týsdagur 17. september 2019síða 40

SEPTEMBER 2019 16 HONDBÓLTUR 2019/20 Kann Kyndil uttan Marionnu? Greipuvinnararnir úr Kyndli hava næstan sama hópin í ár. Men saknurin í Føroya besta spælara í fjør, Marionnu Geirsdóttir Eystberg, verður stórur Bárður Kyndilskvinnur høvdu eitt framúr kappingarár í fjør, har liðið vann greipuna. Merkisvert var, at í fjør hevði liðið stóra frágongd, men við m.a. einum nýggjum málverja og profilum sum Turið Arge og Marionnu G. Eystberg, sum komu aftur, var Kyndil sum hamskift seinnu helvt av kappingarárinum og vann alt sum vinnast kundi. Í ár hevur liðið ikki eins stóra frágongd, men at Marianna Geirsdóttir Eystberg er farin til Danmarkar broytir fyritreytirnar nógv. - Tað verður ringt at fáa somu úrslitini sum í fjør tá ið vit hava mist størsta profilin, sigur Bárður Johannesen, Kyndilsvenjari, ið kortini ásannar at hann veit sera lítið um hini liðini. - Vit vita sjálvandi hvar vit eru og vit hava fingið eina unga raska við afturat, sigur venjarin, og sipar til 16 ára gomlu Natasju Hammer, ið er einasta tilgongdin við kappingarbyrjan. Hon kemur úr ungdómsdeildini hjá Kyndli, og ger tað fínt, men við so ungum leikarum má farast fram við fyrivarni ger venjarin greitt. - Ein spælara at taka leiklutin hjá Marionnu finnur tú ikki í Føroyum, sigur venjarin. Summi av hinum liðunum hava eisini styrkt seg við útlendskum leikarum, og tað ber ikki til at siga hvørja mótstøðu tað fer at geva, heldur Bárður Johannesen fyri. Tí miða kyndilskvinnur ikki eftir gulli at byrja við, men hava heldur sett sær sum mál at røkka hálvfinalunum fyrst. - Tað ætla vit avgjørt at klára og tað vænta vit eisini, sigur venjarin. Landskappingin hjá kvinnum er broytt til at tey fýra fremstu spæla seg í hálvfinalurnar í mun til í fjør, tá ið tað vóru tey tvey fremstu, sum spældu seg í finalurnar. - Onkursvegna gevur tað eitt sindur av ró við hesum kappingarleistinum, tí at vit lógu nummar fýra í fjør í langa tíð áðrenn vit megnaðu at vinna okkum í finaluna, hugleiðir Bárður Johannesen. Í fjør flutti Turið Arge aftur til Kyndil eftir eitt hálvt ár í íslendsku deildini og tað gjørdi stóran mun. Tí spyr Sosialurin eitt sindur prikandi um tað kann hugsast at Marianna Geirsdóttir Eystberg verður lokkað heimaftur til seinnu helvtina. Kortini vóru tað óvæntaðar umstøður í íslendska felagnum, ið gjørdi at Turið Arge vendi aftur, so tað ber ikki bara til at lokkað leikarar heim. - Um hon spælir niðri, so kemur hon ikki heim, tað er so einfalt. Og hon ætlar sær at spæla, staðfestir Bárður Johannesen. Góða gongdin seinastu árini førir sjálvandi til at fólk væntað nógv av Kyndli, men liðið kennir ikki trýst á sær av hesum. - Vit leggja heldur trýst á okkum sjálvi at avrikað væl, og leikararnir vilja altíð avrika væl. Tí viðgongur Bárður Johannesen eisini at enda, at vónin sjálvandi er at spæla onkra finalu hetta kappingarárið. Natasja gleðir seg at spæla - Eg giti eg fari at spæla eitt sindur, tí at har eru ikki so nógvir bakkar á liðnum – Vit fara at skiftast nógv, sigur Natasja Hammer, og leggur flennandi afturat at tað er strævið at spæla ein heilan dyst tá ið tú ert so ung. - Eg fari at royna at gera tað so væl sum eg kann. Nú havi eg vant við í tvey ár, so eg gleði meg at sleppa at royna meg, sigur vinstri bakkurin, ið eisini var við U17-landsliðnum, ið fekk fimta plássið í altjóða kapping í Georgia í summar. Spurd um tað er ræðandi at spæla á einum liðið, ið fólk væntað nógv av, tá ið ein er so ung, svarar Natasja róliga: - Tað hugsi eg slett ikki um. Eg hugsi bara at eg skal gera tað so væl sum eg kann. - Hinar á liðnum eru eisini raskar at rósa tá tað gongur væl og stuðla tá ið onkur ger mistøk. sigur Natasja Hammer at enda. Bára tekur gleðiliga ábyrgdina Eg haldi ikki vit eru favorittar í ár, sigur spælskiparin hjá Kyndli, Bára Krossteig Hansen og vísir á at liðið hevur mist ein sera týðandi leikara. Heldur peikar greipuvinnarin frá 2017 og 2019 á VÍF og H71, ið hon metir hava sterk lið í ár. Kortini eru málini at røkka sum longst. - Málið er at vera við har tað er stuttligt! Topp-4 er avgjørt okkara mál við hesum kappingarleistinum, heldur royndi spælskiparin fyri. Serfrøðin metir at Bára Krossteig Hansen og systurin Súna skulu lofta onkrari av ábyrgdini, ið Marianna Geirsdóttir Eystberg lat eftir seg og stórasystirin er ikki í iva. - Tað flytur nógva ábyrgd yvir á okkum, ið eftir eru, men hana taki eg gleðiliga, ger landsliðsleikarin púra greitt Kyndil kvinnur Stovnað: 1956 Føroyameistaraheiti: 8 (1964, 1975, 1981, 1998, 1999, 2014, 2017, 2019) Steypasigrar: 4 (2000, 2014, 2017, 2019) Hópur: Jovana Stranjanac Málverji Alda av Skarði Málverja Bjørt Krossteig Vinstri vongur Sólja B. Poulsen Vinstri vongur Turið Arge Vinstri vongur Súna K. Hansen Bakkur / miðja Bára K. Hansen Miðja Natasja Hammer Bakkur / Miðja Beinta Lindberg Høgri bakkur / vongur Ásleyg Súnadóttir Høgri vongur Halla S. Midjord Høgri vongur Anja Eliasen Høgri vongur Karin S. Midjod Strika Beinta Bárðardóttir Strika Frágongd: Gudrun Restorff Olsen, Marianna G. Eystberg Tilgongd: Natasja Hammer Ingi metir Nummar 1 Kyndil er favorittur aftur. Tær hava mist ein góðan leikara, men hava framvegis krútsterka verju, ein málverja sum kann vera drøj og nakrar av bestu leikarunum í Føroyum. Hópurin er kortini viðbrekin fyri skaðum, men soleiðis er eisini hjá hinum liðunum Sosialurin tippar Nummar 1 Kyndil kann avgjørt vinna Føroyameistaraheitið aftur. Gaman í hevur liðið mist besta leikaran í fjør. Men vit vænta at tær ið eftir eru fara at lyfta missin í felag. Súna Krossteig Hansen er eitt ár eldri (19 ár) og kann væl vera atvoldin til at Kyndil aftur fær ársins leikara í ár.