hósdagur 4. juli 2019síða 22

SOSIALURIN OYGGJALEIKIR 6 1939 6. JULI - 12. JULI 2019 LOKSINS ER JUDO VIÐ AFTUR JUDO: FYRI FYRSTU FERÐ Í 10 ÁR ER JUDO VIÐ AFTUR Á OYGGJALEIKUNUM. - HETTA VERA MØGULIGA MÍNIR SEINASTU OYGGJALEIKIR OG MÍN SEINASTI MØGULEIKI AT FÁA EITT GULLHEIÐURSMERKI, SIGUR EIN AV ROYNDASTU MONNUNUM Í FØROYSKUM JUDO, PETUR SIGURÐ JOHANNESEN. Pætur Albinus Tað er ikki ofta, at judo er umboðað á oyggjaleikunum. Í Gibraltar verður tað fyrstu ferð í 10 ár, at judo er við, og hetta ger tað bara serliga spennandi hjá føroysku judo-íðkarunum at sleppa at heilsa upp á felags oyggjabúgvarnar aftur. - Tað er ógvuliga spennandi at vera við aftur á oyggjaleikunum, sigur ein av royndu monnunum í føroyskum judo, Petur Sigurð Johannesen. - Vit eru sera spent at síggja hvussu støðið verður og í hvønn mun vit hava tikið okkum fram í mun til hinar oyggjarnar, leggur hann afturat. Nú judo loksins er við aftur á oyggjaleikunum, so verður heldur ikki spart upp á krútið. Heili 14 judo-íðkarar eru við. 10 mans og fýra kvinnur. - Nakrir av okkum hava roynt at verið á oyggjaleikum fyrr, men fyri meira enn helvtina av hópinum verður hettar eitt nýtt upplivilsi, greiðir Petur Sigurð frá. Judo var fyrstu ferð við á oyggjaleikunum í Føroyum í 1989, og judo var eisini umboðað øll árini fram til og við 1995 á Gibraltar. Tá íkom tó ein oyðimarkargongd hjá hesi stríðsítróttargreinini, sum ikki var við aftur fyrr enn á Rodos í 2007 og so aftur Álandi í 2009. Síðani hevur aftur verið turkur. Júst Rodos og Áland, saman við Føroyum og Gibraltar, standa seg vanliga væl í judo, og tað er óivað eisini orsøkin til, at Gibraltar sum vertur í 2019 hevur valt at hava judo við. Tá ið judo ikki er við á oyggjaleikunum, plaga føroyskir judo-íðkarar heldur at luttaka í øðrum útlendskum kappingum so sum Reykjavík Open, Copenhagen Open og NM. FYRIREIKING Eitt, sum er gleðiligt fyri menningina í føroyskum judo, er at tað hesaferð eru metnógvar kvinnur við føroyska liðnum. Tær eru fýra í tali, og tað prógvar ein sum heild vaksandi áhuga ímillum kvinnur í føroyskum judo. Landsliðið hevur gjørt sítt til at brynja seg til leikirnar á Gibraltar. - Vit hava fyrireikað okkum við miðvísari venjing, umfamt at vit hava luttikið í nøkrum noðurlendskum kappingum í ár fyri at fáa fleiri royndir. Haraftrat hava vit havt landsliðsamlingar, har landsliðsvenjarin hevur verið við, greiðir Petur Sigurð frá og leggur afturat, at tað eisini hava verið útlendingar við fyri at geva føroyingunum íblástur og mótstøðu. Landsliðsvenjari er danski Roland Vogt. Hann hevur verið landsliðsvenjari síðani á heysti 2016. - Roland hevur nógvar royndir bæði sum venjari, men eisini sum kempari, og tí hevur hann givið okkum nógv í mun til venjing, og eisini hvussu vit kunnu gera brúk av taktikki í okkara dystum. Hann hevur nógvar ambitiónir og er sera málrættaður í sínum venjingarhátti. Hetta setir eisini krøv til okkum íðkarar, sum vit sjálvandi gera okkara ítasta til at liva upp til, sigur Petur Sigurð. STÓR MÁL Fyrireikingarnar hjá føroyska judo-hópinum enda við eini stórari venjingarlegu í Klaksvík, har flestu judoíðkarar í Føroyum eru við umframt tríggjar útlendskar venjarar, ið koma frá Sveis, Onglandi og Danmark. Síðani verður kósin sett ímóti Gibraltar, og har hevur føroyski landsliðsvenjarin sett stór mál. - Hann hevur meldað út, at málsetningurin er at føroyingar skulu vinna heiðursmerki í øllum vektbólkum, sum stillað verður upp í. Um hetta eydnast, so verða tað bestu oyggjaleikir fyri føroyskt judo nakrantíð, sigur Petur Sigurð, sum eisini hevur sett sær sjálvum stór mál. - Persónliga fari eg eftir einum fyrsta plássi. Eg havi vunnið bronsu á leikunum í 2007 og 2009. Ikki er greitt nær judo er við aftur á oyggjaleikunum aftur aftaná Gibraltar 2019, so hetta vera møguliga mínir seinastu oyggjaleikir og mín seinasti møguleiki fyri at fáa eitt gullheiðursmerki á oyggjaleikunum, sigur Petur Sigurð Johannesen. HÓPURIN MENN Bárður Hentze Lenvig Búgvi Poulsen Dánjal á Krákusteini Edvard Johannesen Fríði M. Carlsson Gunnar Magnussen Jógvan Páll Kristiansen Nicolai Skoubo Petur Sigurð Johannesen Sigmundur Johansen KVINNUR Hansa Torgerð Ellingsgaard Maiken E. Bringsberg Sanna N. Djurhuus Silja Johannesen VENJARAR Roland Vogt