týsdagur 17. september 2019síða 48

SEPTEMBER 2019 24 HONDBÓLTUR 2019/20 Kann Kyndil reisa seg eftir vónbrotini í fjør Kyndilsmenn mundu kenna seg óhepnar at úrtøkan í fjør ikki var betri enn silvur í steypakappingini og fjórða pláss í landskappingini. Avgerandi dystirnir koppaðu akkurát ikki Kyndilsmegin, og spurningurin er um broytti hópurin kann røkka longur. Rógvi: Eg grísli enn tenn um kappingarárið í fjør - Kenslan er góð. Vit hava sjálvandi mist leikarar sum Høgna, Ólav, Bartal og David, men vit hava eisini fingið menn sum Janus Jakobsen og Anders, byrjar Rógvi Dal Christiansen. 32 ára gamli høgri bakkurin úr Danmark, Anders Riisdal, er komin til Kyndil og Rógvi greiðir frá at danin er ein øðrvísi týpa, ið hevur eksplosivitet og skjýtur sera hart. -Eg giti at hann verður ein fongur fyri okkum, staðfestir strikuleikarin, ið var millum heilt stóru profilarnar í Føroyum farna kappingarár. Nógv av Kyndilsspælinum bygdi á Rógva í fjør, og spurdur um hesin nýggi danski skjúttin eisini skal leggja trýstið so at bólturin kann enda hjá føroyska landsliðsleikaranum, flennir Rógvi: - Vit fara at venja hann til tað. Men vit hava eisini keypt Anders fyri at brúka tað at mótstøðan ofta liggur tætt at mær. Hann er ein skjútti og skal skora seks mál fyri hvønn dyst. Tað er tí hann er keyptur, staðfestir Rógvi Dal Christiansen. Ein annar dani, ið verður avgerandi hjá Kyndli, er nýggi venjarin, Tom Jensen. Rógvi heldur at tað hevur gingið lætt at venja seg við at fáa nýggjan venjara. Kyndil gjørdi avtalu við venjaran longu í januar, og Tom Jensen hevur fylgt felagnum og prátað við hópin seinasta hálva árið. Vónirnar til kappingarárið eru eisini góðar hjá Rógva. - Vit vilja gjarna vera eitt steypalið aftur í ár. Vit skulu fáa inn í høvdið á hinum liðunum, at vit vilja koma langt í steypakappingini, sigur Kyndilsstrikan, ið hevur verið í tveimum steypafinalum á rað. Hin fyrra var vunnin, men hin seinna var tapt í seinasta sekundið ímóti Neistanum. Í hálvfinalunum í FM endurtók søgan seg, tá ið Kyndil tapti tepru hálvfinalurnar í trimum dystum – Eitt nú var tað avgerandi at Rógvi fekk reytt kort í seinastu hálvfinaluni. Og hetta nívir enn: - Eg klári slett ikki at hyggja eftir hálvfinalunum umaftur. Heldur ikki steypafinaluni. - Tá grísli eg tenn aftaná tíggju minuttir, men nú vóna vit at kunna hevna tað, sigur strikuleikarin, ið eisini hevur onnur mál fyri kappingarárið. - Eg veit at Sonni og Dia hyggja, so eg vil halda fram at menna meg og fáa størri leiklut á landsliðnum, sigur besti strikuleikarin í Okkaradeildini í fjør. - Kanska sleppi eg at verja meira sum trýari í landskappingini, so eg kann fáa fleiri streingir at spæla uppá á landsliðnum, vónar Rógvi Dal Christiansen áðrenn hann staðfestir at har er sera hørð kapping um strikuplássini á landsliðnum, og hann ætlar sær at leggja enn fleiri løg á spælið hjá sær og blíva betri. Tórður: Kanska tað koppar til okkum hesaferð. - Eg haldi tað sær gott út hjá okkum, sigur Tórður Guttesen , ið fekk eitt satt gjøgnumbrot farna kappingarár, har hann millum annað var kosin besti málverji í Okkaradeildini og fekk sínar fyrstu landsdystir ímóti Montenegro og Danmark. Spurdur um hann ætlar sær at halda fram í ár hugsar hann fyrst og fremst um liðið. - Tað koyra vit eftir í øllum førum. Vit arbeiða hart fyri at betra okkum í øllum førum, staðfestir málverjin. Tað er lítið at ivast í at Tórður Guttesen verður fyrsti málverji hjá Kyndli ár, og hann fegnast um álitið. Vónin er eisini at halda fram at gera seg galdandi á landsliðnum, men í dysti hugsar hann ikki so nógv um at landsliðsvenjararnir hyggja. Sum allir aðrir í Kyndli minnist hann sera væl hvussu bæði steyp