týsdagur 19. desember 2017síða 70

Mikudagur 20. desember 2017 38 Sosialurin Jólablaðið 2017 DROYM TEG BURTUR JÓLINI ERU GÓÐ VIÐ MATI OG SAMVERU, OG VETURIN KANN VERÐA HUGNALIGUR VIÐ MYRKRI OG KULDA, MEN HETTA ER KANSKA EISINI TÍÐIN, TÁ IÐ EIN LØTA KANN BRÚKAST TIL AT DROYMA SEG BURTUR Í ONNUR LOND OG FÁA ONKUR HUGSKOT TIL EINA FERÐ Í KOMANDI ÁRI. HER ERU NØKUR BOÐ UPPÁ, HVAGAR LEIÐIN KANN GANGA – DROYM! Barcelona Seinastu árini eru føroyingar í stórum tali farnir at ferðast til Barcelona og leiðina rundan um katalanska stórbýin, og hetta er eitt trygt val. Barcelona kann bjóða alt frá summari, sól og strond, til góðan mat, mentan og arkitektur. Ein framúr býur at vitja, og eitt gott øki at halda feriu í. At føroyska flogfelagið flýgur beinleiðis til Barcelona um summarið, hevur gjørt ferðina uppaftur lættari. Iran Er Barcelona tað trygga valið, vildi onkur sagt, at hetta er tað ótrygga valið, men tað er blivið meira vanligt at ferðast í søguríka Iran. Danska uttanríkisráðið mælir frá ferðum til økini við markið til Afghanistan og Irak, men aðrastaðni í landinum ber til at halda spennandi feriu. Iran er eitt stórsligið land við aldargamlari søgu, livandi mentan og góðum mati – ein miðdepil í fornaldarsøgu. Hevur tú dirvið at royna nakað øðrvísi, er Iran eitt gott boð til ferð í 2016. St Helena Føroyingar kenna helst St Helena frá Oyggjaleikunum, har lítla oyggjalandið í Suðuratlantshavinum luttekur. St Helena liggur fjarskotið millum Afrika og Suðuramerika, men í februar fáa tey flogvøll, og tá verður gjørligt at flúgva til oynna – eitt nú úr Onglandi. Hetta fer at gera tað lættari at vitja oynna, har Napoleon sat fangi eitt skifti. Eru Føroyar fjarskotnar og óspiltar, stendur bretska oyggin St Helena lítið aftanfyri sum ferðamannaland, og har er stórsligin náttúra og søguliga støð at vitja. Cuba Hevur tú droymt um at uppliva kommunistiska Cuba, sum við síni ókommersiellu og afturhaldandi støðu hevur verið sum ein tíðarlummi í Karibia, er gylta løtan nú. Sambandið millum Cuba og USA er blotnað, og tað fer helst at føra við sær, at amerikanarar, ið ikki hava kunnað ferðast beinleiðis til Cuba, fara at floyma til landið. Cuba er hugtakandi at vitja – líkmikið um tú leitar tær inn á smá matstøð í pulserandi Havana, umm tú fert á hestbaki út í Vinales dalin, ella um tú fært hug at dansa salsa við teimum lokalu í Trinidad. Kypros Hugsar tú um eina trygga sólferiu, sum tað ikki er ov langt at ferðast til, er Kypros ein góð loysn. Har fært tú júst tað, tú hevur hug til – og tað er sjálvandi undir høgari sól og góðum hita. Er talan um familjuferð, ber til at finna frálík hotelløki til tað, og vilt tú hava luksus og elegansu uttan børn, finnur tú eisni marglætishotell fyri rímiligan kostnað. Vietnam Blíða og fyrikomandi fólkið í Vietnam gera ferðir til landið hugaligar. Vietnam kann bjóða spennandi ferðamál – har eisini nógv ferðafólk eru – og smáar perlur kring landið, har tú kanst fáa meira frið at uppliva og njóta. Sjarmerandi høvuðsstaðurin Hanoi telist millum tey ferðamál, sum kendir miðlar mæla til at vitja næsta ár. Kanska er 2016 árið, tá ið tú upplivir Vietnam. Japan Japansk mentan er í andsøgn til gerandisdagin vestanfyri, men sera hugtakandi at uppliva. Japan kann bjóða bæði tær mest framkomnu tøkniligu umstøðurnar í stórbýum og aldargamla mentan kring landið. Urtagarðar, átrúnaðarligir bygningar, gomul bardagastøð og mangt annað er at uppliva. Brúkar tú nakrar dagar í Tokyo upplivir tú ein stórbý, sum ikki finst aðrastaðni í heiminum. Georgia Fyrrverandi sovjettiska lýðveldið í Kaukasus hevur nýliga latið dyrnar upp fyri ferðafólki, og tí er landið óspilt og spennandi at ferðast í. Landslagið í Georgia er stórsligið, fólk er vinarligt, og nógv nýggj vínsløg koma úr Georgia. Um várið er landið hugtakandi við kavakløddum fjallatoppum, góðum hita og vaknandi náttúru, og í Ushguli kanst tú vitja hægstu búseting í Europa. Peru Gamla inkraríki er eitt land við mótsetningum. Í Peru kanst tú vitja eitt av stóru undrunum – Machu Piccu – tú kanst ferðast inn í Amazonas, tú kanst leita upp í Andesfjøllini ella ganga í oyðimørk í vestara parti av landinum. Peru bjóðar spennandi søgu við stórtíðini hjá inkaríkinum, ið fall við sponsku koloniseringini, og gamlar slóðir eru at elta nógvastaðni.