týsdagur 19. desember 2017síða 66

Mikudagur 20. desember 2017 34 Sosialurin Jólablaðið 2017 Teir bestu jólafilmarnir Filmsummælarar fagna sjáldan jólafilmum, og tað kemur heldur ikki ofta fyri, at jólafilmar vinna virðislønir. Kortini dáma teimum flestu at síggja teir somu jólafilmarnar, sum altíð enda væl, hvørji jól. Nógvir listar eru yvir teir bestu jólafilmarnar, sum eru gjørdir. Hóast listarnir ikki eru heilt líka, so eru tað fleiri filmar, ið ganga aftur á teimum ymisku listunum. Talan er um bæði stuttligar og rørandi filmar, har øll fáa okkurt burturúr. “It´s a Wonderful Life” Ein filmur, sum er á øllum listum yvir bestu jólafilmarnar, ið nakrantíð eru gjørdir, er It´s a Wonderful Life við James Stewart í høvuðsleiklutinum. Filmurin, sum kom út fyri meira enn 70 árum síðani, er um ein eingil, ið verður sendur av himli at hjálpa einum ráðaleysum manni í sjálvmorðstonkum og vísa honum, hvussu lívið hevði verið, um hann ongantíð hevði verið til. Filmurin, sum kom út í 1946, er ein vakur filmur um at virðismeta lívið. “Love Actually” Eisini filmurin Love Actually er á flestu listum yvir jólafilmar, sum verða mettir at vera millum teir allar bestu. Ein røð av fremstu bretsku sjónleikarunum eru við í romantiska jólaskemtifilminum. Teirra millum eru Hugh Grant, Keira Knightly, Liam Neeson og Emma Thompson. Filmurin snýr seg um lívið hjá átta sera ymiskum pørum, sum øll dragast við ymiskar trupulleikar við kærleikslívinum í London í desember mánaði. Filmurin kom út í 2003. “Elf” Ein annar skemtifilmur á listunum yvir bestu jólafilmarnar er Elf frá 2003. Will Ferrell hevur høvuðsleiklutin sum maðurin Buddy, ið er uppvaksin hjá vættrunum hjá jólamanninum á Norðpólinum. Hóast Buddy er nógvar ferðir størri enn hinir vættrarnir, so er hann sannførdur um, at hann er ein vættur. Men so verður hann sendur til New York at leita eftir pápa sínum. Pápin er á listanum hjá jólamanninum yvir tey, sum ikki skikka sær serliga væl. “Miracle On 34th Street” Filmurin er frá 1947, og hann verður framvegis hildin at vera millum bestu jólafilmarnar nakrantíð. Filmurin er um ein ungan sakførara, ið átekur sær at verja ein gamlan mann í rættinum. Gamli maðurin verður innlagdur á sinnissjúkrahús, tí hann vil vera við, at hann er jólamaðurin. Í rættinum roynir ungi sakførarin at sannføra dómaran um, at gamli maðurin veruliga er jólamaðurin. Filmurin er innspældur av nýggjum fýra ferðir, síðani hann kom út fyrstu ferð. “The Santa Clause” Skemtifilmurin við Tim Allen í høvuðsleiklutinum er um tann fráskilda Scott Calvin, ið er sera misnøgdur við, at fyrrverandi kona hansara ikki hevur fortalt fyri seks ára gamla soni teirra, at jólamaðurin er ikki til. Av óvart verður Calvin atvoldin til, at jólamaðurin dettur av tekjuni og doyr. So er ikki annað at gera hjá Calvin enn at lata seg í jólamansklæðini og yvirtaka skyldurnar hjá jólamanninum. Filmurin kom út í 1994. “The Polar Express” Hetta er søgan um ein smádrong, sum so fegin vil trúgva upp á jólamannin. Eina náttina stígur hann inn í eitt gandatok, og saman við fleiri øðrum børnum fer hann á eina spennandi og læruríka ferð til jólamannin á Norðpólinum, har hann lærir nógv um seg sjálvan, vinalag og dirvi. Filmurin kom út í 2004, og er at finna á listunum yvir teir bestu jólafilmarnar. “A Christmas Carol” Filmurin byggir á eina stuttsøgu hjá Charles Dickens frá 1843 um tann illa lýdda Scrooge, sum hatar jólini og alt tað, sum tey umboða. Hann hugsar bara um at forvinna pening. Men jólanátt koma tríggir andar úr fortíðini, nútíðini og framtíðini til Scrooge og geva honum ein seinasta møguleika at broyta atburð. Stuttsøgan er lagað til film fleiri ferðir. Tann fyrsti kom í 1938, og tann nýggjasti er frá 2009 við Jim Carrey í leiklutinum sum Scrooge. Filmurin verður mettur at vera ein tann besti jólafilmurin, sum nakrantíð er gjørdur. Framhaldá síðu 36