og FM glapp teimum av hondum, men hóast stóra frágongd vónar hann tað besta. - Kanska tað koppar til okkara fyrimun í ár, smílist landsliðsmálverjin. Venjarin: Vit hava góðar vónir og ætla okkum at menna okkum í fleiri ár - Vit leggja sera nógv í kropsligu venjingina. Vit hava havt onkra avbjóðing við skaðum, men sum heild hevur tað gingið sera væl, greiðir nýggi Kyndilsvenjarin, Tom Jensen, frá, tá ið Sosialurin vitjar Kyndil til venjing tvær vikur áðrenn kappingarbyrjan. Tom Jensen hevur verið knýttur at Kyndli síðani ársbyrjan, so hann hevur fingið eina góða fatan av føroyskum hondbólti og Kyndli sum felagi áðrenn hann fer undir sítt fyrsta kappingarár. - Eg haldi at støðið er rættiliga høgt í Føroyum, so eg eri spentur at síggja hvussu tað fer at ganga, sigur venjarin, ið sær góðar møguleikar at spæla teir heilt ungu inn á liðið. Millum annað eru Ovi Lützen og Kristuffur Bjørgvin frá víðagitna U17-landsliðnum í manshópinum hjá Kyndli. - Vit arbeiða við nógvum ungum leikarum, sigur venjarin, ið eisini leggur ábyrgdina á nýggja høgra bakkin, Anders Riisdal. - Eg havi stórar vónir til hann, og hann venur eisini væl eins og allir á liðnum. Har vera einir 4-5 leikarar sum fara at bera mestu ábyrgdina, og Anders verður heilt vist ein av teimum, staðfestir Tom Jensen, ið hevur tikið yvir eftir Martin Lellek og Jonas Dehn Andersen, ið bert vóru í Kyndli í eitt ár. - Eg havi stóra virðing fyri tí arbeiði sum venjaratoymið gjørdi í fjør. Nú er tað kanska aftur ein nýggj byrjan við nógvum nýggjum leikarum, men eg ætli mær at menna hetta verkið í fleiri ár, staðfestir Kyndilsvenjarin. Kyndil menn Føroyameistaraheiti: 30 (1958, 1959, 1960, 1962, 1963, 1964, 1965, 1966, 1967, 1969, 1970, 1971, 1972, 1973, 1974, 1976, 1977, 1979, 1981, 1984, 1988, 1989, 1990, 1991, 1992, 1994, 1996, 2004, 2006, 2007) Steypasigrar: 11 (1986, 1987, 1990, 1991, 1995, 1996, 2000, 2003, 2008, 2014, 2018) Kappingarárið 2018/19: Nummar 2 í steypakapping og nummar 4 í FM. Hópur: Lars Larsen Black Málverji Tórður Skorheim Guttesen Málverji Sámal Pauli B. Petersen Málverji Rógvi Johansen Vongur Tróndur Wardum Vongur Borgar Sveinsson Vongur Jákup Jørgensen Vongur Jonn Rói Tórfinsson Vongur Kristoffur Bjørgvin Vongur John í Innistovu Vongur Jóni Guttesen Viderø Bakkur Janus Jakobsen Bakkur Tummas Pauli Hanusarson Bakkur Anders Riisdal Bakkur Hjalti M. Jakobsen Bakkur / Miðja Ovi Lützen Bakkur Rókur Geirsson Eystberg Bakkur Rógvi Dal Christiansen Strika Jóan Pauli Patursson Strika Hans Áki Dal Christiansen Strika Tilgond: Anders Riisdal, Ovi Lützen, Sámal Pauli Bernhardsson Petersen, Kristoffur Bjørgvin, Rókur Geirsson Eystberg, Rókur Geirsson Eystberg og Hans Áki Dal Christiansen Frágongd: Bartal Klein Olsen, Høgni Klein Olsen, David Edvardsen, Jan Pauli Toft Johannesen, Ólavur av Fløtum Mittún, Rói H. Lamhauge, Heini Edvardsson. Julian metir: NUMMAR 5 Kyndil kemur allarhelst at kappast við Neistan, KÍF og VÍF um 2-4 pláss í grundspælinum. Útskiftingin í hópinum hevur verið somikið stór, at tað koma helst at ganga nakrir mánaðir til vit síggja tað besta frá Kyndli. Liðið hevur styrkt seg á høgra bakki við einum dana, men tað er ein avbjóðing at ov fáir bakkspælarar eru í hópinum. Fyri Kyndil er tað umráðandi at Rógvi Dal Christiansen heldur sama støðið sum í fjør. Hann er altíð ein hóttan í álopinum, og hann ger tað trupult fyri onnur lið at dekka offensivt ímóti bakkspælarunum hjá Kyndli. Sosialurin tippar:NUMMAR 4 Bartal Klein Olsen og hinir verða saknaðir í ár. Spæla teir profilarnir sum eftir eru, og nýggi høgri bakkurin, upp til sítt besta, kann liðið kortini fáa minst líka góð úrslit sum í fjør – Men tá skulu allir raka støðið.