hósdagur 5. mars 2020síða 26

2 FÓTBÓLTUR 2020 FÓTBÓLTSBLAÐIÐ HJÁ MIÐLAHÚSINUM FÓTBÓLTUR 2020 Fótbóltsblaðið hjá Miðlahúsinum Útgevari: Sosialurin Útgávudagur: Fríggjadagur 6. mars 2020 Ábyrgd: Eirikur Lindenskov Myndir: Álvur Haraldsen, Bjarni Nygaard o.fl. Prent: Prentmiðstøðin FÓTBÓLTURIN ER SUM KAVABÓLTUR Áhugin fyri føroyskum fótbólti hevur neyvan verið størri enn tað sama, og nú bólturin fer aftur á rull sunnudagin, tykist fótbólturin sum kavabóltur, tá ið tað kemur til umrøðu og áhuga Sunnudagin fara liðini í bestu mansdeildini undir helst longstu landskapping, sum hevur verið í Føroyum. Fyrsta umfar í Betri- deildini hjá monnum er longu 8. mars, og seinasta umfar verður spælt leygardagin 31. oktober. Liðini fara í summarfrí frá heimligu kappingini seinast í juni, men byrjar aftur at spæla fyri ólavsøku. Fýra av liðunum skulu luttaka í europeiskum kappingum, meðan heimliga kappingin er í summarfrí. Hetta er sjálv kappingin. Nógv av liðunum fóru undir sínar fyrireikingar nakrar fáar vikur eftir kappingarlok í fjør, og sum heild venja føroysku fótbóltspælarar meira enn nakrantíð. Vant verður størri part av árinum, og fleiri venjingar eru á skránni – summu lið venja upp í átta ferðir um vikuna ein part av árinum. Hetta setir stór krøv til spælarar, venjarar og leiðarar, men krøvini hava eisini við sær, at føroyskur fótbóltur mennir seg støðugt. Betri-deildin hjá monnum hevur verið býtt upp í tveir høvuðsbólkar seinastu árini – tey ovaru fimm og tey niðaru fimm. Tey ovaru liðini, sum hava størri fíggjarorku, gera alt meira burtur úr umstøðunum, og tey niðaru liðini royna at taka kappingina uppá teimum økjum, tey megna. Hetta er við til at betra dygdina á føroyskum fótbólti sum heild, men gongdin hevur eisini við sær, at tað er alsamt strævnari at fylgja við. Fótbóltur er mest umtalaða ítróttargreinin í Føroyum, og alt eftir hvussu roknað verður, man hon eisini verða størsta ítróttargrein. Áhugin er sera stórur, og fótbóltur tykist onkursvegna sum kavabóltur. Umrøðan, kjakið og áhugin veksur støðugt, og tosað verður meira um fótbólt alt árið. Miðlaumrøðan er umfatandi, og flestu miðlar gera nógv burtur úr fótbóltinum – dag eftir dag, viku eftir viku alt árið – og eftir at Televarpið fór undir at stroyma dystirnar í bestu mansdeildini, ber til at síggja beinleiðis fótbóltsdystir sum ongantíð áður. Fyrsta landskappingin var í 1942. Burtursæð frá 1944 hevur verið kappast um FM á hvørjum ári, og nú skal FM-vinnarin av kapping nummar 78 finnast. Øllum verður ynskt eitt gott kappingarár.