mánadagur 18. apríl 2016síða 13

13 Mánadagur 6. januar 2014 · Nr. 2 Sosialurin Mánadagur 18. apríl 2016 · Nr. 44 Hugskot og viðmerkingar – send sms til 225000 STUTTSØGD TÍÐINDI REGNAR ENN VIÐ FØROYSKUM METUM Føroyskir svimjarar hava luttikið í Danish Open, har nógv nýggj føroysk met vórðu sett. FM í talv er avgjørt, frælsur ítróttur á venjingarlegu í Spania, Dávur Magnussen er á trónini í einkultstarti í súkkling og mangt annað hevur myndað vikuskiftið – her eru tey stuttsøgdu Pætur Albinus FÓTBÓLTUR Jóan Símun Edmundsson slapp eiheldur hesaferð upp í part, nú OB í gjár fekk vitjan av Viborg. Føroyski landsliðsáleyparin sat á beinkinum allan dystin, haðani hann kundi síggja liðfelagar sínar vinna 5-1. Kappingarneytar hansara um álopsplássið skutu fýra mál, Anders K. Jacobsen trý og Rasmus Festersen eitt. René S. Joensen og Hallur Hansson spældu báðir allan dystin, tá ið Vendsyssel FF í gjár var út fyri enn einum tapi, hesaferð 2-1 ímóti Skive. Brandur Hendriksson var leik­bannaður. René skeyt málið hjá Vendsyssel FF, sum ikki hevur vunnið eftir vetrarsteðgin og á 6. plássið nú er sjey stig frá uppflytingini. Ein lítil uggi er, at teir hava ein dyst tilgóðar. Christian L. Holst og Heini Vatnsdal vóru við, tá ið Fremad Amager leygardagin tapti 1-0 ímóti HIK. Tapið kom illa við, tí teir av Amager duttu frá øðrum plássi og heilt aftur á fjórða pláss í uppflytingarspælinum í trið­ bestu deildini. – Vit fara sjálvandi eftir at flyta upp, men vit skulu ikki hyggja so nógv eftir stigatalvuni. Vit skulu njóta at spæla fótbólt. Tað sá ikki út sum vit gjørdu tað leygardagin. Vit mugu finna gleðina aftur, segði Christian L. Holst við bold.dk eftir dystin. Eyðvør Klakstein skeyt málið hjá CD Marino í næst­ bestu sponsku deildini, har tær í gjár tapti 2-1 ímóti Mullier FCN. Eyðvør Klakstein hevur nú skorað nýggju mál og er topp­skjútti hjá CD Marino, sum er nummar níggju av 14 á stiga­ talvuni, har einans tríggir dystir resta í. Tiltiknað granna­upp­ gerðin ímillum FCK og Brøndby varð spæld í Parkini í gjár. Tað var FCK, sum fór avstað við sigrinum við tveimum málum frá Nicolai Jørgensen. FCK er greitt á odda í Superliguni, níggju stig frammanfyri SønderjyskE og 10 stig framman­fyri AaB. Brádliga er stórur spenn­ ing­ur aftur í La Liga, har FC Barcelona í gjár tapti triðja dystin á rað. Hesaferð taptu teir 2-1 á heimavølli ímóti Valencia. Ivan Rakitic gjørdi sjálvmál, Santi Mina økti til 2-0 áðrenn Lionel Messi pyntaði um til endaliga úrslitið, 2-1 til Valencia. Atlético Madrid vann greitt 3-0 heima ímóti Granada, meðan Real Madrid vann 5-1-stórsigur á útivølli ímóti Getafe. Fimm dystir eru eftir at spæla, og nú eru FC Barcelona og Atlético Madrid púra jøvn oddalið við 76 stigum. Real Madrid er beint í hølunum við 75 stigum. Napoli fekk eitt skot fyri bógvin í strembanini eftir at gerast italskur meistari, tá ið teir leygardagin vóru á vitjan hjá Inter. Inter vann dystin 2-0 við málum frá Mauro Icardi og Marcelo Brozovic. Napoli er enn nummar tvey, men nú heili níggju stig aftanfyri Juventus. Leiðslan hjá hjá Juventus varð økt við tryggum 4-0-sigri heima ímóti Palermo. Sami Khedira, Paul Pogba, Juan Cuadrado og Simone Padoin skutu málini. Undir nýggja venjaranum, Cristian Brocchi, fekk AC Milan 1-0-sigur ímóti Sampdoria við máli frá Carlos Bacca. AC Milan er nú nummar seks. Væl dámdi venjarin hjá Leicester, Claudio Ranieri, sigur við blaðið La Republica, at hann ikki er áhugaður í at taka við sum italskur landsliðsvenjari. Starvið verður