic Airways og mongum øðrum. – Tað hendir nógv í tí føroyska samfelagnum, og hvørja viku taka vit støðu til, hvat er tað mest áhugaverda júst hesa vikuna. So gera vit “keyp føroyskt” tekning av tí, tí okkara átak skal eisini liva og virka í okkara pulserandi samfelag, sigur Niels Arge Galán. Átakið Keyp Føroyskt hevur verið virkið og sjónligt í fleiri ár, og eitt av høvuðsboðskapunum hjá fólkunum handan átakið, nú vit skriva 2016 er, hví tú skalt keypa føroyskt. – Eitt týdningarmikið poeng hjá okkum at undirstrika er, at eingin skal keypa føroyskt bara tí tað er føroyskt. Tú skalt keypa føroyskar vørur, tí tær eru kappingarførar við tær útlendsku. Tú skal keypa føroyskar vørur, tí tað skal vera eins natúrligt sum, at vit hátíðarhalda altjóða kvinnudagin til dømis, sigur Niels Arge Galán, og sipar aftur til innihaldið í vøkru tekningunum við teimum Merkið-littu strípunum. Tað skal vera natúrligt. Tú skalt ikki keypa føroyskar vørur, bara tí tær eru føroyskar. Tú skalt ikki rinda ov nógv fyri vørur, bara tí tær hava føroyskt stempul. Nei, tú skalt keypa føroyskt, tí uttan føroyskan áhuga, fáa vit færri føroyskar vørur. Men tað er ikki tín høvupína. Tú skalt bara keypa tær tað, sum tær dámar og ynskir. Og hví keypir tú ikki heimsins bestu vørur, vitan og sniðgeving? – Tey evni vit taka upp í myndunum, eru tey, sum savna okkum. Vit nerta ikki við tey evnini sum spjaða okkum, so sum politisk evni, tí Keyp føroyskt skal vera savnandi. Átakið skal ganga á odda fyri at varpa ljós á tað, sum ger okkum serstakar sum tjóð, sigur Niels Arge Galán. Fylg við á in.fo hvønn fríggjadag fram til november, har tú sært Keyp Føroyskt myndirnar framyvir. Hvat heldur tú verður tað mest áhugaverda í næstu viku?