týsdagur 17. september 2019síða 42

SEPTEMBER 2019 18 HONDBÓLTUR 2019/20 Team Klaksvík skal aftur á slóðina Farna kappingarár fingu klaksvíkingar onga úrtøku úr grundspælinum, men fegnaðust seinni um at kortini fáa fimta plássið, við at vinna niðara endaspælið. Í ár hevur felagið leitað sær til Japan og Georgia at stuðla undir lokalu leikarunum. Ludvík: Tað er stuttligari tá ið vit hótta tey bestu -Standurin í Team Klaksvík er fínur, vit hava fingið nakrar nýggjar leikarar og teir sum plaga at spæla, eru her enn, greiðir Sakaris Ludvík Súnason, ið er aftur í Team Klaksvík eftir at hava spælt nakrar dystir við Kyndli í fjør, frá. Vit satsa kanska eitt sindur meira enn vit gjørdu fyrr við teimum nýggju leikarunum, og vit ætla okkum at koma eitt sindur uppeftir. Ludvík var fastur maður á vinstra vongi seinast hann var í Team Klaksvík, men nú er kapping komin úr Japan. - Tað er fínt at tað er kapping um plássini, og tað fer at hjálpa at vit kunnu skifta meira út, metir Sakaris Ludvík Sùnason, og ger eisini vart við at frágongd eisini hevur verið á liðnum. - Vit skulu spæla eitt sindur øðrvísi. Hørður var stórur strikuleikari, og nú mugu vit kanska flyta okkum meira fyri at brúka strikuspælið, og royndirnar hjá Finni verða saknaðar, greiðir Ludvík frá. Málið hjá Ludvíki og felagnum er fyrst og fremst bara at koma eitt sindur uppeftir á stigatalvuni. Fyri tveimm árum síðani hevði Team Klaksvík kanska sítt besta kappingarár, og Ludvík minnist aftur á hetta við gleði. - Tað er stuttligari at spæla tá tað gongur væl og man fær trýst tey bestu liðini, og tað fara vit heilt vist at leggja okkum eftir, staðfestir afturvendi Team Klaksvík vongurin at enda. Aron vil aftur vinna - Sum tað sær út nú, so eri eg fyrsti málmaður. Vit hava vant øgiliga nógv og hart í summar og eg føli at tað gongur rætta vegin, sigur málverjin, Aron Kallsberg Jacobsen, ið fyllir 20 ár um kappingarbyrjan. - Um vit hyggja eftir kappingarárinum fyri tveimum árum síðani, so gekk tað rættiliga væl at byrja við og stemningurin var øgiliga góður, minnist Aron aftur og kennir aftur, at lagið er øgiliga gott til venjing í summar. - Eg vóni at tað heldur fram. Spurdur um teir nýggju leikararnar, Kaito úr Japan og Zezva úr Georgia, sigur málverjin at Zezva skjýtur øgiliga væl úr fjarstøðu og at Kaito dugir sera væl at leggja bóltarnar inn av vonginum. Málverjin er eisini glaður fyri at hava fingið Hans Arna B. Thomsen aftur á liðið. Hann dugir sera væl at samskifta við verjuna, og tað ger tað lættari hjá málverjunum, tá ið tú stendur aftanfyri ein verjuleikara sum Hans Arna, sigur málverjin. Spurdur um tað merkir at Aron fer heilt upp í tey heilt høgu bjargingarprosentini, svarar málverjin flennandi: - Tað vil eg vóna. Aron og Team Klaksvík eru eisini svangir eftir fleiri sigrum, og niðara endaspælið farna kappingarár, ið Team Klaksvík vann, hevur eisini birt ein hug at royna at vinna meira. - Tað er einki at ivast í at tað gav okkum eitt ”boost” til at venja til hetta kappingarárið, staðfestir Aron Kallsberg Jacobsen. Svein Rógvi: Vit høvdu trupulleikar at telja upp í fimm Nýggjur venjari hetta árið í Team Klaksvík er Svein Rógvi Ljósstein Nielsen, ið at síggja til, hevði eina trupla uppgávu, tá ið hann tók við í