týsdagur 6. mars 2018síða 26

2 FÓTBÓLTUR 2018 FÓTBÓLTSBLAÐIÐ HJÁ MIÐLAHÚSINUM FÓTBÓLTUR 2018 Fótbóltsblaðið hjá Miðlahúsinum Útgevari: Sosialurin 7. mars 2018 Redaktørur: Tróndur Arge Blaðfólk: Tróndur Arge, Jóannes Hansen, Pætur Albinus, André Olsen og Hilmar Jan Hansen Myndir: Álvur Haraldsen Prent: Prentmiðstøðin HM-STEYPIÐ Í FÓTBÓLTI KEMUR TIL FØROYA! Víðagitna HM-steypið, ið spælarar sum Diego Maradona; Didier Deschamps og Iker Casillas hava tikið í móti, er nú á veg til Føroya við tiltikna Coca-Cola flúgvaranum. Við í flúgvaranum er eisini franski HM vinnarin frá 1998, Christian Karembeu. Eyðkenda Coca-Cola flogfarið, ið er prýtt bæði uttan og innan við Coca-Cola, lendur í Føroyum 24. mars. Umborð er orginala FIFA World Cup steypið. Eitt steyp, ið spælarar sum Diego Maradona, Lothar Matthäus, Fabio Cannavaro, Iker Casillas og Didier Deschamps hava tikið í móti frammanfyri øllum heiminum. Í sambandi við vitjanina hjá Coca Cola flogfarinum verður møguleiki hjá føroyingum at síggja orginala HM-steypið saman við einum serligum heimsmeistara. Tí Christian Karembeu er ikki hvør sum helst. Hann var við til at vinna HM í 1998 fyri Frakland, sum er einastu ferð, at stóra tjóðin hevur vunnið steypið. Hann er eisini tvífaldur Champions League vinnari við spanska stórfelagnum Real Madrid. Flogfarið lendir í Vágum leygardagin 24. mars klokkan 17. Tá fáa innboðin møguleikan at sleppa umborð á flogfarið. Síðani gongur leiðin á Tórsvøll, har almenningurin fær møguleika at síggja HM-steypið. Møguleiki verður eisini at taka myndir saman við steypinum í eitt avmarkað tíðarskeið. Coca Cola flogfarið fer víðari til Íslands sunnumorgunin 25. mars klokkan 8. FÓTBÓLTSBLAÐIÐ 2018 Fyri nítjandu ferð gevur Sosialurin út Fótbóltsblaðið, sum er ein upptakt til komandi kappingarár í fótbólti. Blaðið er ætla teimum, sum fylgja við bestu deildini í føroyskum fótbólti TRÓNDUR ARGE Fyrst av øllum, so fari eg at bjóða tykkum vælkomin í føroyska fótbóltsheimin saman við ÍtróttarSosialinum og Miðlahúsinum anno 2018. Hetta blaðið setur sjóneyku á Betri deildina. Í hesum blaðnum hava vit hóparnar hjá øllum feløgunum í Betri-deildini, men tað er við tí fyrivarni, at flytingarvindeygað ikki er latið aftur. Sostatt kunnu flytingar koma fyri, men tað kanst tú altíð lesa um í Sosialinum og á in.fo. EIN BETRI AVTALA Í Fótbóltsblaðnum hesa ferð eru samrøður við spælara ella venjarar í øllum feløgunum í Betri deildini. Vit meta um lyklaspælaran, hvør fær gjøgnumbrotið, venjaran og hvat er málið hjá hvørjum einstøkum felagi. Eisini er ein gjøgnumgongd av hvørjum felagi, har tú fær eina støðumeting av hvørjum felagi. Eisini kanst tú lesa um nýggja høvðusstuðulin hjá bestu deildini – Betri. Avtalan er søgulig og søguliga stór. Her fært tú eitt innlit í hví Betri er sinnað at lata fimm milliónir krónur til føroyskan fótbólt. FYLG VIÐ ÍTRÓTTINUM Í ÍTRÓTTARSOSIALINUM Eins og altíð, so gera vit í Miðlahúsinum nógv burturúr føroyskum fótbólti. Vit vóru einasti miðilin í Grikkalandi, tá Føroyar vunnu. Vit royna at verða til flestu dystirnar, so vit í størri mun kunnu greiða frá hvat veruliga hendir. Á in.fo, sum er tíðindaportalurin hjá okkum, leggja vit stóran dent á at fáa bráð­fengistíðindini út. Vit fylgja væl við í fótbóltsheiminum, og hava eisini eitt hav av myndum frá nógvum dystum. Vit leggja stóran dent á, at hava beinleiðis frásøgn frá flest øllum dystum. Í ár fer ÍtróttarSosialurin at seta liðið hesa vikuna. Tað hevur verið roynt fyrr, men er síðani dottið niðurfyri. Nú verður tátturin tikin uppaftur. Hetta vil altíð verða ein meting, sum ítróttarredaktiónin á Sosialinum ger. Í ÍtróttarSosialinum, og Sosialinum sum heild, leggja vit dent á bakgrundssøguna. Hví vunnu ella taptu Føroyar, og vit hava »Dysturin hesa vikuna«, har vit eisini gera spælarametingar. Hetta er ein stór ábyrgd, sum vit taka í stórum álvara. Gott kappingarár, Tróndur Arge