týsdagur 17. september 2019síða 34

SEPTEMBER 2019 10 HONDBÓLTUR 2019/20 H71 er eitt ár eldri H71-kvinnur tóku øll á bóli í teimum fyrstu umførunum í fjør, tá ið tær vunnu á øllum liðunum. Í ár skal tað støðið finnast aftur Einar leggur dent á disiplin - Vit hava fingið ein umráðandi styrk, sigur Einar Jónsson og sipar til Sofie Søberg, ið stutt undan kappingarbyrjan kom til H71. - Vit manglaðu júst ein høgra bakk, og eg haldi at liðið hjá okkum er væl betri av tí sama, sigur nýggi venjarin hjá H71. - Eg haldi eg tora at siga at vit skulu spæla um heiðursmerki í øllum kappingum, tað er málið hjá okkum. Lykilin til tað er er einfaldur. - Tað er disiplin, disiplin, disiplin. Vit skulu hava hægri leikferð og størri trýst í okkara spæl, og megna vit tað, so sær tað gott út. - Tær vísa í øllum førum til venjing at tær eru til reiðar. Eg rokni kortini við, at í fyrru helvt av kappingarárinum kunnu vit fáa nakrar keðiligar dystir, men eg vóni samstundis at vit eisini raka eitt gott støðið, sigur venjarin og heldur fram: - Vit eru undir menning, og í løtuni eru tað fleiri lið sum eru betri enn vit, men eg vænti at vit kunnu vinna á øllum á einum góðum degi. - Tað er ótrúliga spennandi at arbeiða við hesum liðnum, og har er øgilig góðska. Vit hava eisini einar fimm leikarar á landsliðnum, sigur Einar Jónsson, ið at enda nýtur høvi at rósa H71 fyri at gjørt eitt gott ungdómsarbeiði. Durita vil hava eitt heiðursmerki - Okkara vónir eru bara at gera tað betri enn hini árini. Kanska vit gjarna vilja hava eitt ítøkiligt prógv upp á tað, sum til dømis eitt heiðursmerki, sigur Durita Toftum Joensen, 20 ára gamli strikuleikarin hjá H71, ið eisini er úttikin til landsliðið. - Eg haldi heilt vist at vit bara hava betra okkum, og vit kunnu saktans gerast betri, sigur Durita og tekur eisini undir við at tilgongdin av Sofie Søberg er ein styrkur. - Tað ger nógvan mun at hava eina vinstrahenta á høgra bakki, sigur Durita. Eftir at vera úttikin til landsliðið eru vónirnar eisini at halda fram at betra seg, og kanska bíta seg fastan. - Tað er gingið nokkso skjótt, men tað vóni eg, sigur Durita. Bæði á landsliðnum og í H71 hevur strikuleikarin, Mariu Halsdóttir Weyhe sum liðfelaga, og tær hava eitt tiltikið samstarv, og ofta verður tikið til at tær duga at finna hvørja aðra í blindum. Spurd um tær fara at halda fram at menna hetta samstarvið, svarar Durita soleiðis: - Eg veit ikki um tað ber til at menna so nógv meira, men eg haldi at eg havi eitt gott samstarv við bæði Mariu, Maritu og nú Sofie, sigur strikuleikarin. Annika hevur góðar verjuleikarar frammanfyri seg Annika Fríðheim Petersen er enn ein av ungu H71-leikarunum, ið hava ment seg hesi fyrstu tvey árini í bestu kvinnudeildini. Herfyri fekk 20 ára gamli málverjin fyrstu ferð landsliðboð, og tað er einki at ivast í, at Annika gleðir seg at royna seg ímóti Rumenskum og Pólskum skjúttum. - Eg haldi eg byrji at fáa meira stýr á skjúttarnar í Føroyum, sigur Annika, men viðgongur at enn eru onkrar, sum volda trupulleikar fyri málverjan. - Eg haldi at samstarvið við verjuna blívur betri og betri. Avtalurnar sita millum meg og blokkarnar, og tað haldi eg riggar væl – eisini við nýggju leikarunum, sigur landsliðsmálverjin og leggur dent á at hon altíð hevur eina góða verju frammanfyri seg. Tað serliga við H71-hópinum er, at allar eru rættiliga ungar, og tær flestu hava spælt saman síðani ungdómsdeildirnar. Hetta heldur Annika eisini sæst aftur, ið tí góða samanspælinum sum er ímillum eitt nú Mariu og Duritu. Nú er ein spildurnýggjur venjari komin, eins og Sofie Søberg er komin úr Neistanum. - Tað riggar bara væl. Sofie passar væl inn sosialt, og vit eru glað fyri venjaran, staðfestir Annika Fríðheim Petersen. H71 kvinnur Stovnað: 1971 Kappingarárið 2018/19: Nummar fýra í landskappingini og hálvfinala í steypakappingini. Hópur: Annika Fríðheim Petersen Málverji Karin Holm Simonsen Vinstri vongur Silja Sámalsdóttir Vinstri bakkur Anna á Steig Høgri bakkur Bára Hansen Vinstri vongur Bjørk Brimnes Strikuspælari Maria Halsdóttir Weyhe Spælskipari Karina Eysturtún Rubeksen Spælskipari Marita Mortensen Vinstri bakkur Eva Barba Arge Vinstri vongur Durita Toftum Joensen Strikuspælari Vár Højgaard Thomsen Málverji Sára Vesturtún Jacobsen Bakkur Sunniva Bogadóttir Strikuspælari Vár Bentsdóttir Zachariasen Strikuspælari Lív Bentsdóttir Zachariasen Bakkur Elisabet Holm Simonsen Høgri vongur Anna Schiller Lindenskov Bakkur Christina Turiðardóttir Arge Vinstri vongur Sofie Søberg Larsen Høgri bakkur Guðrið Bogadóttir á Borg Høgri vongur Tilgongd Bára Hansen, Vár Bentsdóttir Zachariasen, Lív Bentsdóttir Zachariasen, Anna Schiller Lindenskov, Sofie Søberg Larsen Frágongd Tórhalla Thorsteinsson, Katrin Guðrunardóttir Højsted Ingi metir: Nummar 2 H71 kvinnur blíva betri og betri. Avbjóðingin í fjør var konditionin á nøkrum spælarum, og tað skal loysast. Tær eru ungar og nú er miðalaldurin eitt ár eldri, og hevur fingið ein umráðandi styrk á høgra bakk Tað hevur manglað. H71 hevur eina fyrstu uppstilling sum er krútsterk og málverjin verður betri og betri. Eg vænti at tær fáa silvur. Sosialurin metir: Nummar 3 Hoyvíksgentur eru blivnar eitt ár eldri afturat, og skulu nú læra at avgera dystir. Øll mótstøðulið løgdu mansverjir á Mariu H. Weyhe og Maritu Mortensen í fjør, og tað verður spennandi um Sofie Søberg ella aðrir leikarar kunnu loysa tað spælið.