hósdagur 6. juli 2017síða 32

FRÍGGJADAGUR 7. JULI 2017 SOSIALURIN 78 32 BAKSÍÐAN ÁRNI GREGERSEN Summartíðin í Føroyum er løgin. Partar av vinnuni fara langt niður í tempo, meðan onnur arbeiða meira. Sjálv ferian – tað vil siga frá tey fyrstu fara í summarfrí til tey seinastu koma aftur, er ómetaliga long. Í hesum tíðarskeiði koyrir samfelagið meira ella minni við hálvari ferð, burtursæð frá ferðavinnuni, sum hevur mest ferð á um summarið. Mitt í vikuni hendi ein syndarlig vanlukka við Saksun, tá ið tvey útlendsk ferðafólk duttu oman og annað - ein maður – doyði. Okkum so líkt, so gevur hendingin høvi enn einaferð at kjakast um ferðavinnuna. Ferðavinnan er ein vaksandi vinna um okkara leiðir og eisini her á landi. Tað hevur eydnast at fáa nógv fleiri fólk at koma hendanvegin, men ivasamt er um vit eru tilreiðar at taka ímóti so mongum fólkum. Tað krevst nógv av okkum at veita neyðugar tænastur á øllum økjum – eisini í ferðavinnuni. Her hugsi eg bæði um gistingar, mat og um at hjálpa fólki sum koma higar. Sjálvandi skal hettta – eins og aðrastaðni – gerast fyri gjald, men tænastan skal vera klár. At ssamfelagið hevur eina summarfrítíð sum er so long, ger, at vit ikki hava eitt samfelag, sum riggar gjøgnum alt árið. Tann ljósa tíðin er annars besta tíðin hjá fleiri vinnum at arbeiða í. Her verður hugsað um byggivinnuna til dømis. Tað er í hesum døgum best er at arbeiða uttandura og fáa nógv frá hondini. Men apropos byggivinnuna. Hon hevur ómetaliga nógv at gera, men sum frálíður vísir tað seg, at hon eisini ger stór mistøk, sum kosta byggiharrunum nógv. Í dag vita vit at siga her í blaðnum um fleiri stórar og dýrar bygningar hjá Tórshavnar kommunu, sum bæði eru fongdir við roti og soppi. Skal ikki gera meg klókan uppá hví slíkt hendir, men vit kunnu staðfesta, at hetta hendir alt ov ofta. Seinastu árini hava vit mong dømi um, at tingini ikki eru gjørd eftir forskriftum og hetta hevur kostað ómetaligar upphæddir. Nú er sjálv byggivinnan eitt, men mær vitandi verða stóraar upphæddir settar av til eftirlit, tá ið størri bygningar verða gjørdir. Viðhvørt hugsi eg við mær sjálvum: hvat gera tey sum hava eftirlit? Skulu tey bert, tá ið arbeiðið er liðugt siga byggiharranum frá, at nú eru húsini liðug? Ella skulu tey ansa eftir at alt verður gjørt á rættan hátt? Eg veit ikki, men eg haldi ikki tað gevur meining, at ein byggiharri skal gjalda risaupphæddir fyri eftirlit, um tað vísir seg, at tá ið bygningurin stendur liðugur, so er bert stutt tíð, so er hann byrjaður at rotna ella er fongdur við soppi. Tað minnir meg eisini um nýggju byggireglugerðina, har onkur hevuyr mist yvirblikkið og hevur nágreina so langt niður, at vanlig fólk ikki longur kunnu gera vanligt viðlíkahald uttan at tað er góðkent av onkrum alment settum persóni. Aftur her haldi eg vit missa yvirblikk og grava okkum niður í smálutir, heldur enn at síggja stóru mnyndina og forða fyri at stóru mistøkini henda. At lata almenn sett starvsfólk sita og taka støðu til um garðurin skal hava hendan ella handan litin og at vindeyga í einum vanligum húsum skulu uppfylla krøv til útsjónd. Eg meini tað! Kundi hugsa mær at vita, hvør tað er sum skal hava alt hetta “eftirlit” sum vit hava eina rúgvu av dømum um, ikki virkar. Vóni ikki at støðan í hesi vinnu, sum júst nú hevur nógv um at vera, er sum onkur tók til: “Føroyingar duga faktisk ikki at byggja nakað, sum er størri enn eini vanlig Norðsetur-hús.” Ája! Fyrireikarin Gudmundur Djurhuus boðar nú frá, at MíttLand verður hildið á Femøren á Amager dagarnar 15. og 16. september. MíttLand er tónleikatiltak, sum varð hildið fyrstu ferð í 2013 og serliga er ætlað útisetum í Danmark. Føroyskir tónleikarar og sangarar spæla á tiltakinum, sum eisini bjóðar føroyskan mat og annað. MíttLand kunnger 13 føroyskir sangarar og bólkar til tiltakið. Tey eru: Alex Bærendsen, Eyðun Nolsøe, Halleluja Sofus, Hamradun, HitMenn,Jens Marni Hansen, Kristina Bærendsen, Marnar á Lofti, Sámal Ravnsfjall, Signar í Homrum, Stanley Samuelsen, Tinganest og Uni Debes and The Tom Cats. - Talan er um royndar sangarar og tónleikarar, ið bæði eru pallvand og væl umtókt, so tí kunnu tey, ið koma til MíttLand, vænta sær nakað av tí besta, føroyskur sangur og tónleikur kann bjóða á palli, sigur Gudmundur Djurhuus, fyrireikari. Forsølan til MíttLand er byrjað. Ája! Árni Gregersen, journalistur, skrivar MÍTTLAND VERÐUR NÚ AFTUR UTTANDURA Eftir at tónleikatiltakið MíttLand í fjør varð hildið í Amager Bio, fer tiltakið nú útaftur í fría luft