týsdagur 5. mars 2019síða 42

18 FÓTBÓLTUR 2019 FÓTBÓLTSBLAÐIÐ HJÁ MIÐLAHÚSINUM LYKLASPÆLARIN Patrick Johannesen Nýggi álopsspælarin Patrick Johannesen hevur havt góð avrik í venjingardystum. Hann er ágangandi og arbeiðssamur, og so ger hann mál. Áður hevur hann staðið seg væl í álopinum hjá B36, og tað verður avgerandi fyri KÍ, at tvørámaðurin fær gongd á málskjótingina og kann vera við at skapa málkjansir. GJØGNUMBROTIÐ Óli Eyðsteinsson Poulsen 18 ára gamli Óli Eyðsteinsson Poulsen hevur longu verið við í 24 dystum í bestu deildini, og hann hevur skotið fýra mál. Evnini eru tó so eyðsýnd, at hann kann fara at fáa enn størri leiklut á KÍ liðnum komandi tíðina. Óli kann røkja fleiri pláss á liðnum, og hann er serliga góður í framrættaða spælinum. Óli hevur spælt á u-landsliðum, og væntast kann, at hann fer at fáa leiklut á U21 landsliðnum komandi árini. VENJARIN Mikkjal Thomassen Mikkjal Thomassen fer undir sítt fimta kappingarár í KÍ. Síðani 2016 hevur KÍ hvørt ár verið millum fýra tey fremstu – tvey ár silvurvinnarar – og málið er aftur í ár at mynda toppin í føroyskum fótbólti. Hesaferð hevur venjarin krevjandi uppgávu at spæla nýtt lið saman, men hann hevur áður víst, at tað megnar hann. MÁLIÐ Europa Grundleggjandi kravið til KÍ er, at liðið vinnur eitt av Europa Cup plássunum. Í 2016 og 2017 var KÍ nær við at vinna FM heitið, men í fjør var HB suverent. Í ár kann kappingin gerast javnari, men spurningurin er, hvussu skjótt og væl tað lukkast KÍ at spæla liðið við nógvum nýggjum spælarum saman. Tað talar tó fyri góðum úrsliti í ár, at KÍ hevur nógvar góðar spælarar í hópinum. Avbjóðingin fyri meg er at fáa hesar nýggju leikararnar at virka saman sum eitt lið MIKKJAL THOMASSEN EIN STÓR AVBJÓÐING FYRI KÍ Venjarin skal spæla eitt heilt nýtt lið saman í hesum kappingarárinum. 21 leikarar eru farnir úr felagnum seinastu tveir vetrarnar ÁRNI GREGERSEN Seinastu trý árini hevur KÍ verið eitt av liðunum, sum hevur myndað fótbóltin í bestu føroysku deildini. Hóast tað ikki enn er eydnast at vinna FM, hevur felagið verið millum fýra tey bestu í hesi trý árini. Mikkjal Thomassen hevur staðið á odda fyri liðnum – og tað ger hann framvegis. - Vit hava megnað at verið í millum fýra tey fremstu liðini hesi árini, og tað er eisini okkara grundleggjandi mál í ár, sigur venjarin. Mikkjal Thomassen sigur, at avbjóðingin í KÍ er stór í ár. Seks nýggir spælarar eru komnir til felagið, umframt at nakrir ungir spælarar í KÍ eru á veg at gera seg galdandi í besta hópinum hjá felagnum. - Vit vita, at tað tekur tíð at spæla ein hóp saman. Tað er ómetaliga sjáldan, at tað ber til at gera eftir einum kappingarári, sigur venjarin. Hann vísir á, at gjøgnum tey 27 árini, skotski venjarin Alex Ferguson var í Manchester United, fekk hann spælt fýra lið saman. Tað vísir bara, at tað tekur tíð, heldur KÍ-venjarin. Tað eru hendar stórar broytingar í KÍ- hópinum í ár. Samanborið við í fjør eru fimm nýggir útlendskir leikarar komnir til felagið umframt føroyska álopsspælaran Patrick Johannesen. Afturat tí eru eisini nakrir av yngru leikarunum í felagnum, sum banka uppá dyrnar til besta hópin. – Tað ber ikki til at spæla eitt lið saman upp á stutta tíð. Leikararnir skulu læra hvønn annan at kenna, umframt at teir sjálvandi eisini skulu læra spæliskipanina, sum vit hava, at kenna, sigur Mikkjal Tjomassen. Hann sigur, at tað sum ger, at felagið hevur so nógvar nýggjar leikarar, er, at í teimum báðum seinastu vetrarflytingarvindeygunum hevur KÍ mist heilar 21 leikarar, sum altso eru farnir úr besta hópinum. Venjarin vísir á, at tað ikki er talan um marginalleikarar, sum eru farnir úr felagnum hesi bæði seinastu vetrarflytingarvindeyguni. Tað er í nógvum førum leikarar, sum hava verið lyklaleikarar á liðnum hesi seinastu trý árini. – Tað ger, at skulu vit røkka okkara málsetningum, so mugu vit hava nýggjar leikarar inn. Avbjóðingin fyri meg er so at fáa hesar nýggju leikararnr at virka saman sum eitt lið, sigur venjarin. SPENNANDI KAPPING Mikkjal Thomassen heldur, at nýggja kappingarárið verður ómetaliga spennandi. Hann heldur, at liðini í ár eru javnari, enn tey hava verið. Serliga leggur hann dent á, at tey fimm liðini, sum hava ligið í niðaru helvt á stigatalvuni, hava ment seg nógv og fara at geva øllum hinum liðunum skarpan gang. – HB er framvegis favorittur til at vinna FM, men sum eg meti tað nú, fer HB ikki at fáa so lætt spæl í ár, sum teir høvdu í fjør, sigur Mikkjal Thomassen. Út frá tí, hann hevur sæð í venjingardystunum, hava hini liðini bæði ment og styrkt seg. Bæði NSÍ, Víkingur og B36 hava sæð sterk út, og tað sama ger seg galdandi fyri Skála. KÍ hevur havt sum mál, meðan Mikkjal Thomassen hevur verið venjari, at vinna sær pláss millum fýra tey ovastu liðini og harvið tryggja sær rættin at sleppa at taka lut í evropeiskum fótbólti. – Tað er sera spennandi og mennandi fyri føroyskan fótbólt, at vit sleppa at luttaka í Evropa-fótbólti. Tað er ein gularót, sum vit allir renna eftir, sigur Mikkjal Thomassen. Hann sigur, at støðið á føroyskum fótbólti er hækkað so nógv, at nú ber til at fara inn í evropeisku kappinganar við tí fyri eyga at fáa eitt gott úrslit. – Ja, alt er broytt. Vit venja nógv meira, enn vit gjørdu fyri bara fáum árum síðani. Vit hava eisini sæð, at tað gevur úrslit, tí fleiri av føroysku feløgunum hava spælt seg víðari í altjóða kappingunum. Og at fáa mótstøðu frá liðum, sum vit ikki kenna frá gerandiskappingunum, gevur menning, sigur hann. Venjarin sigur eisini, at tað er sjálvandi ikki bert fyri venjararnar, at tað er spennandi at fáa aðrar kappingar at luttaka í. Hetta er eisini nakað, sum spælararnir gleða seg til. – Sjálvandi kunnu vit fáa óhepnar luttøkur, har vit hitta lið, sum bara eru á einum nógv hægri støði, men hesi seinastu árini eru fleiri lið komin víðari móti mótstøðuliðum, sum kanska eru betri enn vit, men ikki so nógv betri, at vit ikki ein góðan dag kunnu vinna tey, sigur Mikkjal Thomassen.