týsdagur 5. mars 2019síða 38

14 FÓTBÓLTUR 2019 FÓTBÓLTSBLAÐIÐ HJÁ MIÐLAHÚSINUM JÓNAS TÓR NÆS JÓNAS NÝTUR HVØRJA LØTU Á VØLLINUM Landsliðs- og B36-bakkurin, Jónas Tór Næs, sat uttanfyri tað mesta av kappingarárinum í fjør, men nú er hann aftur tilreiðar at spæla. - Við árunum havi eg funnið útav, at tað ræður um at njóta hvørja løtu á vøllinum, sigur hann PÆTUR ALBINUS Avrik hjá liðnum verða stundum máld eftir hvussu tey hava staðið seg í landskappingini, men at tað ber til at hava eitt gott kappingarár uttan at vinna gull ella silvur í landskappingini, man B36 í fjør vera eitt gott dømi um. B36 vann bronsu í landskappingini, sum man vera á einari leið í sjálvum sær, men tað, sum kryddaði árið hjá B36, var gullið í steypakappingini og evropeiska ævintýrið, har føroyska høvuðsstaðarfelagið vann á maltesiska St. Joseph's og montenegrinska OFK Titograd áðrenn teir vórðu sendir úr Europa League eftir tveir minniligar dystir ímóti turkiska stórfelagnum, Besiktas. Ein, sum ikki var við til steypafinaluna ella Europa League-dystirnar, var Jónas Tór Næs. Drúgvi høgri bakkurin stríddist við ein ryggskaða tað mesta av kappingarárinum í fjør, og fekk hann einans fimm dystir á vøllinum – fýra teir fyrstu í landskappingini, og so tann allarseinasta. - Eg fekk ein skaða í byrjanini av kappingarárinum í fjør. Eg varð lagdur undir skurð og kundi ikki spæla restina av kappingarárinum. Nú eri eg komin fyri meg, og eg njóti hvørja løtu á vøllinum. Við árunum havi eg funnið útav, at tað ræður um at njóta hvørja løtu á vøllinum, greiðir 32 ára gamli Jónas Tór Næs frá. ILT AT SPÁA Jónas Tór Næs hevur verið nógvastaðni sum fótbóltsspælari. Í Danmark hevur hann spælt við BK Frem, Fremad Amager og Køge BK, og í Íslandi hevur hann spælt við Vali og ÍBV. Nógv bendir á, at Jónas hevur verið á sínum seinasta uttanlandsævintýri, men hann undirstrikar tó, at ein ongantíð kann vita tað fyri vist. - Eg havi búð og spælt uttanlands síðani eg flutti til Danmarkar sum tannáringur. Eg havi verið heima og spælt í nøkrum tíðarskeiðum. Eg havi verið bæði í Danmark og í Íslandi, og eg havi trivist í báðum londunum, sigur Jónas. - Serliga í Íslandi, har eg havi ættarbond, havi eg følt meg sum heima. Eg havi ikki ætlanir um at fara aftur út, men tað er ringt at spáa um framtíðina, sigur hann. Jónas, sum hevur spælt 57 landsdystir fyri Føroyar, spældi við ÍBV í 2017 áðrenn hann kom aftur til Føroya og B36 undan kappingarárinum í fjør. Her heima hevur hann fyri tað mesta spælt við B36, men hevur eisini spælt einstøk kappingarár við AB, NSÍ og EB/Streymi. KREATIVT LIÐ B36 hevur í ár fingið tilgongd frá profilum sum Árna Frederiksberg úr NSÍ, Briani Jakobsen av Skála og Erlingi Jacobsen úr Víkingi. Jónas Tór Næs letur væl at nýggju spælarunum. - Vit hava mist nakrar profilar og fingið nakrar royndar leikarar inn. Teir síggja ótrúliga gott út og geva liðnum nógv. Brian er krútsterkur. Árni skapar kjansir, mál og gevur pláss til aðrar spælarar. Og við Erlingi hava vit fingið ein royndan mann, sum hevur vunnið nógv við Víkingi og dugir ótrúliga væl at lesa spælið, sigur Jónas - Harafturat hava vit nógvar evnaríkar og dugnaligar ungar leikarar og eina góða og sunna kapping í málinum, leggur hann afturat. Jónas vónar, at eyðkenda B36-spælið kemur á glið aftur í ár. - Vit hava nógvar góðar og kreativar leikarar, samstundis sum vit eisini hava leikarar, sum arbeiða ómetaliga hart. Vit hava eisini ein rímiliga breiðan hóp, men tað er umráðandi fyri eitthvørt lið, ikki at vera ov hart rakt av skaðum og leikbonnum. Fyri at vit skulu eydnast í ár, skulu vit fáa okkara væl smurda álopsspæl at koyra, samstundis sum vit skulu kenna okkara vitjunartíð, sigur hann. Høgri bakkurin hjá B36 er ikki smæðin at viðganga, at málið fyri kappingarárið í ár er at spæla við í toppinum í landskappingini, og so vil hann eisini fegin varðveita tað steypið, sum B36 vann í fjør, nevniliga Løgmanssteypið. - Vit fara altíð út á vøllin fyri at vinna, og vit vilja gjarna vera við har tað er stuttligt, í toppinum. Tað er torført at vinna FM, og tað eru nógv lið, sum síggja sterk út. Kappingin um plássið á ovastu rók verður óivað hørð, men tað hevði verið ótrúliga deiligt at fingið Løgmanssteypið heimaftur, sigur Jónas Tór Næs. LYKLASPÆLARIN: Lukasz Cieslewicz Lukasz Cieslewicz er ein av fáu profilunum, sum eru eftir frá meistaraliðnum í 2011, og tann eftir hondini sera royndi pólski driblarin, ið eisini hevur ment seg sum ein skilagóðan spælbýtara, kann fáa lyklaleiklutin at orkestrera tað lutfalsliga nýggja B36-liðið. GJØGNUMBROTIÐ Gilli Samuelsen Gilli Samuelsen vísti sera gott máltev, tá ið hann varð útleigaður til 07 Vestur, men enn hevur kviki vongurin tilgóðar veruliga at vísa seg í barndómsfelagnum. B36 stríðist við skaðar, so tað er væl hugsandi, at Gilli fær møguleikar. Tað er eyðsýnt, at evnini røkka til eitt gjøgnumbrot. VENJARIN Jákup á Borg Tann lívligi venjarin, Jákup á Borg, hevur borið álopskenda B36-spælið víðari, men tað hevur haltað í verjupartinum, og treytirnar eru ikki batnaðar, nú verjuskansin, Odmar Færø, er farin uttanlands. Loysnir eru tó funnar, men tað verður helst sama álopsspæl, ið kemur at eyðkenna B36. MÁLIÐ FM Tað er blivið til bronsu í Betrideildini seinastu tvey árini, og hóast tað í fjør varð kryddað við steypagulli og einum ævintýri í Europa League, so eru vónirnar helst at klintra eitt ella tvey fet longri upp eftir talvuni í Betrideildini. Hetta krevur tó betur hepni við skaðum og at alt klappar. Vit hava nógvar góðar og kreativar leikarar