hósdagur 5. mars 2020síða 38

14 FÓTBÓLTUR 2020 FÓTBÓLTSBLAÐIÐ HJÁ MIÐLAHÚSINUM LYKLASPÆLARIN Petur Knudsen 21 ára gamli Petur Knudsen fær alt størri týdning fyri liðið hjá NSÍ – í ár í álopinum saman við Klæmint Olsen. Petur er tann lívligi og ferðmikli spælarin, men Klæmint er tann eirindaleysi málskjúttin og leiðarin. Petur Knudsen er skapandi spælari, sum trívist væl í bæði tøttum spæli og kontraspæli. GJØGNUMBROTIÐ Pætur Skipanes 19 ára gamli Pætur Skipanes hevur eina ferð verið á vølli í bestu deildini – og tá skoraði hann mál. Í venjingardystum hevur hann spælt rættiliga fitt á miðvøllinum hjá NSÍ og kann fáa størri leiklut í hópinum. Pætur er arbeiðssamur spælari, sum í venjingardystum hevur spælt álopssinnaður miðvallari. VENJARIN Glenn Ståhl Svenskari Glenn Ståhl hevur fyri aðru ferð átikið sær venjarastarv í Føroyum. Í 2018 var hann venjari hjá TB, men fór av landinum aftur eftir eitt ár. Nú skal hann leiða NSÍ í kappingarárinum 2020. Hann hevur gjørt broytingar í leikskipan og leikhátti hjá NSÍ og leggur upp til meira bóltspæla á jørðini. MÁLIÐ Heiðursmerki Seinastu tvey árini hevur NSÍ vunnið heiðursmerki. Í fjør vóru teir leingi partur av oddastríðnum, men dragnaðu móti endanum og vunnið bronsumerki. NSÍ hevur lið, sum kann kappast í toppinum, og málið hjá teimum má vera at vinna eitt Europa-pláss og heiðursmerki í Betri-deildini. Eg royni at vinna mær plássið sum defensivur miðvallari BETUEL HANSEN BETUEL ÆTLAR SÆR PLÁSS Á LIÐNUM Betuel Hansen fekk ikki fyrireikingarnar til kappingina í fjør við, men nú er hann klárur at taka kappingina upp og býta seg fastan á liðnum ÁRNI GREGERSEN NSÍ er eitt av teimum fimm liðunum, sum serfrøðingarnir siga fer at liggja í ovaru helvt á stigatalvuni, tá ið landskappingin endar í heyst. Hópurin er ein blandingur av royndum leikarum og nøkrum ungum, sum eru komnir uppí hópin í hesum kappingarárinum. Men har eru eisini nakrir ungir leikarar, sum hava verið við í nøkur ár, og sum nú eru við at fáa hár á bringuna og eru vaksnir fótbíoltsleikarar. Ein teirra er Betuel Hansen, 22 ár. Hann hevur í nøkur ár verið við á Vespuliðnum,. og í ár verður hann helst at síggja á liðnum sum verjukendur miðvallari. – Ja, mín ætlan er at kempa meg til tað plássið í ár, sigur ungi leikarin, sum tó hevur nakrar dystir í beinunum. – Eg spældi ikki so nógvar dystir í fjør, men tað var fyrst og fremst, tí eg ikki fekk uppstartin við. Tá ið venjingin var uppá tað harðast í fjør, var eg niðri í skúla, so eg misti nógv tá, sigur hann. Niðri á fótbóltsskúla Tað hevur alla tíðina verið ein dreymur hjá Betuel Hansen at spæla fótbólt. Sum 16 ára gamal fór hann til Danmarkar á fótbóltsskúlan hjá fótbóltsliðnum í Silkeborg. Har var hann í trý ár, og endmálið var at ganga í skúla og so spæla fótbóólt. –  Tað dámdi mær ómetaliga væl. Men tað gekk soleiðis, at ta tíðina, eg var í Danmark - altso tey trý árini – var eg darvaður av skaða í tvey ár, greiðir hann frá. Í trý ár búði hann í Silkeborg. Hann gekk í skúla, og so fekk hann eisini viðgerð fyri skaðan í knænum, sum altso endaði við einari skurðviðgerð. – Tað er er vorðið gott, men um eg sigi, at eg onki merki til skaðan, so lúgvi eg, men hann forðar mær ikki í at spæla. Sjálvur heldur Betuel Hansen, at hóast alt ikki gekk eftir vild, tá ið hann var í Silkeborg, so var hetta ein lærurík tíð. Kanska fyrst og fremst tí hann hesi trý árini var einsamallur føroyingur á fótbóltsskúlanum har. – Tá ið ein er so ungur, tá ið ein fer heimanífrá, so ger tað at ein búnast sum menniskja og lærir eitt sindur fyrr at taka avgerðir sjálvur, sigur Betuel Hansen. Í hópinum Í ár hevur Betuel Hansen fingið alla fyrireikingina til landskappingina við. Hetta kvøldið vit vitja við Løkin, er týskvøld – kvøldið har tann harðast venjingin er. – Mær dámar hett sera væl. Tað er eisini gott ikki at vera merktur av skaða, so til ber at geva alt ein kann til venjing. Betuel Hansen veit væl, at kappingin í hópinum er hørð um, hvør skal vera millum teir 11, sum byrja dystirnar. –  Men eg royni altso at vinna mær plássið sum defensivur miðvallari. So fáa vit at síggja, tá ið nýggi venjarin Glen Ståhl fer at seta liðið til fyrsta landskapingardystin um vikuskiftið móti Skála, sigur hann. Múrar Betuel Hansen brúkar nógva tíð uppá at spæla fótbólt og venja, men sum hjá teimum flestu spælarunum í Føroyum, so er tað ikki nóg mikið við fótbóltinum. Neyðugt er at arbeiða við síðuna av og næstan allir hava teir fulltíðararbeiði afturat fótbóltinum. Betuel Hansen arbeiðir sum múrari. –  Tað dámar væl, tí tað er eitt fysiskt arbeiðið. Vit múra veggir, og vit leggja flisar og so framvegis, og tað er ivaleysa nógv at gera hvønn einasta dag. Tað ger sjálvandi eisini, at tíðin gongur ómetaliga skjótt til næsta dyst, sigur hann. Kappingin stendur fyri durðum, og eg spyrji unga leikaran hjá NSÍ, hvussu hann væntar kappingin fer at enda í ár, og hvørji mál hann hevur sett sær. – Fyrst og fremst vilja vit sleppa við í Evropa, men vit ætla okkum at enda ovast á stigatalvuni. –  Tað er eitt sindur torførari at sleppa út í Evropa at spæla, tí Føroyar eiga eitt pláss minni í ár, enn vit hava átt hini árini. Tað ger, at vit eisini mugu gera tað besta vit kunnu í steypakappingini, tí eitt av plássunum í Evropa ber til at vinna tann vegin, sigur hann. Styrkin millum liðini í landskappignini væntar hann verður á leið tað sam, sum hini árini. Hann roknar við at KÍ, HB, Víkingur, B36 og NSÍ enda í ovaru helvtini, men hann dugir ikki at meta um, hvør endar ovast. – Øll fimm liðini gera sjálvandi alt, hvat tey kunnu fyri at enda ovast, men tá ið alt kemur til alt, so kann tað gott vera hepni, skaðar ella karantenur, sum avgera, hvør er nummar eitt tá ið avtornar, sigur Betuel Hansen.