týsdagur 25. februar 2020síða 44

Mikudagur 26. februar 2020 20 Sosialurin LESTRARBLAÐIÐ Lesandi til lesandi Rúni lesur medisin í Póllandi Hví valdi tú júst hesa útbúgvingina? Áðrenn valið fall á at lesa medisin í Póllandi, hevði eg nógvar ymiskar útbúgvingar í huganum. Tey tvey árini eftir at eg hevði fingið húgvuna í Hoydølum, slapp eg inn á lívfrøði og fysioterapi í Keypmannahavn, men valdi í báðum førum at bíða, tí eg var ikki heilt vísur í, at tað var tað, eg vildi. Eg byrjaði at fáa áhuga fyri at lesa medisin og hoyrdi um fleiri føroyingar, ið lósu í Stettin. Eg frætti, at teir lótu væl at, so eg valdi at hyggja nærri at hesum møguleikanum. Mannagongdin viðvíkjandi upptøku á hesum universitetinum metir bert um próvtølini í lívfrøði, evnafrøði og alisfrøði. Hetta passaði mær væl, so eg valdi at søkja. Hvat er tað besta við tínum lestrarstaði? Góða samanhaldið millum tey lesandi her er heilt víst eitt av tí, mær dámar best við mínum lestrarstaði. Universitetið, eg gangi á, hevur eina enska deild. Har fyrigongur øll undirvísingin á enskum. Á hesi deildini ganga serliga týskarar, sviiar og norðmenn. Eisini lesa yvir 20 føroyingar her í býnum. At tað eru so nógv lesnandi ymsastaðni frá í einum fremmandum býi, ger, at vit eru nógv saman, og at samanhaldið blívur sera gott. Eisini eru norsku, svensku og lokalu lestrarfeløgini røsk at skipa fyri alskyns tiltøkum. Hevur tú nakað gott ráð til onnur, ið umhugsa at lesa? Tá eg varð liðugur í Hoydølum, ætlaði eg at taka eitt ár, har eg arbeiddi. Tað endaði tó við at eg arbeiddi í trý ár, áðrenn eg fór at lesa víðari. Í dag eri eg glaður fyri, at eg bíðaði til eg hevði funnið røttu útbúgvingina. Tá eg skuldi søkja víðari, nýtti eg øgiliga væl av vegleiðingini hjá Altjóða Skrivstovuni, sum nú hevur flutt sítt virksemi yvir til ‘Útbúgvingarvegleiðarin’ hjá Studna. Har fekk eg samband við onnur, sum skuldu byrja og vóru í gongd við at lesa tað, sum eg ætlaði. Har fekk eg eisini góð ráð til umsóknina hjá mær, sum er eitt sindur øðrvísi enn, tá man søkir inn í Danmark. Navn: Rúni Seloy Útbúgving: Medisin Lestrarstað: Pomeranian Medical University, Stettin, Pólland Hví valdi tú júst hesa útbúgvingina? Helst havi eg verið um 5 ár, tá eg bleiv hug­ tikin av løgregluni. Kapparnir í bláum búna vóru stórir, máttmiklir og syrgdu fyri rættvísi. Seinni á lívsleiðini hevur likamlig venjing, menniskjan og samfelagið hugtikið meg. Eg havi onkuntíð fingið at vita, at eg eri tolin, forvitin og mannavinur. Harumframt dámar mær væl at práta, og eg geri ikki mun á fólki. Eitt tíðarskeið var eg duravørður - tíbetur vóru flestu ósemjurnar loystar við rødd og máli. Samskiftið er rætta amboðið í flestum førum. Løgreglan er meira enn bert ein revsandi myndugleiki. Hjálpandi tátturin fyllir meira, enn tann revsandi. Mín hugur at hjálpa, verja og fremja rættvísi millum føroyingar dró meg út um bøgarðarnar. Hvat er tað besta við tínum lestrarstaði? Løgreglufólk hava eitt serstakt samanhald. Vit standa ofta fremst, tá harðast leikar á - í slíkum førum er samanhald alneyðugt. “Man vokser med opgaven”, taka danir til. Fyrsta skúlaskeið stendst m.a. av skjótiskeiði, fyrstuhjálp, sjálvverju, útrend (útrykning) og lógarfrálæru. Eftir lokið fyrsta skúlaskeið sleppur tú at royna teg í veruliga lívinum. Tú skalt vísa teg føran fyri at taka róðrið, tá ruðuleiki ræður. Í byrjanini hevur tú vegleiðara, og í mínum føri fekk eg tveir lívsroyndar og dugnaligar vegleiðarar, sum stigvíst góvu mær størri ábyrgd. Uppgávurnar eru ymiskar og spennandi. Hesar eru m.a. harðskapur, húsaófriður, hóttanir, eldur, deyð, sálarsjúk, ferðslu- og arbeiðsvanlukkur. Hevur tú nakað gott ráð til onnur ið umhugsa at lesa? Eg havi ta fatan, at flest øll, sum við vilja og sjálvrannsakan fara í holtur við útbúgving heima ella uttanlands, kunnu gjøgnumføra hana. Sum frálíður verður ein varugur við sínar máttir og veikleikar. Martin Joensen yrkti: “... viljin er sterkasta svørði; bítur á harðasta stál... “. Tað sigst, at viljin fremur verkið. Viljin kann stimbrast, tí hesin riggar sum ein vøddi. Ein óvandur vilji er veikur, meðan ein vælvandur vilji er máttmikil. Um tú ferðast uttanlands í lestrarørindum, ráði eg tær til at verða opinskárað/ur, siðilig/ ur, forvitin, móttakandi og gevandi. Gloym ongantíð tín samleika, tí vit umboða altíð okkara heimstað. Navn: Snæbjørn Bærendsen Útbúgvingin: Løgreglumaður - Politiets basisuddannelse Lestrarstað: Politiskolen - Rigspolitiets uddannelsesafdeling, 2605 Brøndby Snæbjørn vil hjálpa, verja og fremja rættvísi millum føroyingar