hósdagur 4. juli 2019síða 26

SOSIALURIN OYGGJALEIKIR 10 1939 6. JULI - 12. JULI 2019 TORKIL FER EFTIR TRIMUM GULLMERKJUM SÚKKLING: HANN ER FULLTÍÐARSÚKKLARI OG LUTTEKUR Í STÓRUM KAPPINGUM Í EVROPA, MEN OYGGJALEIKIRNAR VIL TORKIL VEYHE IKKI VELJA FRÁ. - TAÐ ER EIN HEIÐUR AT KUNNA UMBOÐA FØROYAR. TAÐ VIL EG TIL EINHVØRJA TÍÐ GERA VIÐ STOLTLEIKA, SIGUR HANN. Pætur Albinus Hann súkklar sum fulltíðarsúkklari og luttekur í stórum í stórum kappingum kring Evropa, men Torkil Veyhe veksur seg ikki størri enn oyggjaleikirnar ella føroyska landsliðið, og hann hevur tí ikki umhugsað at strika hesa kappingina úr tí annars tætta kappingarkalendaranum. - Tað hevur sum so ikki verið upp á tal, sigur Torkil Veyhe. - Men tað skuldi sjálvandi passa inn í kalendaran og ikki forstýra mínar fyrireikingar ov nógv. Tað hevur tað ikki gjørt, so upp á tann mátan hevur tað ikki verið uppá tal at strika oyggjaleikirnar, sigur Torkil Veyhe og leggur afturat, at tað ikki kravdi nakað at yvirtala arbeiðsgevaran, Riwal Readynez. - Teir halda tað vera ein heiður at man sum íðkari kann umboða sína tjóð, sigur hann. Torkil súkklar við danska liðnum, Riwal Readynez, á sokallaða prokontintental, ið er næsthægsta støðið í Evropa, beint undir World Tour. Riwal Readynez fær tó viðhvørt wild card til at luttaka í kappingum á ovastu rók, og herfyri sat Torkil Veyhe eitt nú í sama súkklufelti sum ferfaldi Tour de France-vinnarin, Chris Froome. Hetta var í Tour de Yorkshire, og hóast støðið á oyggjaleikunum er nakað heilt annað, so vil Torkil framvegis vera við. - Tað er líkasum her, ið alt byrjaði, og tað er her grundin liggur til at eg valdi at invistera nógva tíð upp á venjing av fyrstan tíð. Hetta var tað man sá upp til, sigur Torkil og heldur fram: - Tað er eisini ein heiður at kunna umboða Føroyar. Tað vil eg til einhvørja tíð gera við stoltleika um møguligt, og í løtuni er hetta einasti møguleiki eg havi, sigur Torkil vísandi til, at hann annars má umboða Danmark í altjóða høpi. - Ynskið er sjálvandi eisini at kunna umboða Føroyar til eitt nú HM og EM, sigur hann. GULL-HATTRIKK 29 ára gamli Torkil Veyhe var við á sínum fyrstu oyggjaleikum á Rodos í 2007, tá ið hann sum blaðungt talent hevði eitt 8. pláss á einkultstarinum sum sítt besta úrslit. Síðani tá er nógv vatn runnið í ánna, og hann er í løtuni greitt tann besti á einkulstartinum á oyggjaleikunum. Hann hevur vunnið gull í hesari greinini síðstu tvær ferðirnar - á Jersey í 2015 og í Gotlandi í 2017. Torkil fer sjálvandi eftir at vinna einkultstarin á triðja sinni, men hann ætlar sær meira enn tað. - Málið er at koma aftur við trimum gullheiðursmerkjum og vónandi eisini okkurt í liðkappingini, sigur Torkil, sum í Gotlandi seinast bleiv nummar tvey í býarsúkklingini og nummar fimm a landavegnum. Eitt annað gott kort, sum Føroyar hava í hondini, er Dávur Magnussen. - Hann verður betri og betri fyri hvørt ár. Vit hava tvey góð kort at spæla upp á, og tað skulu vit brúka, sigur Torkil, sum eisini peikar á, at Helgi Winther Olsen hevur fyrireikað seg væl til einkultstartin og eisini er eitt gott kort at hava har. Tað er ikki einans Torkil, ið hevur góðar møguleikar at súkkla gull heim til Føroya í einstaklingakappingini. - Vit hava góðar møguleikar fyri gull í øllum trimum teinunum á mannfólkasíðuni sum einstaklingar, metir Torkil. - Vónandi halda vit okkum væl til, soleiðis at vit eisini kunnu fáa heiðursmerki sum lið, sigur hann. HÓPURIN MENN Dávur Magnussen Gunnar Dahl-Olsen Helgi Winther Olsen Torkil Veyhe KVINNUR AElsa Berg Maria Svabo Hansen