týsdagur 30. mai 2017síða 14

Mikudagur 31. mai 2017 · Nr. 63 14 Sosialurin Bamsur á skaðastovuni Landssjúkrahúsið skipar fyri einum serligum og øðrvísi tiltakið til børnini, tá dyrnar verða latnar upp á Landssjúkrahúsinum til Føroya fyrstu bamsuskaðastovu. Tí í staðin fyri at viðgera fólk, ið eru komin til skaða, so eru sjúklingarnir hendan dagin bamsur. Til ber at taka sína bamsu við á sjúkrahúsið, har læknar og sjúkrarøktarfrøðingar standa klár at kanna og viðgera bamsur, ið eru sjúkar ella komnar til skaða. Børnini fáa eina frágreiðing um hvat er á vási við bamsuni, og sleppa sjálvi at vera við til at hjálpa bamsuni. Harumframt fáa børnini høvi at vitja aðrar ússaligar bamsur í ambulansuni sum stendur uttanfyri LS. Til gongu í Havnini Sum siðvenja er á mentanarnáttini, so verður skipað fyri eini ørgrynnu av áhugaverdum gongutúrum ymsastaðni í býnum. Felagið Tórshavn skipar fyri einum spákingar og skákingartúri úr Kongsgili oman í Miðbýin. Túrurin byrjar við Kongsgil, tá bussleið 1, ið koyrir úr Steinatún klokkan 18.33, er komin. Føroya Ferðaleiðarafelag skipar eisini fyri einum túri á degnum, ið byrjar við standmyndina av Nólsoyar Páll klokkan 19. Gingið verður út á Reyn og Tinganes við einum ferðaleiðara, ið fer at greiða frá ymiskum í gamla býarpartinum. Um onkur síðan ynskir at fáa meira at vita um hendan søguliga partin av býnum, so ber til at møta á Tinganesi klokkan 20 og 21, har landsstýrið bjóðar til rundvísing í nøkur av gomlu húsunum á Tinganesi. Í ár verður vitjað í Sjóbúðini, Vektarbúðini, Salinum og í Skansapakkhúsinum. Uppliva Landssjúkrahúsið Síðstu árini hevur Landssjúkrahúsið bjóða almenninginum ymiskar gongutúrar í bygninginum í samband við mentanarnáttina. Hesaferð verður byrjað klokkan 18.30 og klokkan 19 við reyðu bygningarnar á Eirargarði 16. Byrja verður við bygningunum á Eirargarði, og gingið verður millum bygningarnar og tunnilin, meðan greitt verður frá psykiatriini og Eirargarði. Síðan verður gingið gjøgnum tunnilin undir J.C. Svabosgøtu oman í grøna bygningin. Í grøna bygninginum er ein framvísing og styttri frágreiðing um arbeiðið í sektiónsstovuni, umframt at fólk fáa høvi at ganga tey 164 trapputrinini upp á takið á grøna bygninginum. 110 ár við telefonbókum Í samfull 110 ár hevur Føroya Tele prentað telefon­bøkur til Føroya fólk, men tað steðgar í ár. 1. juni verður seinasta telefonbókin borin føroysku heimunum, og í tí sambandi skipar Føroya Tele fyri eini framsýning um hendan táttin av teirra virksemi seinastu 110 árini. Til ber at vitja framsýninga hjá Føroya Tele í Tele­búðini á gongugøtuni. Føroya sterkasti á gongugøtuni Nú Burn Fitness er flutt oman á gongugøtuna, so er tað eitt gott høvi hjá Føroya sterkasta manni, Bjarna Nielsen, at taka lut í mentanarnáttini. Bjarni Nielsen fer at vísa sína styrki við at gera eitt Yoak Walk uttanfyri Burn Fitness, har børn samstundis kunnu sita á reiðskapinum. Sangur í gudshúsum Trúarlív fyllir nógv í føroyska samfelagnum, so tað er ikki óvæntað, at fleiri tiltøk í mentanarnáttini onkursvegna eru knýtt at ríka trúarlívinum í býnum. Bæði Mariukirkjan og Havnar Kirkju hava opið hús á degnum og leggja karmar til ymiskar tónleikaframførslur. Klokkan 21 hevur Føroya Klarinettorkestur eina tónleikaløtu í Mariu kirkjuni, meðan tríggjar ymiskar framførslur eru í dómkirkjuni millum klokkan 20 og 22.30, harímillum ein framførsla við Havnarkórinum undir leiðslu av Leif Hansen klokkan 21. Eisini Ebenezer hevur opið hús á mentanarnáttini, har skipað verður fyri eini sangløtu klokkan 21 við Ebenezerkórinum, ungdómskórinum og øðrum. HAVNIN LETUR DYRNAR UPP