mánadagur 6. mars 2017síða 42

18 FÓTBÓLTUR 2017 FÓTBÓLTSBLAÐIÐ HJÁ MIÐLAHÚSINUM Hóast áhugi í fjør var frá fleiri øðrum feløgum, valdi Árni Fredriksberg at leingja sáttmálan við barndómsfelagið, NSÍ. Høvuðsorsøkin er, at hann trýr uppá at tað ber til at vinna við NSÍ. Álopssinnaði miðvallarleikarin, Árni Fredriksberg, fekk sítt gjøgnumbrot í 2012, tá hann tók ábyrgd á einum ungum NSÍ liðið, ið hevði mist fleiri av royndu leikarunum frá árinum fyri. Málsetningurin tá var greiður. Tað ráddi fyrst og fremst um at yvirliva. KRØVINI ERU HÆKKAÐI Síðani tá er nógv broytt í Runavík. Liðið hevur av álvara fótað sær aftur millum tey ovastu liðini í Føroyum, meðan umstøðurnar rundanum leikvøllin eisini eru broyttar nógv. Árni Fredriksberg heldur tó, at ítróttarliga trýstið, er tað sum er mest broytt í felagnum. – Tað er sjálvsagt stórur munur frá tí árinum, tá vit spældu eitt nýtt lið saman. Tað sum eg haldi er mest broytt, eru væntanirnar til liðið hjá okkum. Tá var tað bert ein spurningur um at yvirliva, meðan topp fýra í dag er vorðið eitt krav til felagið. Tá tað er sagt, eru umstøðurnar sjálvsagt eisini nógv betraðar seinnu árini, sigur Árni Fredriksberg. SÆR MØGULEIKA AT VINNA VIÐ NSÍ Farna kappingarár ljóðaði eitt skiftið, at fleiri onnur feløg vístu áhuga fyri Árna Fredriksberg. Árni Fredriksberg greiðir frá, at hóast áhugi var fyri honum frá øðrum feløgum, ynskti hann at vera verandi í NSÍ. – Fyrst og fremst havi eg tað ótrúliga gott í felagnum. Og so leingi sum eg síggi fyri mær, at tað er møguligt fyri at vinna við NSÍ, síggi eg onga orsøk til at fara til nakað annað felag, sigur Árni Fredriksberg. LANDSLIÐSSTEÐGURIN IKKI PERMANENTUR Seinastu árini hevur Árni Fredriksberg verið nógv inni í landsliðshitanum hjá Lars Olsen. Men til seinasta dystin í fjør ímóti Sveis á útivølli, boðaði Árni Fredriksberg frá, at hann tók ein steðg frá landsliðsfótbóltinum. Talan er tó um ein fyribils steðg, orsakað av krevjandi útbúgving. – Eg ætli ikki at steðgurin á landsliðnum skal vera permanentur, og tí havi eg ætlanir um at melda meg tøkan til landsliðið aftur einaferð í framtíðini. Eg kendi tó á mær akkurát tá, at landsliðið bleiv ov nógv í mun til arbeiði og útbúgving, sigur Árni Fredriksberg. ÆTLA SÆR FLEIRI STIG ENN Í FJØR NSÍ hevur í vetur styrkt seg væl, har tríggir nýggir leikarar eru knýttir afturat hópinum í Karl Løkin, Jann Ellingsgaard og Bárði J. Hansen, meðan frágongdin hevur verið lítil frá farna kappingarárið. Og tá vit spyrja Árna Fredriksberg um vónirnar til komandi kappingarár, er hann eisini bjartskygdur. – Vit ætla fyrst og fremst at gera tað betri enn farna kappingarár. Tá fingu vit 55 stig, og í ár skulu vit hava fleiri enn 55 stig. So kunnu vit fáa at síggja hvussu langt tað kann røkka, greiðir Árni Fredriksberg frá at enda. TRÝR UPPÁ AT TAÐ BER TIL VIÐ NSÍ  LYKLASPÆLARIN Klæmint A. Olsen Klæmint A. Olsen, sum seinastu fimm kappingarárini á rað hevur verið toppskjútti í Effo-deildini, er stóra stjørnan á liðnum hjá NSÍ. Hann stendur støðugt á rætta staðnum, og verður ein av lyklunum til at tryggja NSÍ eitt gott kappingarár..  GJØGNUMBROTIÐ Andri Benjaminsen Kviki og evnaríki leikarin, ið farna kappingarár fekk sínar fyrstu minuttir á besta liðnum hjá NSÍ. Í ár væntast hann at fáa fleiri minuttir á liðnum enn farna kappingarár.  VENJARIN Anders Gerber Talan er í ár um annað kappingarárið í føroyskum fótbólti hjá NSÍ venjaranum. Hann kennir tí betur til føroyskan fótbólt nú, enn hann gjørdi fyri einum ári síðani, og ætlar at NSÍ skal avrika betur enn farna kappingarár.  MÁLIÐ Topp trý Seinastu árini hevur NSÍ av álvara fótað sær aftur í oddinum av føroyskum fótbólti, har felagið hevur havt framgongd hvørt kappingarár. Farna kappingarár fór liðið eitt pláss aftur í mun til fyri tveimum árum síðani, men fekk fleiri stig. Í ár er NSÍ ein av stóru FM-biðlunum. ÁRNI FREDRIKSBERG Fyrst og fremst havi eg tað ótrúliga gott í felagnum