mánadagur 28. november 2016síða 40

VIKA 48 • 28. NOVEMBER 2016 16 ÓKEYPIS LÝSINGARBLAÐ Jólapakkar til sjófólk – Sjófólk vilja gjarna sleppa at takka fyri jólapakkarnar, sigur sjómanstrúboðarin, Torleif Johannesen Vilmund Jacobsen Í hesum døgum ber sjómanstrúboðarin, Torleif Johannesen, jólapakkar umborð á skip. Pakkarnir koma frá sjómanskvinnuringunum kring landið og øðrum, sum vilja gleða okkara sjófólk. - Tey, sum lata jólapakkar, eru vælkomin at skriva navn og bústað, so sjómenninir fáa høvi at senda eina tøkk. Eg veit, at tað vilja teir fegnir, sigur Torleif Johannesen. Jólapakkar til sjófólk kunnu latast inn til fyrst í desember á hesum støðum: Føroya Fiskimannafelag, Bryggjubakki í Havn, Klaksvíkar Sjómansheim, Blái Krossur Føroya, Runavík og Leguhúsið, Nesvík. Myndatekstur: (Torleif á veg umborð á Vesturhavið... ) Her er sjómanstrúboðarin á veg umborð á línuskipið, Vesturhavið Søgan aftan fyri jólatræið Flestu familjur hava sína egnu siðvenju, tá jólatræið verður pyntað. Hetta er sum oftast ein samanblanding av nýggjum og gomlum siðum Vilmund Jacobsen G ranntræið er vorðið fastur jólagestur í stovum kring allan heim. Ymiskt er, hvussu tíðliga træið verður tikið inn, nær tað verður pyntað, og hvussu skjótt tað verður blakað út gjøgnum hurðina aftur. Men, flestu familjur hava eitt jólatræ í stovuni. Hvør er upprunin? Men, hvaðani er hesin siður við jólatræi komin? Jólatræið, soleiðis sum vit kenna tað í dag, hevur sín uppruna í Týsklandi fyrst í 16. øld. Í stóran mun var hetta ein protestantiskur siður. Fyrsta skrivliga keldan um træið sum jólapynt er úr Strassburg í 1605 og fyrsta keldan, ið nevnir livandi ljós á trænum, er úr Leipzig í 1632. Vanligt var at pynta salir og hallir við trøum. Síðan vóru køkur og frukt hongd á træið, og trettanda dag eftir jól sluppu børnini at heysta træið. Fyrr var jólatræið serliga pyntað við pappíri og hálmi, og onkur brúkti keks og smákøkur. Í dag hava flestu familjur sína egnu siðvenju, ið sum oftast er ein samanblanding av nýggjum og gomlum. Áður plagdi stjørnan ovast í trænum at vera úr silvurpappíri ella líknandi, men í dag er hon oftast úr plasti og er gjarna elektrisk. Fyrsta jólatræið í Danmark stóð í 1808 pyntað í Holsteinborg í Suðursælandi. Kristin boðskapur Jólatræið hevur ein kristnan boðskap. Træið sjálvt er lívsins træ, sum stóð í Eden, og træið er ímyndin av endurføðing og ævigum lívi. Stjørnan minnir okkum á stjørnuna, ið stóð yvir Betlehem fyri 2000 árum síðan, og gávurnar minna okkum á gávurnar, sum vísmenninir bóru Jesubarninum. Ljósini skulu minna okkum á, at Jesus er ljós heimsins, og litríku kúlurnar ímynda jørðina. Keturnar ímynda samanhald og eru ein áminning um, at familjur eru knýttar saman av kærleika - og einglarnir verja og vælsigna okkum. Fyrsta skrivliga keldan um granntræið sum jólapynt er úr Strassburg í 1605, men í dag er granntræið fastur jólagestur í stovum kring allan heim