týsdagur 5. mars 2019síða 56

32 FÓTBÓLTUR 2019 FÓTBÓLTSBLAÐIÐ HJÁ MIÐLAHÚSINUM LYKLASPÆLARIN Milos Budakovic Málmaðurin Milos Budakovic var ímillum týdningarmestu leikararnar hjá TB/ FCS/Royn í fjør. Serbiski málverjin vísti seg sum ein hin stinnasti í Betrideildini, og stórbjargingar hansara kunnu í ár vera við til at vinna TB týðandi stig til málsetningin um at yvirliva í deildini. GJØGNUMBROTIÐ Jens Erik Bruhn Helst fáa nakrir ungir leikarar møguleikan á TB-liðnum í ár, og ein teirra, ið kann fáa eitt gjøgnumbrot, er 16 ára gamli Jens Erik Bruhn. Hann er fyri tað mesta vongleikari, og hann er eisini partur av føroyska U17-landsliðnum. VENJARIN Zoran Pavlovic Zoran Pavlovic dámar best, at sítt lið er á bóltinum og skapar dystir, men tað kann gerast ein stór avbjóðing hjá honum við TB, har teir í mongum dystum verða undirmettir og óivað mugu stríðast hart fyri hvørjum einasta stigi. MÁLIÐ Yvirliving Tað einfalda málið hjá TB er at yvirliva í deildini. Talan er um eitt nýtt lið, sum skal fóta sær og mennast, og við tí avmarkaða tilfeinginum, sum er í smala hópinum, so ber ikki til at seta sær hægri mál í løtuni. Megnar TB at yvirliva í Betrideildini, er tað eitt frálíkt úrslit. Hart arbeiði førir til góð úrslit, og góð úrslit føra til sjálvsálit ZORAN PAVLOVIC PARTUR AV HJARTANUM ER Á TVØROYRI - Mær dámar væl í Føroyum, og ein partur av mínum hjarta er á Tvøroyri, sigur serbiski Zoran Pavlovic, sum við hørðum arbeiði ætlar at TB skal yvirliva í Betrideildini PÆTUR ALBINUS Maðurin, sum er útnevndur at standa á odda fyri TB, sum nú aftur er farið fyri seg og skal standa á egnum beinum í bestu deildini, er serbiski Zoran Pavlovic. 57 ára gamli serbin, ið er pápi KÍ-verjuleikaran, Deni Pavlovic, er ikki heilt ókendur her um leiðir, tí í 1998 var hann nevniliga venjari hjá júst TB, har hann nú altso aftur skal royna seg. – Tað er deiligt at koma aftur, sigur Zoran. – Tað fyrsta, ið eg varnaðist, var nýggja leikvøllin, sigur hann víðari. – Mær dámar væl í Føroyum, og ein partur av mínum hjarta er á Tvøroyri. Fólkini her eru ótrúliga fitt, og eg haldi tað vera stuttligt, at øll ganga so høgt upp í enskan fótbólt, sigur Zoran flennandi og nevnir nøkur av fólkunum, ið hann minnist frá 1998, og sum hann hevur hitt aftur nú. Hann nevnir eitt nú Ronnie Midjord, Karl Øster, Henrik Thomsen, Páll Nolsøe, Jóan Petur Olgarsson og landsmannin Sasha Radosavljevic. Zoran Pavlovic sigur, at tað vóru nógvar orsøkir til at hann valdi at siga ja takk til tilboðið frá TB, og ein teirra er, at hann kemur nærri at soni sínum í Klaksvík, Deni Pavlovic. Zoran eigur annars tveir synir. Eldri bróðurin hjá Deni, hann eitur Luka, er eins og pápin farin venjaraleiðina, og hann er í løtuni venjari í ungdómsdeildini hjá Sturm Graz í Eysturríki. LIÐIÐ Venjarin verður ikki einasta serbiska íkastið í TB-hópin í ár. Milos Budakovic, sum var málverji hjá TB/FCS/Royn í fjør, skal eisini verja málið hjá TB í ár, og afturat honum eru tveir aðrir serbiskir leikarar komnir. Talan er um miðvallaran Veljko Vukovic og áleyparan Ivan Ivanovic. Umframt hetta er liðið sett saman av lokalari megi úr oynni, og seinastu mánaðirnar hava teir dýkt á við venjing fimm ferðir um vikuna. Vónin er, at verjuskansin og liðskiparin hjá TB/FCS/Royn í fjør, Teitur Olsen, eisini kemur upp aftur í fullar snúningar og gerst partur av TB-liðnum í ár. Hann hevur ikki verið við enn. – Vit mangla ein til verjuketuna, sigur Zoran Pavlovic, ið sigur seg vóna at Teitur tekur gaggurnar fram aftur, tí hann veit, at hjartað hjá honum er á Tvøroyri. – Vit mangla eisini ein høgra bakk og ein áleypara, men vit vóna, at alt tað er komið í rættlag til kappingarbyrjan. Vit fyrireika okkum so væl sum vit kunnu, sigur Zoran. MÁLIÐ Zoran sigur, at honum dámar best at spæla undirhaldandi og álopskendan fótbólt. – Mær dámar fótbólt við nógvum álopum. Fótbóltur er list. Nógvir dystir nú um dagar eru øgiliga taktiskir, men tað er ikki altíð gott fyri menningina, tí fótbóltur hevur brúk fyri kreativiteti fyri at menna seg, heldur Zoran. – Men eingin dystur er líka. Tað eru allatíð ymiskir taktikkir frá ymiskum venjarum til ymiskar dystir, og tað er tað, sum eisini ger tað so spennandi, sigur hann. Hann heldur, at føroyskur fótbóltur hevur tikið seg nógv fram. Hann fylgdi við dystunum hjá føroysku liðunum í Evropa í fjør, og hann heldur, at liðini kláraðu seg væl. Hann fegnast eisini um, at Føroyar, síðani hann var her seinast, eru farnar at útflyta nógvar spælarar, og at hetta eisini sæst aftur á einum sterkum føroyskum landsliði, sum nú spælir um at fáa stig heldur enn at sleppa undan stórtapum. Um málsetningin hjá TB í ár er Zoran varin, men hann fær ikki tosað seg undan, at málið er at yvirliva í deildini. – Eg haldi, at tað má vera málið, sigur hann. – Eg eri altíð optimistiskur, men vit taka tað fet fyri fet og dyst fyri dyst. Fyrst og fremst skulu vit gera tað so gott vit kunnu í venjing, og síðani í dysti. Vit skulu bara arbeiða hart, og so skal tað nokk ganga. Hart arbeiði førir til góð úrslit, og góð úrslit føra til sjálvsálit. Tað er tað, sum vit skulu hava, sigur Zoran Pavlovic.