mánadagur 18. mars 2019síða 20

Mánadagur 18. mars 2019 · Nr. 32 20 Sosialurin Hugskot og viðmerkingar – send sms til 225000 FÓTBÓLTUR Danjal av Rana Spæliætlanin hjá NSÍ eydnaðist til fulnar, og við eitt sindur av hepni høvdu teir strokið avstað við sigrinum í Gundadali í gjár. Tað sást skilliga á NSÍ, at teir vóru ikki komnir í Gundadal við eini vón um at spæla HB av vøllinum. Gul-svarta liðið var væl til sættis við at leggja seg aftur á vølllin, lata HB royna at skapa okkurt, og sjálvir dúva upp á skjótálop. Og tað sást tíðliga, at HB mátti ansa sær. Petur Knudsen vísti longu í fimta minutti, at hann ætlaði sær at geva HB-verjuni ein strævnan seinnapart. Hann sneiddi seg framvið Jón Róa Davidsen og legði eina hegnisliga avlevering inn fyri, sum toppskorarin í føroyskum fótbólti, Klæmint Andrasson Olsen, fekk sett høvdið á, men Teitur Matras Gestsson bjargaði. Longu minuttin eftir er NSÍ á odda. HB missir ein bólt í uppspælinum og Jann Benjaminsen sendur bóltin fram til Klæmint Andrasson Olsen, sum strýkur avstað í vinstru síðu. Hann fær sent bóltin flatt inn fyri málið, har Petur Knudsen er sloppin ein metur frá HB-verjuni og smekkar bóltin upp undir nettakið. NSÍ setti trýst á bakkarnar Útgangsstøði hjá NSÍ kundi valla verið nú. Teir kundu framhaldandi dúva upp á at stjala bóltin frá HB og fara í kontra, tryggir í eini 1-0 leiðslu. Restin av dystinum gekk fyri tað mesta fyri seg eini 25 metrar frá NSÍ málinum. Har lógu HB-spælararnir og trillaðu bóltin millum sín, meðan teir leitaðu eftir einum møguleika at treingja ígjøgnum væl skipaðu verjuna hjá NSÍ. Til tíðir minti tað um ein tennisdyst, tá HB sendi eina høga og langa avlevering fyri og aðra eftir úr øðrum borðinum í hitt. Tað gekk striltið hjá HB at bróta ígjøgnum, og tað eydnaðist meiri enn so hjá NSÍ at seta fótin ímillum og fara avstað við bóltinum. NSÍ legði seg eftir at royna at fanga avleveringarnar hjá HB út til offensivu bakkarnar, serliga Magnus Egilsson, og síðani fara í eitt skjótálop. Ferð eftir ferð eydnaðist tað at senda Petur Knudsen avstað móti HB-málinum, men um Jón Rói Davidsen ikki megnaði at renna hann upp og bjarga støðuni, so vóru aðrir HB-arar á røttum stað. Tó so, tað kom meiri enn so fyri, at einasti útvegur hjá HB var at gera fríspark móti unga NSÍ-aranum. Tað kostaði eisini trimum HB-arum gult kort at enda í hóslag við Petur Knudsen í fullari ferð móti málinum. Sigast skal, at HB-verjan eisini gjørdi lívið hart fyri seg sjálva, tí sjáldan munnu Bartal Wardum og Lasse Andersen hava rakt so illa við sínum avleveringum sum í gjár. Petur Knudsen var dagsins maður Seinni hálvleikur var sum hin fyrri. HB hevði bóltin og royndi at lirka lásið upp. NSÍ stjól eina avlevering her og har og sendi Petur Knudsen avstað – sum so bleiv feldur av einum HB-ara. Sum so ofta, so var tað ein deyðbóltsstøða, sum skuldi til fyri at loysa upp hjá HB. Adrian Justinussen fær møguleikan úr eini 30 metrum, mitt fyri málið. Hann smekkar til. Tórður Thomsen í NSÍ- málinum fær bara sligið bóltin út í spæl aftur. Har er Pætur Petersen skjótastur á bóltinum og skjýtur eitt hart skot, sum júst megnar at krúpa undir málmannin og síðani smettir um mállinjuna, umvegis stongina. Bæði liðini høvdu møgu­ leikar at avgera dystin. Petur Knudsen, sum uttan iva var dagsins maður í Gundadali, slapp fleiri ferðir framvið HB- verjuni og fekk lagt innlegg, men tá manglaði ofta ein gulur í brotsteiginum. Hann tók eisini tvey sera vandamikil fríspørk, annað eitt skot móti nærmaru stong, hitt eitt innlegg inn um HB-verjuna, sum tað var um reppið, at ein NSÍ-ari fekk høvdið á. Ein av atfinningunum móti spælinum hjá HB higartil í ár hevur verið, at teir báðir mitt á miðjuni, Hørður Askham og Brynjar Hløðvarsson, líkjast ov nógv í spælistíli. Tá seinni hálvleikur byrjaði, hevði venjarin flutt Hørð Askham fram í álopið, meðan Dan í Soylu datt aftur á miðjuna. Og tað varð eisini Hørður Askham, sum fekk bestu málmøguleikarnar. Júst tað var kanska ólukkan hjá HB. Tað vóru í øllum førum mong í HB-skýlinum, sum spurdu seg seg sjálvi, um ein áleypari, ella nátúrligur offensivur miðvallari, hevði megnað at sett onkrar av teimum møguleikunum í mál. Hjá NSÍ eydnaðist spæliætlanin til fulnar og við eitt sindur av hepni høvdu runavíkingar farið norður aftur við øllum trimum stigunum. HB má hinvegin royna at finna røttu loysninga upp á at bróta treiskar verjur niður. Tí eitt er víst – einki lið fer at koma í Gundadal og loypa á HB við fullari ferð. Tí má HB læra seg at lirka lásið upp, um nakað skal spyrjast burtur úr. danjal@sosialurin.fo Fótbóltur Dysturin hesa vikuna... Stórsteypadysturin: TVEIR NSÍ-ARAR Á SJÚKRAHÚS Bæði Jann Martin Mortensen og Petur Knudsen vórðu skiftir út við skaða í dystinum móti HB í gjár. Miðskeiðis í seinna hálvleiki fekk Jann Martin Mortensen ein harðan stoyt í nakkan í einum nærdysti móti einum HB-ara og mátti skiftast út. Móti dystarenda mátti Petur Knudsen eisini skiftast út, tá hann lendi á økslini eftir eina harða takling. Báðir fóru á Landssjúkrahúsið til kanningar. Enn er ov tíðliga at siga nakað um, hvussu álvarsamir skaðarnir eru. Einasti mátin at steðga Peturi Knudsen var at hála hann niður ella seta fót fyri hann. NSÍ legði seg aftur á vøllin og dúvaði upp á ferðina hjá áleyparunum, og tað eydnaðist HB MEGNAÐI IKKI AT HALDA PETURI KÚRRUN