týsdagur 30. mai 2017síða 16

Mikudagur 31. mai 2017 · Nr. 63 16 Sosialurin JAZZ FYLLIR PERLUNA Jazztónleikur fer at streyma út á mentanargøtuni Tórsgøtu, tá Perlan er karmur um eitt jazzkvøld við Havnar Jazzfelag. Vitjandi fáa møguleikan til at uppliva fýra ókeypis konsertir millum klokkan 20.00 og 23.00. Fyrstur á skránni er veteranurin innan føroyskan jazztónleik Kristian Blak, ið fyrsta hálvan tíman framførir einsamallur við einum klaveri. Klokkan 20.30 legst danin Karsten Vogel aftrat við síni saksofon, og fara teir báðir at framføra jazztónleik næsta hálva tíman. Klokkan 21.00 er tað bólkurin Gangandi Skógvar við Rasmus Vigant Samuelsen á keys, Bergur Fonsdal á bass, og Harald Fonsdal á trummum, ið framførir jazztónleik næsta tíman, áðrenn útgavukonsertina klokkan 22.00, tá bólkurin Alda Magna við Kim Kristensen á klaver, Leivur Thomsen á gittar, Arnold Ludvig á bass, Rógvi á Rógvu á trummum, Karsten Vogel á saksofon og Sigurdur Flosason á saksofon endar kvøldið í Perluni. Nýggj kafé letur upp Kafélívið í høvuðsstaðnum, og serliga í gongugøtuni, er vorðið munandi ríkari síðan seinastu mentanarnátt, og fer tað uttan iva at síggjast aftur hendan dagin. Tvær nýggjar kaféir, Gómagott og Burn Djúsbar og café, hava nevniliga latið dyrnar upp seinasta árið ovast í Niels Finsens gøtu, umframt at kaféin í Býarbókasavninum, Tórs kafé, hevur fingið nýggjar eigarar og navn. Á sjálvari mentanarnáttini letur enntá ein nýggja kafé upp, tá Paname letur upp í H.N. Jacobsen bókahandli, har Visit Tórshavn áður hevur hildið til. SÍGGJ HAVNINA BLÓMA Summarið nærkast og tað sæst aftur í náttúruni. Blómur og trø standa í fullum blóma, og sum siðvenja er, so fáa vitjandi ein serligan møguleika at uppliva hesa ársins tíð, tá nakrir av flottu havunum í høvuðsstaðnum verða latnir upp fyri almenninginum. Ríkisumboðið bjóðar innar í vakra Amtmans­garðin, ið verður opin fyri almenninginum millum klokkan 18.00 og 22.00, har tað eisini er møguleikin at støkka inn á gólvið og síggja húsini hjá Ríkisum­boðnum. Harumframt er Bojsensgarðurin, ið er gamli urtagarðurin aftanfyri H.N. Jacobsen Bókahandil, opin millum klokkan 17.00 og 23.00, har Kórið Glymur, undir leiðslu av Paula Hansen, fer at framføra klokkan 20.00. Eisini ber til at leggja leiðina framvið vakra umhvørvið við gróðurstøðina í Hoydølum, sum klokkan 17.00 hevur eina rundvísing og frágreiðing um framleiðsluna og royndarvirksemið á Gróðurstøðini. Gjøgnum dagin verður eisini skipað fyri træeyðkennis- kapping fyri børnum í øllum aldri, umframt at hugni verður við báli og sneisabreyði. Skattaveiða fyri tey smáu Barnabókasavnið, ið heldur til í Býarbókasavninum, skipar á mentanarnáttini fyri eina skattaveiðu fyri børnini. Kappingin er skipað soleiðis, at tað verður ein skattaveiða við orðum og bókstavum á barnabókasavninum Skattaveiðan er býtt upp í tríggjar bólkar, og ein vinnari verður funnin í hvørjum bólki, men øll sum luttaka fáa eitt lítið tinganest fyri luttøkuna. Dystur í EFFO-deildini Okkurt verður eisini til tey fótbóltsáhugaði á mentanarnáttini. Klokkan 19.00 verður dystur í bestu deildini hjá monnum, tá Skála tekur móti oddaliðinum KÍ á Tórsvølli. Harumframt ber til at børnum og øðrum at fáa autografar frá sínum fótbóltsfyrimyndum, tá leikararnir hjá besta liðnum hjá B36 skriva autografar í Intersport í Jónas Broncksgøtu klokkan 19.00. Við Óla handan gravirnar Í gamla kirkjugarði í Dr. Jakobsens gøtu goymir ein ørgrynna av søgum seg um fólk, ið á hvør sín hátt, hava verið við til at leggja lunnar undir føroysku tjóðina. Neyvan er tað nakar, ið kennir meira til søgurnar um hesa persónar enn Óli Jacobsen, ið seinastu árini hevur skrivað fleiri greinar við støði í kirkjugarðinum í Vikuskiftis-Sosialinum. Á mentanarnáttini verður høvi at ganga ein túr við søgukøna frásøgumanninum, ið fer at vísa runt og greiða frá søgum úr kirkjugarðinum. HAVNIN LETUR DYRNAR UPP