hósdagur 4. juli 2019síða 30

SOSIALURIN OYGGJALEIKIR 14 1939 6. JULI - 12. JULI 2019 NÝGGJ BYRJAN Í FØROYSKUM TENNIS TENNIS: - VIT FARA TIL GIBRALTAR AT VÍSA ANDLIT, UMBOÐA OKKARA ÍTRÓTTARGREIN OG ROYNA AT BYRJA AV NÝGGJUM, SIGUR 38 ÁRA GAMLI PÆTUR M. DAHL, SUM ER YNGSTI MAÐUR Í HÓPINUM. HANN FEGNAST UM BØTTAR UMSTØÐUR OG NÝGGJAR MØGULEIKAR Á TENNISVØLLUNUM Í GUNDADALI. Pætur Albinus Ein av teimum royndu tennisspælarunum í Føroyum er Pætur M. Dahl. Hóast hann er 38 ára gamal, so kann hann breggja sær av at vera tann yngsti í tennishópinum, sum fer at umboða Føroyar á oyggjaleikunum í Gibraltar. Umframt Pætur, so eru tað nevniliga tríggir eldri mans enn hann sjálvur, Jón Brekku, Annfinn Gaard og Pablo Marin, sum skulu spæla fyri Føroyar. Pætur og Jón hava verið við nakrar ferðir, men hetta verður fyrstuferð, at Annfinn Gaard og Pablo Merin eru við. Annfinn hevur spælt nógv tennis í Danmark, meðan Pablo Merin hevur spælt í Argentina, haðani hann er. Á leikunum í Gotlandi í 2017 spældi Nicholas Petterson, ið er dani við føroyskari ætt, seg heilt fram til fjórðingsfinaluna. Hann er ikki við hesaferð, og føroyingarnir eru eisini meira varnir við at tosa um vónir í hesi tenniskappingini, ið stundum er á sera høgum støði. Pætur M. Dahl sigur, at hann kundi hugsað sær at gjørt tað gott í B-kappingini, ið er ein kapping fyri teir, ið eru slignir úr upprunaligu kappingini. Hesa kappingina vann hann á Bermuda í 2013. Fyrireikingarnar til oyggjaleikirnar á Gibraltar hava verið á einari leið, men føroyska veðurlagið og tennis ganga ikki júst hond í hond. - Veðrið hevur sum kunnugt ikki verið serliga gott í ár. Tað hevur ikki verið gott várveður, so vit hava havt trupulleikar við at fáa høvi at spæla. Vit hava tó klárað at fingið tvær-tríggjar venjingar um vikuna, umframt dystir um vikuskiftini. Vit høvdu óivað havt gott av at havt tveir mánaðir afturat við fyrireiking, sigur Pætur M. Dahl. - Men vit hava roynt at fingið sum frægast burturúr, leggur hann afturat. Støðið á tennis á oyggjaleikunum er høgt, men tó eisini ógvuliga svingandi. Tað er ikki til at spáa um hvørjar leikarar londini hava við, men vanliga eru tað spælarar alt frá teimum, ið hava støðið til at vinna sær stig til ATP-listan, heimsstyrkislistan, og niður til teir spælararnar, ið einans spæla á hugnastøði. NÝGGJ BYRJAN Tað eru broytingartíðir í føroyskum tennis. Vøllirnir í Gundadali hava fingið spildurnýtt undirlag, og herfyri setti Tennissamband Føroya nýggjan landsliðsvenjara í starv. Talan er um argentinska Pablo Marin, sum hevur føroyska konu, og sum hevur drúgvar royndir sum venjari - eitt nú í spanska stórbýnum Barcelona, har hann og familjan hava búð. - Tað er deiligt at hava venjara, sigur Pætur M. Dahl. - Vit hava sjáldan havt venjarar, og tað er altíð keðiligt at vera bæði leikari og venjari í senn. Tá hevur tú ikki eins góðan møguleika at hugsavna teg um at spæla. Tað er deiligt at møta upp, venja og so fara heimaftur, sigur Pætur M. Dahl og leggur afturat, at tað eisini hava verið betri stundir at fara niður í smálutir og gjørt servenjingar, og at hesar hava munað væl. Tennissamband Føroya ætlar sær í næstum undir at útbúgva fleiri venjarar, soleiðis at eitt nýtt grundarlag verður lagt undir menningina av tennis í Føroyum. Nýggju umstøðurnar og nýggi venjarin varskógva møguleikan um eina nýggja byrjan í føroyskum tennis, og tað er eisini ein av orsøkunum til, at tann ikki-so-ungi føroyski hópurin fer við til oyggjaleikirnar í Gibraltar. - Tað er eingin loyna, at vit eru royndir, og at vit ikki hava fingið sett nýggjar spælarar til. Vit fara við fyri at vísa at tað framvegis er lív í føroyskum tennis, og at vit hava eina vón um at fáa fleiri yngri fólk, eisini gentur, at spæla tennis. Vit fara til Gibraltar at vísa andlit, umboða okkara ítróttargrein og royna at byrja av nýggjum, sigur Pætur M. Dahl. UMSTØÐURNAR Nýggja undirlagið, ið er lagt á tennisvøllirnar í Gundadali, er graslíki. Tað nú gamla undirlagið var heilt afturi frá 1990, og tað var tískil væl slitið. Tað var úr gummi, og tað var ikki serliga nøktandi, eitt nú tí at undirlagið var seint og at bólturin stakk høgt. Hetta er nú munandi betrað. Nýggja graslíkið syrgir fyri einum natúrligari og støðugari hoppi hjá bóltinum, og tey fimm tonsini av sandi, sum eru í hvørjum vølli, syrgja fyri at regnið verður sogið og at vøllurin stórt sæð er tann sami at spæla óansæð um hann er turrur ella vátur. Á oyggjaleikunum í Gibraltar verður spælt á hørðum undirlagi, altjóða kent sum hardcourt, og hetta er til fyrimuns fyri føroysku spælararnar, ið eru vanir við at spæla á stúttum undirlagi heldur enn á eitt nú grúsi. Undirlagið er eftir ætlan ikki einasta umvælingin, sum tennisvøllirnir í Gundadali skulu fáa. Í vetur er nevniliga ætlanin at fáa ljós upp, soleiðis at tað kann spælast tennis longri hvørt ár. Veðurlagið um várini og heystini eru toliliga væl egnað til tennis, men stundum er tað myrkrið, ið darvar, og við nýggju ljósunum kann spælitíðin í tennis heilt upp í tvífaldast - frá teimum núverandi trimum-fýra mánaðunum upp í sjey- átta mánaðir. HÓPURIN MENN Annfinn Gaard Jón Brekku Pablo Merin Pætur M. Dahl VENJARAR Pablo Merin