summar. - Tá ið vit settu okkum saman at práta í mai- mánað høvdu vit trupult at telja upp í fimm leikarar, so seks og so sjey. Men nú knappliga kunnu vit ein góðan dag mynstra 15-16 mans. Í so máta er tað gott, og venjingarmoralurin hevur verið sera góður. Vit venja nógv og teir møta væl upp, sigur royndi venjarin og heldur fram: - Tað fyrsta vit hava arbeitt við, er at fáa menn til venjing og hava tað stuttligt. So skal hitt nokk koma, greiðir venjarin frá. - Tað er næstan altíð eitt nýtt lið at spæla saman tá ið eitt kappingarár byrjar í Team Klaksvík. Tað kann so venda allar vegir tá ið kappingin fer í gongd, tekur Svein Rógvi til. Fólk eru sum altíð spent at síggja hvussu nýggir útlendingar fara at standa seg í Føroyum, og teir báðir í Team Klaksvík hava dygdir, greiðir venjarin frá. - Kaito er óvanliga kvikur, kropsliga sterkur hóast at hann er lágur, og so hevur hann nakrar skothættir, ið vit ikki eru von at síggja í Føroyum. Hann hevur nógvar stuttligar skotvariantar frá vonginum og hann hevur eisini vónir um at gera seg galdandi á japanska landsliðnum, greiðir Svein Rógvi frá. -Zezva er ein ungur maður úr Georgia, ið gjarna vil menna seg. Hann hevur víst seg at vera sera góður verjuleikari, og hóast hann bert hevur verið her í stutta tíð, so er hann á veg hagar vit gjarna vilja hava hann at vera, men tað fer at taka nakað av tíð, sigur venjarin. Umframt hesar ungu, fegnast Svein Rógvi um at profilarnir á liðnum, sum eitt nú Vilhelm Vilhelmsen og Sámal á Tjaldrafløtti eru aldir upp í hondbóltsumhvørvinum í Klaksvík. Svein Rógvi tekur eisini til at Ludvík Súnason er eisini blivin klaksvíkingur, nú hann er fluttur norður. - Vit hava nakrar spennandi leikarar, og um vit fáa tað at rigga, so kann tað gerast eitt gott kappingarár, staðfestir venjarin at enda. Team Klaksvík Stovnað: 2006 Kappingarárið 2018/19: Nummar 5 (vinnari av niðara endaspælið) Aron Kallberg Málverji Bent Áarsgarð Málverji Rasmus Sommer Málverji Vilhelm Vilhelmsen høgri vongur Sámal á Tjáldrafløtti høgri bakkur Jens Pauli Mohr miðja Kjartan á Gravarbø vinstri bakkur Sakaris Ludvík Súnason høgri vongur Jens Mortan Samson vinstri bakkur Kaito Nakahodo vinstri vongur Zezva Lobashvili vinstri bakkur Petur Martin Eliasen vinstri vongur Jan Eli Ragnarsson Strika Danjal Kjærbo Strika Beinir Johannesen Strika Birgir Poulsen Miðja Hans Arni Bjarnason Thomsen Venjari – stika Frágongd: Finnur Hanson, Hørður Fannar SigÞórsson, Christoffer Madsen Tilgond: Kaito Nakahodo (Japan), Zezva Lobashvili (Georgia) Julian metir: Nummar 7 Fyri at Team Klaksvík skal fáa fleiri stig í ár er tað ein treyt at grundformurin er betur enn undanfarin ár. Team Klaksvík kundi eisini brúkt nakrar leikarar afturat fyri at hækka um góðskuna á venjingunum, tí sum skilst hevur tað verið trupult at fingið tvey lið til venjingar seinnu árini. Sosialurin tippar: Nummar 7 Klaksvíkingar skulu finna aftur til tær verjudygdirnar, ið liðið vísti um hesti í 2017. Árið í fjør gav ongar ábendingar um at Team Klaksvík var á rættari slóð, men um tað hevur eydnast at fingið fleiri fólk, kann tað bragda. Ein vón er at ein leikari sum Sámal á Tjaldrafløtti kann fáa neyðuga stuðulin, ið møguliga kann koma frá millum annað nýggja georgiska bakkinum.