týsdagur 26. mars 2019síða 55

23 SOSIALURIN MARS 2019 KVEIK Tað tók mær fleiri viiikur at bestemma meg til, hvønn lit eg skuldi velja. Mær dámar væl tað heilt ljósa ella gráligar litir, men nú prøvaði eg at gera ein køk, sum eg hevði ynskt, at eg tordi at fáa mær in real life. Hevði eg havt tíðina og fleiri køkar av sama slag, so hevði verið stuttligt at roynt at gjørt ymiskar stílar. Hetta var ein so hugnalig og stuttlig umvæling at gera.  EG HAVI BRÚKT: • DUGTIG spælikøk frá IKEA • Miðalfínt sandpappír (P240) • Máling frá Jotun Lady (Cashmere 10683, matt, 10) frá Colorama • Hvíta máling frá Colorama (hálvblankt 40) • Hvíta spreiðmáling frá Colorama (Quick universal spray) • Málaraklistur • Tveir smáar penslar • Lítla málingarrullu • Leðurreim frá 2x3 • Gullseymir frá 2x3 • Hamara • Skrúvublað SOLEIÐIS GJØRDI EG: 1. Av tí, at eg valdi at mála ein lit á ovara part av køkinum og ein annan lit á niðara part, so tók eg bara ovara partin av og skrúvaði eisini borðplátuna av. Eg tók vaskið, kókiplátur og kranan úr og skrúvaði handtøkini og skápshurðarnar av. 2. So fór eg í holt við at pussa allar flaturnar eitt sindur við sandpappíri, so málingin skuldi hefta betur. Eg brúkti eitt miðalfínt sandpappír, so tað ikki bleiv so ruflut. Eg gav eisini krananum, vaskinum og kantunum á kókiplátunum ein lítlan umgang við sandpappírinum. 3. Síðan vaskaði eg alt støvið frá sandpappírinum væl av køkinum. Eg koyrdi málaraklistur á, har eg ikki vildi, at máling skuldi koma á - plastikkið á skápshurðunum, tað svarta á kókiplátunum, á ”rørið”, har krókarnir hanga og onkrastaðni inni í skápunum eisini. Eg málaði bara botnin og síðurnar inni í skápunum.  4. Eg málaði alt tvær ferðir og okkurt tríggjar ferðir, eitt nú borðplátuna og hillarnar við síðuna av ovninum (ella er hatta ein mikroovnur?). Til kranan, vaskið og kantarnar á kókiplátunum brúkti eg spreiðmáling og gav hesum tríggjar umgangir við máling. Hevði eg gjørt tað umaftur, hevði eg keypt okkurt slag av spreið, sum kundi forsegla, so tað helt betur. 5. Upprunaliga ætlaði eg at spreiðmála handtøkini hvít, men eg droppaði tað. Eg endaði við at keypa eina leðurreim frá 2x3 og nakrar fittar gullseymir at hefta tað við. Eg klipti reimina eitt sindur longri, enn sjálvt handtakið var, so hon kundi boyggjast, og tað bar til at taka um hana og lata skápini upp. Eg brúkti fýra seymir til hvørt handtak og royndi at goyma holini, har upprunaligu handtøkini vóru. 6. At enda skrúvaði eg alt saman aftur – væl at merkja, tá alt var væl og virðiliga tornað. Og tadaa – ein nýggjur spælikøkur. Børnini í húsinum eru ovurfegin og spæla við køkin sum ongantíð fyrr. Vit fáa kaffimunn og ein døgurðabita í heilum úr nýggja køkinum. Tað er nokk ikki bara hjá mammuni, at broyting frøir! Nógvur íblástur og sokallað IKEA-hack til henda køkin er at finna á pinterest, um tú skrivar ’IKEA DUGTIG hack’. Góðan arbeiðshug!