týsdagur 6. mars 2018síða 56

32 FÓTBÓLTUR 2018 FÓTBÓLTSBLAÐIÐ HJÁ MIÐLAHÚSINUM HANS PAULI SAMUELSEN ÆTLAÐI ALLA TÍÐINA AT VENDA AFTUR Tað sigur Hans Pauli Samuelsen, sum trý tey seinastu árini hevur vunnið FM-heitið, meðan hann hevur verið í útlegd í EB/Streymi. Nú ætlar royndi bóltsnillingurin at geva sínar royndir til hópin hjá EB/Streymi. ANDRÉ OLSEN Royndi víkarmaðurin, Hans Pauli Samuel­sen, sum fram til kappingarárið í 2015 bert hevði umboða barndómsfelagið EB/Streym, hevur seinastu trý árini verið í út­legd í EB/Streymi. Tey árini hevur Hans Pauli Samuelsen spælt við B36 og Víkingi, har tað er merkisvert, at hann hevur vunnið FM-heitið øll árini, sum hann hevur verið burtur úr EB/Streymi. Fyrst tað eina við B36, og síðani tvey á rað við Víkingi í 2016 og í 2017. FANTASTISKT AT VERA AFTUR Í vetur vendi Hans Pauli Samuelsen, sum nú er vorðin 33 ára gamal, aftur til barn­dómsfelagið, EB/Streym. Hans Pauli Samuelsen sigur, at hann alla tíðina hevur havt ætlanir um at enda sína fótbólts­yrkis­ leið í barndómsfelagnum, EB/Streymi. – Tað er fantastiskt at vera aftur í EB/ Streymi – orduliga gott. Eg havi alla tíðina sagt, at eg vildi enda mína fótbóltsyrkisleið í EB/Streymi, og tað ætli eg eisini. Men nær tað verður, dugi eg ikki at siga enn. Eg haldi at tað sær spennandi út hjá felagnum við einum projektið, har felagið verður bygt upp aftur. Og vónandi fái eg komið við eitt sindur av rutinu til hópin, sigur Hans Pauli Samuelsen, sum serliga gleðir seg til at sleppa at spæla heimadystir á Eiði aftur. FELAGIÐ ER BETUR STRUKTURERAÐ Hans Pauli Samuelsen sigur, at størsti mun­urin á EB/Streyma liðnum sum er nú, sam­anborið við tað liðið sum var, tá hann fór, er, at berandi kreftirnar á liðnum nú eru yngri leikarar. – Eg haldi at tað sum er mest broytt við liðnum nú, er at teir eldru leikararnir sum vóru tá, eru farnir, og at tað nú eru nýggir ungir leikarar, sum eru tær ber­ andi kreftirnar á liðnum. Eg segði alla tíð­ina, at vit skuldu havt brúkt orku eftir meist­ara­árið í 2012, til at bygt eitt nýtt lið upp­aftur við yngri leikarum, umframt bulin­um frá meistaraliðnum í 2012. Men tá var heldur satsað eitt sindur ov nógv, og tað brendi felagið seg eitt sindur av. Í dag tykist felagið tó vera komið fyri seg. Alt er betri strukturerað, og eg havi hug at rósa nevndini og serliga formanninum, Brian Hansen. Tey gera eitt gott arbeiði, og tað tiltalar leikarar til at spæla við EB/Streymi. Eisini haldi eg tað vera tiltalandi, at sleppa at vera við í hesari gongdini við at byggja liðið upp aftur, tí vit vóru í eini líknandi støðu fyrst í 2000 árunum, tá eg sjálvur var millum yngru leikararnar, sigur Hans Pauli Samuelsen. SKULU BETRA SEG EB/Streymur greiddi í fjør sín setning við at yvirliva í deildini sum uppflytari, og til kappingarárið í ár síggja sundalagsmenn út til at hava fingið ein sterkari hóp. Fleiri royndir leikarar eru komnir afturat hópinum – millum annað Hans Pauli Samuelsen, Gestur Bogason Dam, Ari Ó. Ellingsgaard, Oddur Højgaard, umframt at Marni Djurhuus er byrjaður aftur. Royndi profilurin, Hans Pauli Samuelsen, er eisini væl nøgdur við hópin hjá EB/Streymi. – Vit vita at tað er torført hjá okkum at blanda okkum millum fimm tey ovastu liðini í deildini, so málið hjá okkum er fyrst og fremst at royna at betra okkum. Vit skulu hava fleiri stig enn vit fingu í fjør, og um tað røkkur til eina hægri plasering, er tað bara bonus. Høvuðsdenturin skal tó vera lagdur á, at liðið skal betra seg. Tó vita vit væl, at um vit hava allar leikararnar tøkar, so kunnu vit spæla upp ímóti einum og hvørjum liðið í deildini, sigur Hans Pauli Samuelsen. LYKLASPÆLARIN Rógvi Egilstoft Nielsen Vágamaðurin, sum í nøkur ár hevur spælt við EB/Streymi, hevur ment seg til at verða avgjørdi lyklaleikarin í felagnum, sum eisini endurspeglast í at hann er liðskipari. Hevur ferð, kraft og førleika til at vera munurin í nógvum av dystunum hjá EB/Streymi. GJØGNUMBROTIÐ Pætur Petersen Skálvíkingurin, sum kom til EB/Streym í summarsteðginum í fjør frá B36, menti seg nógv í seinnu hálvu í fjør við fullari spælitíð. Í ár kann roknast við, at kviki vongspælarin kann fáa ein uppaftur meira avgerandi leiklut á liðnum hjá EB/Streymi, og tí verður hann gjøgnumbrotið. VENJARIN Heðin Askham Fryntligi havnamaðurin, sum av álvara hevur funnið seg til rættis í Sundalagnum, er væl lýddur millum leikararnar í EB/Streymi. Í fjør kláraði hann sína uppgávu, sum var at fáa liðið at yvirliva. Í ár er uppgávan hjá Heðin Askham, at byggja víðari á gongdina frá í fjør. MÁLIÐ At nærkast miðjuni Eftir at hava spælt í næstbestu deildini fyri tveimum árum síðani, var uppgávan hjá EB/Streymi í fjør at yvirliva. Tað kláraðu sundalagsmenn sannførandi. Í ár er liðið styrkt í mun til í fjør, og málsetningurin tykist vera at nærkast miðjuni av deildini. Eg havi hug at rósa nevndini og serliga formanninum, Brian Hansen, sum gera eitt gott arbeiði