hósdagur 4. juli 2019síða 32

SOSIALURIN OYGGJALEIKIR 16 1939 6. JULI - 12. JULI 2019 UNGUR HÓPUR VIÐ GÓÐUM ROYNDUM OG GÓÐUM VÓNUM FRÆLSUR ÍTRÓTUR: FØROYSKI HÓPURIN Í FRÆLSUM ÍTROTTI TELUR 15 ÍÐKARAR, OG TÁ ERU ENNTÁ TVÆR GREINAR, IÐ IKKI SLEPPA AT LUTTAKA. VIT HAVA PRÁTAÐ VIÐ BRONSUVINNARARNAR Í LIÐKAPPINGINI Í HÁLVMARATON HJÁ MONNUM, TÁ IÐ OYGGJALEIKIRNIR SEINASTU VÓRU Á GIBRALTAR Í 1995. Sjúrður Hildarson Hoydal Á Gibraltar eru Føroyar sum altíð væl umboðaðar í frælsum ítrotti. Við 15 íðkarum er hópurin hin størsti nakrantíð. Bæði rennarar, leyparar og kastarar ætla sær at vísa føroyskan frælsan ítrott fram á Gibraltar. Í renning eru spurtteinarnir serliga væl umboðaðir í mun til áður, og nógv verður væntað av Tóri Mortensen, ið skal spurta á oyggjaleikum fyri triðju ferð. 21 ára gamli Tórur Mortensen hevur stríðst við skaða og luttekur ikki í trýstøkk, ið hann annars longu hevur eitt silvurheiðursmerki á oyggjaleikum fyri. Á Gibraltar skal hann ístaðin hugsavna seg um spurtirnar. Skjóti havnarmaðurin skal renna 100 og 200 metrar, og hann tykist í góðari venjing til serliga 200 metra teinin. Tí sunnudagin skar hann nærum eitt hálvt sekund av føroyska metinum í 200 metrum. Tað gjørdi hann, tá ið hann saman við 12 øðrum í oyggjaleikahópinum luttók á VU- Spelen stevnuni í Gøteborg. Hann rann teir 200 metrarnar í tíðini 22,43 sekund – 0,48 sekund skjótari enn nú fyrrverandi føroyska metið. FLEIRI FØROYSK MET BEINT UNDAN OYGGJALEIKUM 12 av teimum 15 frælsu íðkarunum í Gibraltar luttóku í VU-Spelen vikuskiftið undan at oyggja­ leikirnir verða settir. Henda kappingin var hin sein­asta í drúgvum fyrireikingum til oyggja­leik­ir­ nar á Gibraltar. Fyrireikingarnar hava sum vera man verið í gongd longu síðani seinastu oyggjaleikir, og serliga hetta seinasta árið hevur verið kappast nógv uttanlands. Flestu av øroysku íðkararunum hava luttikið í innandura kappingum í Reykjavík, Malmø og Skive, og í vár hevur verið luttikið í fleiri kappingum í Skive, greiðir Guttorm Sørensen frá. Guttormur sjálvur hevur góð minni frá Gibraltar, tí saman við Halli Holm og Niels Jákupi Jakobsen vann hann bronsu í liðkappingini í hálvmaraton í 1995. -Har gekk sera væl á VU-Spelen, og blivu fýra føroysk met sett og fleiri settu eisini persónlig met. So fyrireikingarnar hava gingið væl, og tað verður sera spennandi á Gibraltar, sigur renni­leg­ endan. Umframt metið hjá Tóri Mortensen setti Elisa­ beth Holm Simonsen føroyskt met í 100 metrum, tá ið hon gjørdist fyrsta føroyska kvinnan at renna teinin undir 13 sekund. Nú eitur metið 12,99 sekund. Teresa Bláhamar leyp eisini hægri enn nakran­ tíð, tá ið hon hækkaði sítt egna føroyska met við seks sentimetrum. Føroyska metið er nú 161 sentimetrar. KASTARAR ERU VIÐ SVIÐUSOÐ Á GIBRALTAR Fjórða føroyska metinum um vikuskiftið syrgdi Guðrið Káradóttir Petersen fyri. Tað lá væl fyri hjá