mánadagur 6. juni 2016síða 42

VIKA 23 • 6. JUNI 2016 10 ÓKEYPIS LÝSINGARBLAÐ TEMA Sundalagsstevnan Hugni í hásætið á Sundalagsstevnuni Sundalagsstevnan verður hildin á hvørjum sumri sum tann næsta í røðini av summarstevnum, um miðjan juni mánað. Tað eru tær tríggjar stóru bygdirnar í Sundalagnum, Kollafjørður, Hósvík og Hvalvík ið skiftast um at hava stevnuna. Í Hvalvík er tað Róðrarfelagið í økinum og skótaliðið Borgin, ið skipa fyri stevnuna. Paula Egholm, ein av fyrireikarunum til stevnuna, sigur, at hóast tað kann vera lætt at eftirlíkna øðrum stevnum og tiltøkum fyri at fáa fólk til stevnuna, so hava fyrireikararnir valt sín egna leist. – Tað kann vera lætt at royna at líkjast øðrum, men vit hava valt at gera hetta á okkara egna hátt, og leggja dent á, at tað skal vera hugnaligt at vera á stevnuni. Meira enn bara kappróður Ein týðandi partur av føroysku summar­stevnunum er tjóðarítrótturin kappróðurin. Í so máta er Sundalagsstevnan einki undantak. Stevnan er karmur um næsta umfar í FM-kappingi í kappróðri, men Paula Egholm ger greitt, at hóast fyrireikingarnar til kappróðurin fara við nógvari orku, so er Sundalagsstevan meira enn bara kappróður. Stevnan fevnir nevniliga yvir tríggjar dagar, ið eru fyltir við eini rúgvu av tiltøkum, ið eru ætlað øllum aldursbólkum. Midnáttarrøða, barnafagnaður, fótbóltsdystur, hólmgongur, gongutúrar, útigudstænasta og annað fara at geva sítt serliga íkast til stevnuna. Bygdahugni heldur enn pengamaskina Hóast nógv onnur tiltøk eru á skránni sama vikuskiftið kring landið, og nógv hevur verið kjakast seinastu árini um framtíðina hjá bygda­stevnunum, so stúrir fyriskiparin ikki fyri, at fólk velja onnur ting framum. – Tað kann tykjast sum, at vit hava ongan kjans í kappingini við onnur tiltøk, tí at vit einans eru nakrar fáar hendur, ið standa við ábyrgdini, sigur Paula Egholm, ið tó er skjót at leggja aftrat, at bygdafólki eru røsk at átaka sær uppgávur og hjálpa til. – Men seinast tá vit skipaðu fyri Sunda­lags­stevnuni, valdu vit at fara frá vanligu tanka­gongdini um, at alt skal vera ræðuliga stórt, um vit skuldu kappast við størri støðini um gestirnar, sigur Paula Egholm. Millum annað verður skipað fyri fleiri tiltøkum fyri børnini hesar dagarnar, og har hava fyrireikararnir lagt dent á, at stevnan ikki skal støvsúgva foreldrini fyri pengar. – Tað skal ikki vera so, at foreldur verða lokkað inn á eitt barnaøki har alt kostar nógvan pening. Ístaðin fara vit at skipa fyri ymiskum gomul spølum, barnafagnað, kappingum og øðrum, sigur Paula Egholm. Í stuttum verður tað bygdahugnin, ið skal fáa fólk at velja at leggja leiðina framvið Hvalvík komandi vikuskifti. – Stevnan skal vera eitt hugnaligt tiltak. Vit hava slept teimum villu ætlanunum og royna ikki at fáa stórar bólkar at spæla á stevnuni ella skipa fyri einum festivali. Hetta skal vera ein hugnalig stevna, har fólk skulu fáa loyvi at vera til. Vit taka tempoið úr gerandisdegnum, og lata bara fólk hugna sær, sigur fyriskiparin, at enda. Hvalvíkingar hava í hesum døgum úr at gera, nú bygdin um vikuskiftið enn einaferð bjóðar øllum føroyingum til Sundalagsstevnuna