annars tøkt í summar, tá ið Antonio Conte tekur við sum venjari hjá Chelsea. Mett verður, at Gianni De Biasi er favorittur at fáa starvið. Hann er í løtuni landsliðsvenjari hjá Albania. FORMIL 1 Nico Rosberg (Mercedes) vann fyri triðju ferð út av eins nógv møguligum, tá ið GP-kapping var í Shanghai hetta vikuskiftið. Hann vann frammanfyri Sebastian Vettel (Ferrari) og Daniil Kvya (Re Bull) Danski Kevin Magnussen (Renault) gjørdist nummar 14. FR. ÍTRÓTTUR Hanus Bergsson og Tórur Mortensen hava seinastu dagarnar verið á venjingar­ legu í Albir og Alfaz del Pi nær­hendis Alicante, Spania. Heima­síðan hjá Hvirluni skrivar, at talan hevur verið um gevandi venjing­ar­legu, har teir báðir vóru so hepnir at sleppa at venja saman við svenskum mið­náms­ skúlanæmingum við sum sergrein í frælsum ítrótti. Næmingarnir vóru eisini á venjingarlegu har. SÚKKLING Leygardagin varð skipað fyri 18km longum einkult­ starti ímillum Kaldbaksbotn og Kaldbaksbygd, har 13 luttakarar vóru við. Dávur Magnussen vann í yvir­ legnum stíli. Tíð hansara var 25:50. Á øðrum plássi var veteranurin Gunnar Dahl-Olsen við 28:10, meðan triathleturin Guðmundur Joensen fekk 3. plássið við 28:30. Ein av klassikarunum, Amstel Gold Race, varð súkklað hetta viku­skiftið. Italski Enrico Gaspar­otto (Wanty-Groupe Gobert) fór avstað við sigrinum framman­ fyri danska Michael Valgren (Tinkoff). Teir báðir fóru í út­brot á síðstu klintring­ini, men tað var italienarin, ið var stinnari í spurtin­um. SVIMJING Umframt at Pál Joensen svam seg til OL á 1500m frí, so hava eisini onnur góð føroysk úrslit verið á Danish Open um vikuskiftið. Í 50 mfrí setti Astrið Foldarskarð úr Havnar Svimjifelag føroyskt met við tíðini 27.19, sum var eitt vet betri enn metið, sum hon sjálv átti frammanundan við tíðini 27.21 frá FM á langgeil fyrr í ár. Seinni í kappingini betraði hon enn meiri um metið, nevniliga 27.06. Í 400m blandað vann Alvi Hjelm úr Ægir í stórum stíli gull og setti nýtt føroyskt met, tá ið hann svam teinin uppá 4:30.17. Hann átti sjálvur føroyska metið á 4:33.15 frá HM í Kazan í fjør summar. Í 800m frí svam Vár Erlingsdóttir Eidesgaard úr Havnar Svimjifelag seg til eitt stórt nýtt føroyskt met og juniormet, tá ið hon gjørdist nummar fimm við tíðini 9:09.34. Hon kutaði útivið trý sekund av gamla metinum, sum Sára Ryggshamar Nysted frammanundan átti. Signhild Joensen úr Ægir setti leygardagin nýtt føroyskt juniormet í 50m rygg. Tað gjørdi hon við at svimja tíðina 30.50, sum rakk til eitt fjórða pláss í A-finaluni. Í 50m bringu gjørdist Róland Toftum úr Suðuroyar Svimjifelag nummar tvey í B-finaluni við tíðini 29.81, sum er nýtt føroyskt met og juniormet. Hann hevði longu fyrr á degnum sett metið einaferð, tá við tíðini 29.89. Metið frammanundan átti hann eisini, sum var 30.01 frá FM á langgeil fyrr í ár. Føroyingurin í Farum, Magnus Jákupsson, megnaði at seta nýtt danskt met í 50m rygg, tá ið hann á hesum teini svam seg til gull. Við tíðini 25.43 tók hann metið frá OL-svimjaranum, Mathias Gydesen. TALV FM er nú avgreitt. Í 1. deild var tað Sandavágur 1, sum gjørdist føroyameistari. Teir, sum hava verið drúgvastir á tí liðnum, eru Carl Eli N. Samuelsen, Rógvi E. Nielsen, Høgni E. Nielsen og Silas Eyðsteinsson. Í 2. deild var tað Havnin 2, sum vann FM-gull. Sigurð B. Justinussen, Arnbjørn Dalsgarð, Birgi Hansen og Jógvan Næs mannaðu tað liðið. Í 3. deild vann Havnin eisini, har liðið seinasta umfar var mannað soleiðis: Jóannes Guttesen, Suni Merkistein, Suni Jacobsen og Bárður Johannesen.