hósdagur 29. desember 2016síða 18

Fríggjadagur 30. desember 2016 2 Sosialurin Brot og bitar úr árinum, ið fór Nú er aftur ársskifti fyri framman, og vit fara nú at leggja 2016 aftur um okkum. Líka so væl, sum vit kunnu siga, at nógv fer at henda komandi árið, kunnu vit eisini staðfesta, at 2016 hevur verið eitt hendingaríkt ár. Hugsa vit 12 mánaðir aftur, kunnu vit ásanna, at nógv er hent bæði við tí persónliga og tí samfelagsliga. Í fjør var løgtingsvali og skifti í politisku leiðsluni í landinum. Í ár hava vit havt kommunuval, sum eisini viðførdi broytingar, ið verða effektiviseraðar á ársskiftinum. Størsta broytingin er helst, at Heðin Mortensen gamlaárskvøld fer frá sum borgarstjóri í landsins størstu kommunu, og tá ið fólk í Tórshavnar kommunu vakna nýggjársmorgun er Annika Olsen borgarstjóri teirra. Aðrastaðni vóru broytingar í kommunstýrunum, men tað er eisini greitt, at borgarstjórar í fleiri av størru kommununum – eitt nú Klaksvíkar kommunu, Eysturkommunu, Tvøroyar kommunu, Fuglafjarða kommunu og Vágs kommunu. Tað er nógv ferð á føroyska búskapinum, og vælstandur er í samfelagnum. Undanvindurin í alivinnuni og pelagisku vinnuni ávirkar aðrar partar av samfelagnum, og stórar almennar og privatar íløgur seta enn meiri ferð á búskapin. Tosað hevur verið, at ferðin má tálmast nakað, men nú vit fara inn í 2017, kunnu vit siga, at tað er við fótinum á spidaranum. Seinastu tvey árini hevur Sea Shepherd sett dám á føroyska summarið, men í ár komu aktivistarnir ikki til Føroya, og tað gav meiri ró á samfelagið, sum harvið kundi njóta summarveður, feriu og tiltøk enn betri. Góðar tíðir, lægri prísir og broytt ferðamynstur hava gjørt, at føroyingar ferðast sum ongantíð, og tað betrar um gongdina hjá flutningsfeløgunum. Ein av stóru fráboðanunum í ár kom í heyst, tá ið SAS kunngjørdi, at flogfelagið ætlaði at bróta monopolið hjá Atlantsflogfelagið og taka kappingina upp við føroyska flogfelagið. Hesi boð vóru móttikin ymiskt í samfelagnum. Summi fegnast um økta kapping og útlit til lægri flogferðaprísir, meðan onnur stúra fyri, at stóra skandinaviska flogfelagið kann taka beinini undan føroyska flogfelagnum. Í øllum førum er greitt, at síðst í mars byrjar kappingin millum SAS og Atlantsflog. Ítróttarárið hevur verið gott, og føroyingar kunnu fegnast um fleiri stór avrik innan fleiri ítróttargreinar. Fótbólturin er sum vera man størsta ítróttargrein, og avrikini hjá bæði mans- og kvinnulandsliðnum hava verið sera góð í ár. Og so ber til at fegnast um, at føroyingar fingu fyrsta stórmeistaran í talvi í hesum árinum. Í hesum nýggjársblaði fara vit á ferð ígjøgnum farna árið. Hetta er ikki ein altumfatandi uppgerð av øllum tí stóra og smáa, sum hendi í 2016, men heldur ein kavalkada av tí, sum Sosialurin sum blað hevði at bjóða sínum lesarum. Vit taka 
fram onkrar markantar greinar frá 2016, og taka ymsar smærri og størri hendingar frá árinum við. Vit taka saman um ítróttarárið, og eisini rógva vit aftur á ymiskar útsagnir frá fólki. Vónandi gevur hetta eitt inntrykk av einum sera fjølbroyttum blaði, sum kemur út tríggjar ferðir um vikuna. Við hesum Nýggjársblaði vil Sosialurin ynskja øllum sínum lesarum eitt gott og eydnuberandi nýggjár. Vit síggjast í 2017! 