týsdagur 7. juni 2016síða 38

14 Sosialurin JUNI 2016 Bólkur C Søgan... Problembarnið er stóra vónin Eftir at hann fekk ein ordans uppsang frá venjaranum og síðani fann nýggju konu sína, hevur Kyle Lafferty verið flúgvandi á norðurírska landsliðnum. Nú er nýgifti toppskjúttin, sum var roknaður sum klovnur og problembarn, stóra vónin hjá Norðurírlandi 6 7 minuttir eru farnir av HM-undan­kappingar­ dystinum millum Norðurírland og Portugal á Windsor Park í Belfast 6. september 2013. Norður­írland er á odda 2-1, og norðurírski venjarin velur at spæla seinasta trumfin. Álopsspælarin Kyle Lafferty verður sendur á vøllin. 10 minuttir seinni hevur Cristinao Ronaldo skorað tvey mál og lagt Portugal á odda. Innskifti Kyle Lafferty er frustereraður. Hann takklar Joao Pereira fyrilitarleyst, og dómarin gevur honum reyða kortið – eitt korter eftir at hann kom á vøllin. Áskoðararnir eru á gosi, og miðlarnir finnast harðliga at. Sjálvt landsliðsvenjarin sigur, at Lafferty, sum áður hevur skapt órógv á vølli og uttan fyri vøllin, hevur svikið sínar viðspælarar. Fólk halda, at Lafferty skal blakast av landsliðnum og høvuðs­persónurin sjálvur er á knøunum og hevur hug at geva skarvin yvir. Tá ið øll hava summað seg, kallar landsliðs­venj­ arin Michael O’Neill álopsspælaran á fund. Har tosar O’Neill hvørt um annað við stórum stavum og eggjandi orðum, og hann vil geva Lafferty ein kjans afturat. Tað sama purrar liðformaðurin Steven Davis uppundir. Tað liggur í luftini, at Lafferty hevur eitt seinasta skot eftir í byrsuni á norðuríska lands­liðnum. Alt broyttist Nú eru sløk trý ár farin, síðani lagnudagin í 2013, og Kyle Lafferty skal saman við liðfeløgunum á norður­írska landsliðnum fyri fyrstu ferð luttaka í EM-enda­spælinum í fótbólti. Og skuldu tú spurt í Norðurírlandi, um tað er ein ein­stakur spælari, sum hevur leitt Norðurírland í enda­spælið, hevði svarið helst verið Kyle Lafferty. Álopsspælarin hevur seinastu tvey árini verið flúgvandi á landsliðnum. Hann hevur í einstøkum dystum víst høgt altjóða stig og hevur næstan skorað mál eftir tørvi. Lafferty skoraði 7 mál í EM-undan­kappingini, har Norðurírland var í bólki saman við eitt nú Føroyum, og bæði í Belfast og í Havn skoraði Lafferty ímóti Føroyum. Hann var ein týðandi orsøk til, at Norðurírland vann sín bólk og slapp við til endaspælið í Fraklandi. 28 ára gamli Kyle Lafferty segði herfyri á tíðinda­ fundi hjá norðurírska landsliðnum, at prátið, sum hann hevði við landsliðsvenjaran í 2013, broytti hansara hugburð, og hann setti sær fyri at vísa fólki, hvør hann veruliga var sum persónur og spælari. Um sama mundið datt hjúnarbandið, sum Kyle Lafferty hevði við fyrrverandi Miss Skotland, Nicola Mimnagh, sundur, og tey lótu seg skilja. Lafferty fann síðani saman við einari aðrari skotskari modell, Vanessa Chung, og hon hevur verið við til at broyta Lafferty. – Tað var um sama mundið, sum eg møtti Vanessa, at eg veruliga fór at gera mál aftur, og hesa tíðina saman við henni havi eg skorað eins nógv mál á landsliðnum, sum eg gjørdi í átta ár framman­ undan. Hon eigur ein stóran part av heiðrinum fyri, at tað hevur gingist mær so væl, sigur Kyle Lafferty. Hann og Vanessa giftust fyri nøkrum vikum síðani, og nú fer norðurírski toppskjúttin til EM enda­spælið sum nýgiftur maður, og konan verður millum áskoðararnar, tá ið Lafferty og liðfelagarnir skulu spæla dystir ímóti Týsklandi, Pólandi og Ukraina. Superman 193 sentimetrar høgi Kyle Lafferty hevur nú spælt 50 landsdystir fyri Norðurírland, og í seinastu 14 landsdystunum hevur hann skotið 8 mál. Hann er spælarin, sum fram um allar, skal ganga undan, tá ið Norðurírland skal spæla sínar fyrstu dystir í EM-endaspæli. – Hóast hann ikki hevur spælt regluliga fyri felag sítt seinastu árini, tykist tað, sum at Lafferty verður Superman, tá ið hann letur seg í lands­ liðs­troyggjuna. Um hann verður í góðum formi í Fraklandi, fer Norðurírland eisini at standa seg væl, sigur Billy Hamilton, fyrrverandi landsliðsspælari hjá Norðurírlandi. Bæði hann og øll hini, sum fyri trimum árum síðani vóru í øðini inn á Kyle Lafferty og vildu hava hann burturvístan frá landsliðnum, seta nú sítt álit á høga og vandamikla áleyparan. Íspegilin og problembarnið Kyle Lafferty hevur vónirnar hjá norðurírska fólkinum hangandi á sínum herðum.