týsdagur 6. mars 2018síða 38

14 FÓTBÓLTUR 2018 FÓTBÓLTSBLAÐIÐ HJÁ MIÐLAHÚSINUM ODMAR FÆRØ: HELT VIÐ B36 Í ABERDEEN Hann er í dag ein av ímyndunum í B36, men tað var ikki altíð upplagt, at Odmar Færø skuldi blíva ein lyklaspælari fyri B36, tá hann rann runt í Aberdeen. – Men so møtti eg Róaldi, hann hevur altíð verið ein gjøgnumsúrgaður B36’ari, sigur miðverjin TRÓNDUR ARGE Minnini eru fá av Toftum. Í 1993 er kreppa í Føroyum og fleiri familjur flyta av landinum fyri at bjarga sær. Árið fyri hevur pápi Odmar Færø – Oddmar Færø – júst vunnið FM við B68 í 1992. -Eg minnist okkurt smávegis, har eg súkkli við vøllin, men annars minnist eg ikki nógv, fortelur Odmar Færø. Hann situr í B36-húsinum og hyggur út á ovaravøll. Nakrir smádreingir venja, meðan inni verður gjørt klárt til bingo. Hann er eyðkendur við sínum reyða skeggi, sum hann javnan hálar í, meðan hann tosar. -Vit fluttu fyrst til suðuronglands til Brighton. Tað virkaði so langt vekk, men nakað seinni fekk babba arbeiði í Aberdeen. Tað virkaði eisini nógv tættari og tað var gott flogsamband til Føroyar, fortelur Odmar Færø. Hann og systkini ganga alla sína skúlagongd í Aberdeen, har Odmar spælir við fleiri av lokalu feløgunum. -Eg spældi ongantíð við Aberdeen, men spældi bara við smærri feløgum í nærumhvørvinum, sigur miðverjin hjá B36. Í árunum frá 1995 til 2007 er Odmar Færø javnan heima í summarferiu. Hann hittir góða vinmannin Róald Jakobsen. Tað skal vísa seg, at honum hava B36’arar nógv at takka. -Eg spældi eina ferð við HB. Tað má hava verið í piltum ella okkurt líknandi, men tað segði mær einki. Men so møtti eg Róladi, sum er ein gjøgnumsúrgaður B36’ari. Har bleiv eg B36’ari, og tá eg flutti heim var ongin ivi um at eg skuldi til B36, sigur liðskiparin. Hann var tó ikki nakrar fongur at byrja við. -Kurt Mørkøre var venjari tá og hann tók sær væl av mær. Eg var nokk ikki nakar góður spælari, men hann gav mær álit og spælitíð, minnist Odmar Færø afturá. VERJUPARTURIN ER EIN AVBJÓÐING Eftir tvey meistaraheiti í 2014 og 2015, so hevur gingið strilti hjá B36. Eitt fjórða pláss og eitt triðja pláss er tað blivið til í landskappingini. -Tú kanst gott siga, at tað hava verið tvey torfør ár síðani meistaraheitini. Eg minnist serliga í 2015, tá vit ein stóran part av kappingarárinum spæla uttan ein áleypara, men spæla flótandi fótbólt, sigur landsliðsspælarin. B36 er saman við NSÍ tey bæði liðini, ið fáa størst viðurkenning fyri at spæla álopsfótbólt. Tað er tó ikki uttan sín prís. - Verjupartin hevur ikki riggað eins væl og hinir árini. Vit lata ov nógv mál inn i fjør. Tá vit spæla álopsfótbólt, so er týdningarmikið at vit í verjuni taka ábyrgd. Venjarin er ein gamal áleypari, so hann vil heldur vinna 4-3, meðan eg kanska heldur vil vinna 1-0, sigur Odmar Færø. Hann leggur dent á, at tað verður týdningarmikið at fáa javnvág millum álopsspælið og verjupartin. - Vit hava eina góða verju. Jóans Tór Næs er aftur, meðan Alex Mellemgaard er við aftur. Andrias Eriksen er royndur eftirhondini, meðan Bjarni Petersen er back-up. Í álopsspælinum er Christian R. Mouritsen við aftur. Hannes Agnarsson venur aftur og Meinhard Olsen spælir væl. Eli F. Nielsen hevði eitt gott ár í fjør, meðan vit vóna at Lukasz Cieslewicz kemur aftur til meistaraformin. Fá vit 80 prosent av hasum at rigga, so er tað nokk til at vinna nógvar dystir. Fáa vit alt at rigga, so haldi eg vit kunnu vinna alt, sigur Odmar Færø, sum tó ásannar, at tað er ein meinbogi at Patrik Johannesen er farin av landinum. - Kaimar Saag hevur víst seg at vera góður, men vit hava eisini mist ein góðan spælara í Patrik Johannesen, men tað er gott fyri hann. Hyggja vit eftir stóru myndini, so skal hann menna seg sum spælarara. So má Kaimar traðka til. Hann er follin væl til higartil, sigur miðverjin. UMHUGSAR FRAMTÍÐINA Tað var útlendskur áhugi fyri Odmari Færø, eftir at hann fekk sítt annað gjøgnumbrot á landsliðnum í fjør. Hann umhugsar í løtuni støðuna, men tað verður ikki beint nú. - Aftaná landsdystirnar móti Andorra, Portugal og Ungarn, fekk eg fleiri fyrispurningar. Tað kennist væl, men eg kann ikki fara nú. Eg geri mastersuppgávu og skal giftast í summar. So tá lá ikki fyri, uttan so at talan var um ørar upphæddir, fortelur liðskiparin hjá B36. Honum dámar væl at spæla á landsliðnum og tað ynskir hann eisini í framtíðini. -Um áhugin stendur við í framtíðini, so kundi verið áhugavert at spælt í Íslandi ella okkurt líknandi. So hevði møguleikin fyri at hildið landsliðsplássið verið størri, men tað krevur fyrst og fremst at eg spæli væl her í B36, sigur Odmar Færø. LYKLASPÆLARIN: Róaldur Jakobsen Hann skal binda liðið saman millum verju og álop. Miðvallarin prógvaði í fjør, at hann er í løtuni týdningarmesti spælarin í B36, tá tað kemur til framrættaða partin, men kann hann eisini fáa javnvág á liðið, so er nógv vunnið. GJØGNUMBROTIÐ Hannes Agnarsson B36 hevur fleiri ungar spælarar, sum kunnu fáa sítt gjøgnumbrot, men tann spælarin sum lættast kann gera stóran mun er Hannes Agnarsson. Hann skjótur sum fáur og longu prógvað í løtum, at hann er í einum flokki fyri seg, tá hann er klárur. VENJARIN Jákup á Borg Hevur nú eitt ár á baki sum venjari. Hann er djarvur venjari, sum vil spæla framrættaðan fótbólt. Hann fekk tvey bann í fjør frá bonkinum, so klárar hann at finna javnvágina á og uttanfyri vøllin, so stendur B36 frammanfyri einum spennandi kappingarári. MÁLIÐ Evropa + Tað er ikki altíð nokk hjá B36 at vinna – tað skal vinnast við stíli. Kemur B36 í Evropa við stíli og góðum fótbóltsspæli, eru viðhaldsfólkini helst væl nøgd. Skal talan verða um eitt avbera gott kappingarár, so eitt glitrandi heiðursmerki í hús. -Eg spældi eina ferð við HB. Tað má hava verið í piltum ella okkurt líknandi, men tað segði mær einki