henni í hamarakasti í Gøteborg, og hon longdi um føroyska metið við einum góðum metri, so at tað nú eitur 42,89 metrar. Men hvørki hamarakastarar ella spjótkastarar sleppa upp í part á Gibraltar. Umstøðurnar eru ikki til tað. Í stuttum snýr tað seg um, at eingin grasvøllur er at kappast á, og tað ber ikki til at halda hesar kastikappingar á graslíki. Tí er einasta kastigrein á oyggjaleikunum kúluvarp, har Føroyar eru umboðaðar við ungu Lýdiu P. Simonsen. KANN REBEKKA GERA TAÐ AFTUR? Spurdur um vónirnar til føroysku úrslitini er Guttorm Sørensen nakað varin. -Tað er altíð trupult at spáa um úrslit á Oyggjaleikum, tí vit hava so lítla vitan um mótstøðuna frammanundan. Men sum tað sær út, so hava hinar oyggjarnar eisini nógvar ungar íðkarar, so vit hava rímiligar vónir um úrslit í topp tíggju í øllum førum og nøkur í topp fimm. Okkurt heiðursmerki eigur at vinnast, men tað verður ikki lætt hjá okkara íðkarum. Á Gotlandi vann Rebekka gull og bronsu, Tórur vann silvur og Margit vann bronsu og tey eru við aftur hesuferð, greiðir rennilegendan frá. Liðfelagarnir hjá Guttormi í 1995, Hallur Holm og Niels Jákup Jakobsen gera eisini greitt, at ávísar vónir eru til Rebekku Fuglø á miðteinunum. 26 ára gamli rennarin luttekur á sætta sinni á oyggjaleikum, og á Gotlandi fyri tveimum árum síðani eydnaðist væl. Tá vann Rebekka Fuglø gull á 800 metrum og bronsu á 1500 metrum, og hetta gevur sjálvandi onkrar væntanir. -Hon er okkara stóra stjørna, heldur Hallur Holm fyri um rennaran úr Treysti, ið nú er millum fremstu rennarar í Danmark. Um úrslitini verða góð ella ikki hesaferð vil Guttorm Sørensen ikki spáa um, men hann er vísur í einum: - Vit vita við vissu, at tey øll gera sítt ítasta fyri Føroyar, og so er at vita hvussu langt tað røkkur, ger Guttorm Sørensen púra greitt. HÓPURIN Rebekka Fuglø (1993) úr Treysti 800m, 1.500m og 5.000m (sættu ferð síðan 2009) Julian Gregersen (1998) úr Treysti 800m og 1.500m (aðru ferð síðan 2017) Oddvør Josephsen úr Treysti 400m og 1.500m (aðru ferð síðan 2017) Maria Biskopstø (2002) úr Treysti 400m og 800m (fyrstu ferð) Rigmor N. Arge (1969) úr Hvirluni hálvmaraton (fimtu ferð síðan 1999) Tórur Mortensen (1998) úr Hvirluni 100m og 200m (triðju ferð síðan 2015) Lýdia P. Simonsen (2001) úr Hvirluni kúlustoyt (fyrstu ferð) Edna Maria Debes (1997) úr Hvirluni longdarlop (fyrstu ferð) Margit Weihe Frímundsdóttir (1999) úr Bragdinum 200m og trístøkk (aðru ferð síðan 2017) Elisabet Holm Simonsen (2001) úr Bragdinum 100m og longdarlop (aðru ferð síðan 2017) Alda S. Lamhauge (1998) úr Bragdinum 100m og 200m (aðrun ferð síðan 2017) Andreas B. Antoft (2002) úr Bragdinum 200m og longdarlop (fyrstu ferð) Teresa F. Bláhamar (2001) úr Bragdinum hæddarlop (fyrstu ferð) Bára J. Glerfoss (2003) úr Bragdinum trístøkk (fyrstu ferð) Sarah Vallin (1998) úr Bragdinum 10.000m og hálvmaraton (fyrstu ferð)