týsdagur 23. mai 2017síða 38

24. MAI 2017 6 Sosialurin 90 ár: Millum fólkaræði og fíggjartøl Kvøða til Sosialin á 90 ára føðingardegi blaðsins 
 O kkara kjakmentan er serstøk. Alt ov nógv fólk halda seg aftur í almenna orðaskiftinum, og tí hevur kjakmentanin ofta vantandi brodd. Ein ovurhonds stór áherðsla á at taka fyrilit fyri øllum í tí lítla føroyska samfelagnum tykist vera ein høvuðsorsøk til vantandi áhugan at taka lut í almenna orðaskiftinum. Í hesum veruleika hevur tíðindablaðið Sosialurin virkað seinastu 90 árini. Saman við hinum miðlunum hevur Miðlahúsið í Vágsbotni havt ein týðandi leiklut í at birta upp undir eitt opið samfelag, tryggjað borgarunum og samfelagnum dygdargott miðlainnihald. Okkara fólkaræði er neyvt tengt at, hvussu miðlarnir í einum landi hava tað. Tí er tað harmiligt, at føroysku tíðindamiðlarnir seinastu mongu árini tíverri hava havt trupul kor at virka undir. Tað hevur verið átrokandi neyðugt hjá miðlum at tillaga seg skjótt og støðugt seta seg inn í nýggja veruleikan, sum nýggja tøknin bjóðar. Hetta er ikki bara galdandi í Føroyum, men kring allan heimin. Sosialurin er enn livandi í eini tíð, har tað er torført hjá miðlum at fáa endarnar at røkka saman. Tað hevur rós uppiborið og vísir, at Sosialurin hevur megnað at fylgja við tíðini. Men tað er eisini týdningarmikið, at miðlar ikki tillaga seg treytaleyst eftir, hvat fær endarnar at røkka saman. Sum borgarar í einum fólkaræði mugu vit vita, at vit kunnu hava álit á einum tíðindamiðili. Vit mugu ansa eftir, at sølutøl og fíggjarlig atlit ikki fara at viga meira enn at viðgera mál við neyvleika og fakta. 
 Tá ein persónur fyllir 90 ár, velur viðkomandi vanliga at taka fótin av spitaranum. Tá tykist resið ikki vera stressandi, og tú kanst líta aftur á eitt langt lív við góðum treysti. Men tað er øðrvísi hjá einum miðili. Nú Sosialurin fyllir 90 ár, so ber illa til hjá hesum miðili at njóta framd avrik og hvíla seg, tí dagin eftir stendur ein nýggjur dagur við nýggjum avbjóðingum, har neyðugt er at spyrja seg, hvussu tann næsti Sosialurin kann gerast betri fyri at kunna fylgja við tíðini. 

 Júst hetta við at fylgja við tíðini er nakað, sum eyðkennir Sosialin. Í 1997 varð Netsosialurin tikin í nýtslu, og í oddagrein í hesum sambandi helt Sosialurin fyri, at hetta bert var ein natúrlig gongd. Hetta var sambært teimum ikki ein kollvelting, men ein sjálvsøgd dagføring. Síðani eru nógvar broytingar gjørdar í miðlalandslagnum. Partapolitiska pressan er í stóran mun burtur, og nýggir talgildir sosialir miðlar spæla ein stóran leiklut í gerandisdegnum hjá fólki. Blaðsølan hevur verið støðugt minkandi kring heimin, og gongdin á internetinum hevur havt við sær, at fólk eru vorðin von við at lesa tíðindi ókeypis. Hetta hevur við sær avbjóðingar hjá øllum av teimum siðbundnu miðlunum. Eisini Sosialinum. Tað merkir, at niðurskerjingar hjá bløðum eru óumberligar. Tey fíggjarligu atlitini tykjast at hava nógv at siga. Men enn megnar Sosialurin at framleiða tilfar til trý tíðindabløð á prent um vikuna. Tað er einasta blað í Føroyum, sum megnar tað í 2017. Tað er eitt flott avrik og eisini ein staðfesting av, at Sosialurin heldur fast við søguliga blaðmiðilin, sum av mongum í langa tíð hevur verið skýrdur at vera á veg í søguna. Persónliga eri eg sannførdur um, at enn hevur prentmiðilin eina bjarta framtíð, um raðfest verður rætt. 

 Sosialir miðlar hava sum sagt gjørt eitt stórt inntriv í gerandisdagin hjá fólki og hava havt nógvar positivar eginleikar við sær. Tó so má staðfestast, at siðbundnu miðlarnir hvønn dag merkja avleiðingarnar av, at tíðindi er nakað, tú í stóran mun fært ígjøgnum sosialar miðlar sum Facebook. Tað kann vera trupult hjá fólki at finna út av, hvat er rangt, og hvat er rætt á Facebook, og her hava miðlar sum Sosialurin eina týdningarmikla uppgávu fyri framman. Tað er av stórum týdningi, at Sosialurin eisini fram eftir megnar at bera fram neyv og faktuel tíðindi. Í eini tíð, har nógvar meiningar verða havdar á lofti, er av stórum týdningi at skapa yvirlit og bera tíðindi fram á sakligan hátt og tryggjað borgarunum og samfelagnum dygdargott miðlainnihald. Saman við hinum privatu miðlunum skal Sosialurin geva almenna public service-stovninum Kringvarpi Føroya eina neyðuga og ynskiliga kapping, sum er við til at tryggja dygdargott innihald. Tað skal eisini vera mín vón, at Sosialurin heldur á við at birta upp undir eitt opið samfelag, har almenna orðaskiftið er ríkt og fjølbroytt. At enda vil eg ynskja Sosialinum hjartaliga til lukku við 90 ára degnum við ynski um, at mong fleiri ár eru honum í væntu! Aksel V. Johannesen, løgmaður