týsdagur 17. september 2019síða 46

SEPTEMBER 2019 22 HONDBÓLTUR 2019/20 Styrktir kollfirðingar vilja spæla við aftur Við tilgongd av Nicklasi Selvig verður nógv væntað av KÍF í ár. Andreas hevur meira at arbeiða við í ár - Teir spælararnir sum er klárir eru væl betri fyri í enn teir vóru í fjør. Vit hava vant síðani í mai-mánað, men vit hava eisini nakrar skaðar at dragast við. Men sum heild eru vit kropsliga nógv betri fyri, greiðir Andreas F. Hansen, venjari hjá KÍF frá. Áhugaverdi styrkurin hjá KÍF er Nicklas Selvig, ið var við at vinna Føroyameistaraheitini hjá KÍF fyri seks árum síðani. Eftir tað hevur hann millum annað spælt í fremstu donsku deildini og er eisini fastur á føroyska landsliðnum, og Andreas F. Hansen er eisini greiður um at tilgongdin av Nicklasi Selvig er ein styrkur. - Selvig kann eisini spæla á fleiri plássum og tað hjálpur okkum sjálvandi, men í roynd og veru er hann komin fyri Borko, sigur Andreas og sipar til høgra bakkin, ið fekk hampulig skoðsmál farna kappingar, men nú er farin av landinum aftur. - Selvig gevur okkum eisini nýggjar mátar at spæla upp á í mun til Borko, so tað verður ein styrkur, vónar venjarin. Enn ein høgri bakkur, ið venur við, tá ið vit vitja hetta kvøldið í Kollafirði er Andrias Nielsen, sum so at siga ikki hevur spælt í tvey ár. - Vit vita sjálvandi ikki hvussu hann verður førur fyri at spæla eftir skaðan hjá sær, men tað hevði verið sera spennandi at havt hann við, sigur venjarin og greiðir frá at Andrias kann gerast ein styrkur, men at KÍF má ansa eftir at hann ikki brotnar aftur. - Vit hava tíverri eisini nakrar umráðandi skaðar, greiðir venjarin frá. Millum annað ein av verjuskiparunum frá í fjør, Niklas Reginsson, hevur fingið ein álvarsligan knæskaða, og spælir neyvan í ár, og so eru menn sum millum annað Joakim Jürs og Hørður SigÞórsson eisini skaddir. Skaðarnir irritera sjálvandi venjaran nakað, tí sum hann sigur, so kunnu kollfirðingar spæla upp ímóti øllum tá ið allir eru til reiðar. Og KÍF hevur eisini sett sær mál hareftir. - Tað allarfyrsta málið hjá okkum er topp-4. Tað er eitt mál og eitt “must” fyri okkum, sigur venjarin at enda. Hans Eli: Topp-4 er eitt “must” - Vit eru eitt sindur betri fyri enn í fjør, og vit hava eisini sett okkum fyri at vit skulu sleppa í hálvfinalurnar í ár, greiðir Hans Eli Sigurbjørnsson frá. 25 ára gamli vinstri bakkurin hevur verið álitið í álopinum hjá KÍF seinastu árini, men spurningurin er um hann kanska kann sleppa eitt sindur av ábyrgd við tilgongdini av monnum sum Rana Højgaard og Nicklasi Selvig. - Ja heilt vist. Vit hava fingið fleiri spælarar aftur, onkrir nýggir eru komnir, so eg sleppi at lata eitt sindur meira til hinar, smílist Hans Eli. Tað er heldur einki at ivast í at Hans Eli hevur verið noyddur at bera nógva ábyrgd á KÍF liðnum seinastu árini. Í fjør førdi tað millum annað til heiðurin sum ársins álopsleikari. Bakkurin hevur kortini ikki sett sær mál um persónligar heiðrar. - Fyrst og fremst snýr tað seg um at røkka topp-4, hitt er sjálvandi stuttligt afturat, men eg hugsi bara um at sleppa í topp-4, staðfestir Hans Eli. Joakim: Eg fari framvegis at hyggja eftir Hans Eli fyrst Ein annar av teimum, ið fekk rós á KÍF-liðnum í fjør er 22 ára gamli málverjin Joakim Jürs. Í løtuni stríðist hann við skaða, men hann er kortini sera spentur upp á kappingarárið. - Eg haldi vit hava eitt væl betri lið í ár enn vit høvdu í fjør og vit eru nógv betri samanspældir, so eg gleði meg. Tað verður stuttligt, sigur Joakim. - Vit føla eisini at vit hava størri breidd. Vit eru nógv fleiri til venjing í ár, og tað gevur sjálvandi fyrimunir at vit nú fáa vant dystir við sjey ímóti sjey. Góða kropsliga venjingin og tilgongdin av kvikum leikarum gevur eisini góðar møguleikar í tiltikna KÍF-skjótálopinum, og tað gleðir Joakim. - Ja, tað gevur møguleikar hjá mær at leggja upp til mál um eg bjargi, men tað verður kanska ikki so øgiliga nógv øðrvísi. Eg hyggi sjálvandi altíð fyrst eftir Hans Eli tá ið eg skal tveita langt, smílist Joakim Jürs. KÍF Føroyameistaraheitið: 2 (2013, 2014) Steypasigrar: 1 (2013) Hópur: Joakim Jurs málmaður Ragnar Gaard málmaður Nils Lykke málmaður Rúni Joensen vinstri vongur Jón Súni Kjærbæk vinstri vongur Hans Eli Sigurðbjørnson vinstri bakkur Rani Højgaard vinstri bakkur/miða Ási Dam miða Nicklas Selvig høgri bakkur Andrias Nielsen høgri bakkur Teitur Joensen høgri vongur Hjalti Hammer Matras høgri vongur Atli Hammer strika Hørður F. Sigthórsson strika Dánial Sørensen strika Magnus D. Jacobsen vinstri bakkur Egin Hjalgrímsson vinstri vongur Vilhelm Magnussen vinstri bakkur Frágongd: Borko Cupara, Niklas Reginson (skaða) Tilgongd: Hørður F. Sigthórsson, Nicklas Selvig Julian metir: Nummar 4 Við tilgongdini av Niklas Selvig í álopsspælinum og Hørði í verjuspælinum er nokk einki at ivast í at KÍF kemur at spæla við í FM semifinalunum. Rúni Joensen er eisini við frá byrjan, so kollfirðingar skulu takast í álvara í ár. Spennandi verður at fylgja spælistílinum hjá KÍF í ár, tí eg rokni við at teir hava góðar kontramøguleikar við Hans Eli og Selvig á odda. Ov nógv lá á herðunum hjá Hans Eli í fjør, so tað verður avgerandi fyri KÍF at fáa Selvig at verða líka eyðsýndan sum Hans Eli. Sosialurin tippar: Nummar 3 Verða kollfirðingar skaðafríðir, kunnu teir røkka langt. Teir eru kanska tað liðið í Føroyum, ið hevur styrkt seg best, og tað verður spennandi at síggja Hans Eli og Selvig í skjótálopsmaskinuni.