hósdagur 4. juli 2019síða 24

SOSIALURIN OYGGJALEIKIR 8 1939 6. JULI - 12. JULI 2019 TEIR DROYMA UM FYRSTA SIGURIN KURVABÓLTUR: TEIR HAVA FINGIÐ ELDDÓP OG AVSMURNINGAR, MEN NÚ ER EITT UNGT OG SPENNANDI LIÐ TILREIÐAR AT VITA UM STÓRA FRAMGONGDIN HERHEIMA GEVUR ÚRSLIT. - VIT FARA EFTIR EINUM SIGRI, OG FÁA VIT HANN, SO ER TAÐ HEILT FANTASTISKT, SIGUR LANDSLIÐSVENJARIN. Pætur Albinus Føroyskur kurvabóltur var á fyrsta sinni við á oyggjaleikunum á Jersey í 2015, og hóast hetta gjørdist til eina lærustriku av teimum heilt stóru við fleiri stórtapum, so var hetta ein avmerking av einari fullkomiliga nýggjari tíð í føroyskum kurvabólti. Frá at hava verið eitt felag við nøkrum áhugaleikarum í einari lítlari fimleikarhøll, so hevur føroyskur kurvabóltur eftir einans fimm árum vaksið seg til at hava eina støðuga landskapping við heili fimm feløgum við tí sætta á veg. Spreingjandi vøksturin í føroyskum kurvabólti hevur givið støðinum og landsliðnum eitt spark. - Leikaramenningin hevur verið ótrúligt. Sum dagur og nátt, sigur føroyski landsliðsvenjarin, Pól Jakobsen. - Tað er stórur munur á tí, sum man sendi til Jersey í 2015 og so nú til Gibraltar. Vit hava havt trupult við at úttaka landsliðshópin, heilt einfalt tí somikið nógvir góðir leikarar hava verið at valt ímillum. So landskappingin hevur havt alstóran týdning fyri landsliðið og fyri føroyskan kurvabólt yvirhøvur, sigur Pól, sum fer so langt sum at siga, at landskappingin eisini hevur bjargað lívinum í føroyskum kurvabólti. - Uttan landskappingina hevði kurvabólturin helst dottið niðurfyri, sigur hann. FYRIREIKINGAR Tað hava eisini hug at leggjast ungir leikarar afturat í føroyskum kurvabólti, og hetta merkist eisini aftur á landsliðnum. Á Jersey í 2015 var miðalaldurin á føroyska landsliðnum langt uppi í 30-unum, men nú eru 38 ára gamli Magnus Jakobsen og 33 ára gamli Bjarni W. Zachariasen aldursforsetar á einum greitt yngri liði, har tað eitt nú eru fimm spælarar yngri enn 21 ár. - Vit hava fatur á rætta endanum, heldur landsliðsvenjarin. - Vit vóru samdir um at senda eitt ungt lið avstað, tí so hava vit helst nakrar ungar leikarar, ið koma heimaftur og veruliga brenna fyri tí. Hetta er ein gularót fyri teir, og oyggjaleikirnir eru so at siga tað einasta, ið vit kunnu bjóða ungu leikarunum, sigur Pól og vísir á, at teir mugu venda hvørjari krónu og eitt nú venja í Klaksvík tvær ferðir um vikuna av tí at hallarleigan í Tórshavnar kommunu er so dýr. - Hetta er harmiligt, tí í skúlanum á Argjahamri eru góðar umstøður og seks kurvar, sigur Pól, sum tó roynir at hava fokus á rætta stað og ikki vil taka hendan trupulleikan upp áðrenn oyggjaleikirnar. Í fyrireikingunum upp til oyggjaleikirnar hevur føroyska landsliðið vant tvær til tríggjar ferðir um vikuna og spælt tveir venjingardystir. Tann fyrri varð vunnin 78-42 ímóti einum úrvalsliði, og tann seinni varð taptur tepurt 71-67 ímóti næstbesta liðnum hjá danska Stevnsgade. - Seinni dysturin hevði nógv at siga fyri ungu leikararnar, tí nú kann man siga teir hava fingið dópin. Teir vístu eisini góðan karakter, og at síggja slík framstig gevur venjaranum blóð á tonnina, sigur Pól Jakobsen. VILJA VINNA Á undanfarnu oyggjaleikum kom tað til sjóndar, at føroyingarnir serliga eru aftanfyri mótstøðumenninar í tí kropsliga. - Trupulleikin hjá okkum er fysikkurin og støddin á spælarunum. Allir spælararnir, sum hinir hava, eru størri og sterkari enn okkara, og tildømis ímóti Saaremaa seinast var teirra lægsti maður á hædd við okkara hægsta mann, sigur Pól Jakobsen, sum tó leggur afturat, at fleiri av teimum ungu og nýggju leikarunum eru væl vaksnir, og at miðalhæddin sum heild veksur. - Musklar kann man eisini altíð gera nakað við, sigur Pól. - Styrkin hjá okkum hevur altíð verið kvikleikin, og vit hava eisini ment okkum til at hava fleiri vápn at spæla uppá hesaferð, leggur hann afturat. Føroyar eru komnar í ein truplan bólk við Saaremaa, Guersney og Jersey. Saaremaa hevur fulltíðarleikarar, Guersney kemur vanliga í hálvfinalurnar, og so er tað meira ógreitt hvørjum Jersey kemur við. - Men vit gleða okkum at sleppa at máta okkum. Vit vilja síggja hvar vit flóta og meta um vit gera røttu framstigini, sigur Pól. Eftir bólkaspælið fáa Føroyar eisini at spæla ein plaseringsdyst at spæla, og her er helst frægasti møguleikin fyri fyrsta føroyska sigrinum í kurvabólti á oyggjaleikum. - Vit fara eftir einum sigri, og fáa vit hann, so er tað heilt fantastiskt, sigur landsliðsvenjarin, Pól Jakobsen. HÓPURIN LEIKARAR Bastian Zachariassen Bjarni W. Zachariasen Dánjal Hansen Ernesto F. Henriquez Fríði í Geil Jensen Kristmund Petersen Magnus Jakobsen Ólavur Weihe Joensen Petur Ovi J. Mørkøre Rainer Latupeirissa Sjúrður Sivertsen Steen Rói Lorenzen VENJARAR Pól Jakobsen John Norðbúð Thomsen