17 eitt ár verri enn 16 FARVÆL 2016 við Høgna Djurhuus T ey valdu ársins orð. Orðið hjá 2016. Sum tey fara at minnast 2016 fyri. Og tað er eitt orð so keðiligt sum hjúnabandslógin. Hon kom ikki so frægt sum í gildi í ár, 2016, kanska næsta ár, 2017. Tí ansast má sera væl eftir ikki at traðka á hógvarnar hjá kirkjuni. Kirkjan kann ivaleyst, nei, hon skal, tí hon sigst vera fyri øll, men hon vil ikki signa samkynd gift. Og tí má løgtingið sjálvandi akta. Eingin yvir sendistovu Guds. Men ársins orð kortini, hjúnabandslógin. Og tað er helst í lagi, hóast sera ósexut. Tí tað hevur ongan skund at útbyggja frælsisskerjingina. Bíðið bara til 2017 ella longur. Skal eg velja ársins orð, so verður tað Aleppo. Havi verið í Aleppo. Tað var í 1973. Tá var friður har, undantikið ein mann, sum dámdi menn, og beyð monnum heim við sær. Hann var arabari, men kallaði seg George, tí tað var evropeiskt. Ivaleyst er hann deyður nú, hann var ikki heilt ungur tá í 73. Var hann ikki deyður, áðrenn IS kom til Aleppo, hevur IS dripið hann. Tveitt hann út av onkrum taki høgt uppi, í navni onkurs guds og onkrar bókar. Eg var eisini heima hjá George. Hann var blíður. Men tað var ikki blíðskapur, sum mær dámdi, so eg fór. Gloymi ikki myrku trappuna útaftur. Aleppo. So lætt at siga hjá øllum. Nú stendur illa til í Aleppo. Tey nýfrelstu her hjá okkum gera sítt ítarsta fyri, at vit fáa ringa samvitsku. Tí tað er okkara skyld, at menn, kvinnur og børn verða dripin í Aleppo ella noyðast at flýggja haðani út í eina aðra óvissu. Okkara samvitska eigur at vera skitin. Einasti máti at tváa hana reina, er at fara djúpt í reyvalumman eftir pengum at geva teimum í Aleppo og aleppum, sum eru rýmd. Okkara abbar og ommur, okkara mammur og pápar, løgdu rygg og meira afturat til fyri at gera okkara samfelag til tað besta og tryggasta í heiminum. Men tað telur ikki við. Vit eiga at hava ringa samvitsku. Vit hava ongan rætt til at hava tað gott. Vit eiga at hava ringa samvitsku, tí vit hava tað so gott, og onnur hava tað so ringt. Latið okkum ikki virða tey, sum undan okkum stríddust, men taka á okkum skyldina fyri allar heimsins vanlukkur av manna ávum. Sum ein Jesus, sum sleipaði krossin við øllum heimsins syndum. Vit frætta hvønn einasta dag frá okkara miðlum, tá teir ikki telja lík í londunum, sum eru okkara ringa samvitska, at her í Føroyum er so sannliga brúk fyri øllum hasum milliónunum, sum vit senda av landinum. Hevur nakar brúk fyri neyðhjálp, eru tað føroyingar. Vágafólk noyðast at betala fyri at sleppa til Havnar, ætla tey heim aftur. Alt tað almenna, og tað eru vit øll, ekur á knøunum. Og so senda vit pengarnar av landinum. Og samvitskan er gullrein. Vónandi var tað ein fløvi hjá flóttabørnunum í Sýria, tá tey frættu um føroyingar, sum stóðu aftan fyri parlamentið í ófýsnum líkindum og hugsaðu um tey. Hoyrdi annars ongan grát úr Amnesty, tí ein ungur maður sunnaneftir varð avrættaður á gøtuni í Milano uttan rættarfund og uttan dóm. 2016 var enn eitt ár uttan nýskipanir. Um eitt ár verður galdandi lóg um vinnuligan fiskiskap longd fimm ár. Pensjónsnýskipanin kom eitt ár nærri pensjónsaldrinum (handan er gomul, men sum íslendingar siga, ein góð vísa verður ikki nóg ofta kvøðin). Stjórnarskipan. Hvør? Hvat eg vænti mær av 2017? Illveður her og yvirgang í øðrum londum. Vænta tær ongantíð meira enn tað, tú fært við fullari vissu, 217 prosent. 2017 verður eitt ár verri enn 2016. UMAFTURAFTURUM Gott nýggjár!