mánadagur 29. mai 2017síða 40

SOSIALURIN MAI 2017 16 – EG MELDAÐI MEG TIL EITT SKEIÐ, HAR EG SJÁLV SKULDI LÆRA AT TAKA MYNDIR. MEN TAÐ VÍSTI SEG, AT SKEIÐSHALDARIN VILDI GERA EINA MYNDATØKU VIÐ MÍNUM KLÆÐUM. ONKUNTÍÐ ER MAN ÓHELDIGUR, MEN HESAFERÐ FEKK EG VERULIGA NAKAÐ FANTASTISKA STUTTLIGT OG DYGDARGOTT BURTURÚR, SIGUR SISSAL KRISTIANSEN, SNIÐGEVI, SUM HITTI VÍÐAGITNAN MYNDAMANN, SUM MILLUM ANNAÐ HEVUR TIKIÐ MYNDIR AV YOKO ONO. Myndatøka í Tokyo BARBARA HOLM barbara@sosialurin.fo Sissal Kristiansen hevur ein serstakan tokka til Japan. Í mong ár hevur japanska mentanin hugtikið hana og tað var orsøk til, at hon herfyri fór alla leiðina til Japans at læra um mystisku mentanina. Á langa túrinum vildi hon tó ikki bara sita fyri einki og ganga og mala í býnum. Tí valdi hon at fylgja einum øðrum dreymi samstundis – at melda seg til eitt skeið, har hon skuldi læra at taka myndir. Tá hon meldaði seg til skeiðið fekk hon samband við fotografin Alfi, sum var skeiðshaldari. Hesin setti seg at hyggja eitt sindur nærri eftir, hvør hesin næmingur úr Føroyum var, og tá ið hann sá vørurnar, sum Sissal Kristiansen framleiðir undir navninum “Shisa Brand”, varð hann seldur. – Hann bað meg taka nøkur Shisa pløgg við, so at vit kundu gera eina myndatøku. Eg helt bara, at eg sjálv skuldi taka myndirnar, sigur Sissal Kristiansen. Tað, sum skuldi vera eitt hálvdagsskeið endaði við at varða í tríggjar dagar. Fyrsta dagin lærdi Sissal um at taka myndir. Næsta dagin fóru Sissal og Alfi runt í Tokyo fyri at finna góð støð at taka myndir í, og triðja dagin fóru tey bæði, modellin Mari og hárfríðkanar- og smyrlskvinnan Alexandria undir at taka myndir. Nakrar myndir, sum skuldu vísa seg at blíva tær bestu, sum víðagitni Alfi hevur tikið – í øllum førum í ár. FRÁ YOKO ONO TIL SHISA Tá ið ein meldar seg til skeiðshald av ymiskum slag, so er einki garanti fyri, at tað faktist er dygdargott og læruríkt. Tí var Sissal í iva um, hvat hon skuldi vænta av hesum skeiði. Men komin í samband við Alfi vísti tað seg, at hann í mong ár hevur tikið myndir av kendum fólkum, hendingum og øðrum kring allan knøttin. Millum annað er hann kendur fyri eina serliga mynd av Yoko Ono, sum hann tók fyri nøkrum árum síðani. Tí vanligt er , at Yoko Ono sæst í sólbrillum. Men Alfi fekk heimskendu frúuna hjá John Lennon, sála, at lata seg úr sólbrillunum og vísa síni eygu fyri myndatólinum. – Eg føli meg sera beæraða av, at hava fingið so flottar myndir tiknar av einum so dugnaligum manni. Fyrsta myndin hann tók handan dagin var perfekt, og síðani gekk tað sum eftir ánni. Sjálvandi hendir alt møguligt óvæntað til myndatøkur, og soleiðis var tað eisini hendan dagin. Men hann dugir at fáa nógv gott burturúr óansæð, sigur Sissal Kristiansen. ER IKKI TIL TAÐ PENA – Eg eri ikki sum nakrir aðrir sniðgevar her um leiðir. Mær dámar ikki so væl tað pena og yndiga. Mær dámar betri tann ráða stílin, hóast eg haldi, at hitt eisini riggar væl til onnur pløgg. Míni pløgg eru tó meira rá og rigga væl til tann kantuta stílin í Tokyo, sigur Sissal Kristiansen. Í hennara høvdið hevur Shisa og Japan altíð verið eitt gott match. Men tað er bara í hennara høvdið, tí hon hevur ongantíð roynt tað í praksis – ikki fyrr enn hesar myndirnar vórðu tiknar. – Tað er so stuttligt at síggja, at alt tað, sum eg hevði ímyndað mær riggaði so væl saman, ger akkurát tað. Tað komplimenterar hvønn annan so væl, sigur Sissal Kristiansen, sum tó má viðganga, at hasar reyðu strikurnar undir eygunum á modellini, eru nakað, sum hon ikki hevði gjørt av sínum eintingum. – Eg var jú á útibana, tí teirra stílur er heilt øðrvísi enn okkara. Og vanliga hevði eg ongantíð hugsað um at koyra reyðar strikur undir eyguni, men tað riggar barasta so væl. Og eg havi hoyrt nógv postivit um tað í Føroyum, sigur Sissal Kristiansen. Sissal hevur ein stóran kærleika til Japan, og tí er tað helst ikki so løgið, at hennara klæðir í japanskum umhvørvi rigga. – Eg elski at síggja Shisa uttanfyri Føroyar. At síggja og presentera klæðini í einum øðrum umhvørvi. Eg tími ikki vakrar náttúru myndir meira, so hatta er ótrúliga stuttligt fyri meg og fyri Shisa, sigur Sissal Kristiansen. TOKYO FULLGER SHISA – EIN FANTASTISK, ÓVÆNTAÐ UPPLIVING Shisa Brand fashion shoot í Tokyo. Photographer: Alfie Goodrich Model: Mari HMU: Alexandria Oxspring Assistant: Joe Goodrich MYNDAMAÐUR: ALFIE GOODRICH MYNDAMAÐUR: ALFIE GOODRICH